逃離被行程工作積埋積埋嘅忙碌日常，遠離嗰啲煩人嘅事物，想要輕鬆一下。呢個時候，不妨去一趟伊勢志摩，悠閒寧靜咁渡過一個假期。好! 行啦！ 向大人之旅出發喇！
喺繡球花盛開嘅寺院打坐
第一個目的地係大慈寺，因為喺繡球花盛開嘅季節時，寺院內可以欣賞到好靚嘅繡球花而聞名。春天係河津櫻，初夏就係約50種總共1500棵繡球花爭奇鬥艷，形成一個好靚嘅花卉天堂。喺呢度，可以打坐一下，暫時拋開日常嘅煩擾。
半合埋眼，沉澱身心，沉思自我反省嘅時間。
整頓好心靈，用茶壺煲嘅熱水，沖返杯抹茶飲，體驗一下。
同藹可親嘅住持兩公婆，教咗我佛教同日本文化、同埋何謂富有嘅心靈。呢個時候好似處身喺一個好純潔嘅世界入面咁。
專程嚟呢間寺廟嘅外國遊客都好多。
大慈寺
- 地址：三重縣志摩市大王町波切409
- 電話：0599-72-0089（打坐同抹茶體驗需事前預約）
彩繪街道而出名嘅「波切」
波切呢個地方嘅景色，會挑起畫家嘅創作慾望，有石頭階梯嘅斜道，古色古鄉嘅街道，仲有蔚藍嘅大海。
建立於志摩半島嘅大王崎岬角嘅大王崎燈塔，係被選為日本燈塔50選之一㗎。
沿著海邊行，突然巧遇啱啱捉完海鮮返嚟嘅海女，佢俾我睇咗佢嘅收穫。
而喺路途中，去望吓嗰一排排嘅特產店同珍珠店都係一種樂趣。試食醃鯊魚肉真係太好食喇，搞到我都買咗嚟做手信。順帶一提，波切係柴魚片嘅大產地，係一個因柴魚片而繁榮嘅鄉鎮。行去啲古法煙燻柴魚嘅小屋去體驗吓都唔錯呀♪
大王崎燈塔
- 住所：三重県志摩市大王町波切５４
- 電話： 0599-72-1899
鰹魚天白(かつおの天ぱく)
- 地址：三重縣志摩市大王町波切393
- 電話：0599-72-4633 ※全預約制
午餐揀鰹魚茶泡飯？定係鰻魚飯呢？
午餐就喺當地人都推薦嘅田中料理店解決。店入面嘅吧台擺滿咗當地嘅海味。
炸海鰻睇起嚟都好好食咁喎。
人氣菜色係志摩名產美食「鰹魚茶泡飯」
而距離田中料理店好近, 一間創業75年嘅餐廳「shimaya」喺當地都非常出名。
傳統秘製醬料所製作嘅鰻魚飯，喺當地嘅婚喪喜慶嘅場合食到嘅話可以講係高級珍貴嘅招待嚟㗎。
田中料理店
- 地址：三重縣志摩市大王町波切250-1
- 電話： 0599-72-0564
shimaya(しまや)
- 地址：三重縣志摩市大王町波切234
- 電話： 0599-72-0331
不禁要赤腳行落呢個咁靚嘅海灘上
一片白雪雪嘅沙灘，一望無際嘅清澈蔚藍海洋，呢度係「aduri海濱」。喺呢度欣賞到嘅夕陽都係三重縣數一數二嘅美景嚟㗎。喺海風嘅引誘下，都忍唔住除涼鞋，喺陣陣海浪打上嚟嘅海邊度赤腳行。
啲砂粒極幻細，就咁赤腳行喺砂上面都好舒服。就好似返老還童變返個細路仔咁好興奮咁喺嗰度走嚟走去。嗯, 我突然間都勾起返唔少童年回憶。
aduri海濱
- 地址：三重縣志摩市志摩町越賀2259
喺好有海邊風情嘅木造海女小屋品嚐海鮮嘅美味
喺太陽嘅光芒逐漸柔和落嚟嘅時候，我嚟到海女小屋satoumi庵(さとうみ庵)
呢度有新鮮捕獲嘅海產, 例如有鮑魚、海螺、仲有高貴扇貝、魷魚，同埋魚乾等等…
無論邊樣都好，經過海女嘅精心烤焗後，都非常好味。
最後一道菜係加滿羊棲菜一齊煮嘅釜飯。
一邊享受海鮮美味，一邊同海女交流，傾咗啲好難得提到嘅話題，例如海女嘅文化同生活等等。呢個時候所享用嘅餐點更加顯得出色。
海女小屋體驗設施 satomi庵
- 地址：三重縣志摩市志摩町越賀2279
- 電話：0599-85-1212
被輕柔嘅海浪聲包圍，渡過一段悠閒奢侈嘅時光，滿足咗五感感觀同好奇心。創造一個喺夏天屬於成熟大人嘅輕旅行。
志摩觀光酒店能夠實現成熟大人之旅
取材：志摩觀光酒店季刊報導「志摩時間」
URL：https://www.miyakohotels.ne.jp/shima/
作者: FUKUDA MIKI
職業為東京企業嘅社長秘書兼辦公室工作中心主管。
幾年前開始在職進修，再次返到學校。2014年隨著丈夫由東京搬家到三重縣桑名市。
雖然一開始好捨唔得搬家，但無幾耐之後開始對全新嘅環境充滿好奇心。
因為係從外地搬過嚟，反而更能感受到呢片土地嘅魅力並且深深為之著迷。
OTONAMIE http://otonamie.jp/
*該網站有Google網頁翻譯功能.
Comments