Sky Hop Bus Pass 係一張24小時內任搭開篷觀光巴士遊東京嘅車票。指定巴士站設於東京嘅熱門景點。總共有兩條路線。即係話, 買一張Pass就可以玩足兩日, 仲可以就返你嘅東京之旅, 自由上落車, 去到想去嘅景點之餘, 仲可以利用交通時間欣賞東京城景添!
覺得巴士站難搵所以唔想搭巴士? 唔緊要! Sky Hop Bus有免費接駁巴士, 可以去到觀光巴士嘅上落車地點, 咁就唔使驚搵唔到巴士站上車啦! 免費接駁巴士有丸之內路線, Metrolink日本橋路線同Metrolink日本橋 E Line路線, 方便你去搭。
對於想要慢慢悠閒咁遊東京嘅人嚟講都幾便利嘅交通方法嚟㗎。
紅色路線
今次小編我哋就揀紅色路線, 去咗大部份遊客首次去東京都一定會去嘅東京Sky Tree®, 上野同秋葉原! 搭完之後真係可以同你講, 開篷觀光巴士同普通搭地鐵真係完全兩種唔同嘅體驗嚟。連搭車嘅時間都用埋嚟「觀光」, 正好多呀!
搭觀光巴士行晒成個紅色路線需時1個半鐘。之但係買咗一張車票就可以上落車任搭嘅話, 就當然去埋東京熱門景點到此一遊啦! 而最易搵同方便嘅車站, 就係好近東京車站嘅丸之內三菱大廈前面。所以就揀咗由呢度開始, 去東京Sky Tree®, 上野同秋葉原玩!
丸之內三菱大廈嘅巴士站
首先喺東京車站丸之內中央出口出閘, 過咗紅綠燈後轉左, 就可以見到丸之內三菱大廈喇。
而喺大廈入面有Sky Hop Bus嘅賣車票櫃台, 可以喺度買到呢張車票。或者上網事先買咗先, 咁就可以更順暢咁去搭車啦! 巴士約每30分鐘一班車。如果去到趕唔切買車票都唔緊要, 上到車喺車內都可以買到㗎。用信用卡俾錢都得添。你睇呢張Sky Hop Bus Pass幾易入到手!
上到車就戴上一開始派俾我哋嘅耳機, 語言方面可選中文(普通話), 英文, 日文同韓文。搭觀光巴士時可以一邊聽聲音導航, 一邊知多啲眼前嘅地方或景點嘅歷史介紹等。而且車內仲可以連接免費Wi-Fi, 咁就可以將影到嘅靚相即刻up上facebook或者instagram啦!
小編覺得要坐就梗係揀最前嘅位嚟坐啦! 無論落雨定係有幾大風都好, 玻璃窗都為你擋晒風雨, 可以舒舒服服咁影靚相! 順帶一提, 雖然係開篷巴士, 但落雨時都會照顧返乘客派發雨褸嘅。
如果坐唔到最前嘅位都唔緊要, 其實坐後面都可以用廣闊嘅視野去欣賞東京城景! 喺上層嘅開篷巴士望出去, 東京兩旁嘅高樓大廈真係好有壓迫感, 好壯觀! 因為無嘢阻礙, 喺觀光巴士影出去嘅相, 真係好靚㗎! 雖然好怕凍嘅人喺冬天可能會唔想搭開篷巴士, 但係由12月開始冬季期間會限定派發暖貼同毛毯。咁冬天都可以暖住咁搭開篷巴士啦!
資訊詳情
- 名稱: 東京站
- 地址: 東京都千代田區丸之內1
- 交通方法: JR山手線或東京Metro丸之內線都可到達
東京Skytree®站巴士站
出發30分鐘後就到咗東京Skytree®喇。東京Skytree®作為日本嘅電波塔, 係東京最高嘅建築物。 而東京Skytree®樓下有個購物中心, 去東京Skytree®睇東京景色嘅同時都可以安排行街買手信嘅行程呀。可能會買咗好多嘢一抽二褦, 不過如果搭Sky Hop Bus嘅話就唔使怕啦! 喺搭車嘅期間, 仲可以將行李放喺巴士。同地鐵唔同, 又有位坐, 又可以坐得輕鬆舒服添!
上到觀景台, 喺欣賞城景嘅時候, 買咗東京Skytree®Café嘅雪糕嚟食。一邊食一邊睇咁靚嘅風景, 真係雙重享受呀!
同普通250円嘅雪糕比, 都係差唔多, 都好食嘅。不過! 配埋呢個景色同環境, 食出唔同「感覺」, 咁都值吖!
上野松坂屋巴士站
再搭多30分鐘, 就到下一個景點上野松坂屋巴士站。落車後行到上野好出名嘅阿美橫丁都只係5分鐘路程。嗰度有好多好味嘅海鮮可以食, 好平嘅袋同鞋可以買, 仲有藥妝店可以掃貨添。而隔離街嘅中通商店街都有好多舖頭, 賣嘅商品又係好平。小編就建議落車後首先到阿美橫丁行街, 行到盡頭再調頭轉入中通商台街, 一直行返去巴士站就最理想不過喇。
當日喺阿美橫丁俾好平嘅燒蠔吸引咗! 不過其實扇貝先係最好食, 貴少少都有道理嘅!
喺阿美橫丁嘅Minatoya食品店賣嘅章魚燒真係好好味呀! 4粒都只係200円咋! 仲可以自由任加章魚燒醬汁, 沙津醬同木魚。喺冬天行行吓街食到暖笠笠嘅章魚燒即刻暖入心頭呀!
秋葉原（末広町）巴士站
今日觀光巴士之旅最後一個目的地就係充斥著遊戲, 漫畫, 動畫商品嘅秋葉原!
作為呢日嘅最後一個景點, 由落車嘅巴士站直路行向秋葉原, 經過最熱鬧嘅地帶, 行完街最後啱啱好去到秋葉原車站, 就可以搭地鐵返酒店, 都幾順路㗎。
行過秋葉原見到呢個「福袋」時笑到停唔到!! 究竟咩人會用成千円買個「鬱袋」返嚟呢!? 哈哈
呢個觀光巴士服務好方便, 位又多! 唔驚搭車無位坐。任搭自由上落車方面都好吸引! 只要拎住巴士時間表, 就可以輕鬆製定當日嘅行程。次次去日本都搭地鐵, 今次就轉吓新玩法搭開篷觀光巴士遊東京啦!
Comments