京都詳盡購物指南

嚟到呢個古今並存嘅都市—京都，唔單只買得到富有文化氣息嘅傳統商品，亦可以買到幾有時尚感嘅商品。有好多地方都可以滿足到你嘅購物心願。無論你想買嘅商品係高級定平價，手工藝品定係食品，嚟到京都都可以買得到。

京都購物區域

鍾意瘋狂Shopping嚟減壓，療癒吓自己身心嘅人，京都就啱唒你喇! 呢度提供各式各樣嘅商品俾你盡情揀盡情買! 所以，喺呢篇文章入面我哋會介紹京都車站、京都市中心嘅購物景點，並且會推薦大家去邊啲地方可以買到又平又靚嘅商品、服飾同日本傳統工藝品。

一嚟到京都, 都唔使行出京都車站，喺入面就可以盡情瘋狂買買買啦。因為車站大樓入面已經有好多商舖，輕輕鬆鬆就可以喺度行一日啦。

Porta位於巴士總站嘅正下方，一共有100多間商店同餐廳進駐。嚟到呢度，可以搵到好多女裝、男裝同化妝品等嘅商店。主要分為兩個區域：西區有好多時尚精品，而東區主要由販賣食品同手信嘅商店組成。.

呢個商場佔據京都車站嘅一部分範圍，一共有三層樓。The Cube入面設有無數時尚服飾同配件商店，最引人注目嘅係蛋糕甜品店同禮品店。

一定要介紹俾大家知嘅, 就係位於B1樓嘅手信舖，店內賣緊好多商品，大部分商品係京都限定商品，從糖果到酒精飲品都應有盡有。

知名嘅伊勢丹百貨公司位於京都車站，一共有13層（包括地庫樓層）。唔單只可以買到最新時尚流行服飾，仲有好多歷史悠久老店嘅糖果點心同傳統工藝品等等。7樓設置咗小型藝術博物館，非常適合藝術愛好者嚟行吓。

京都市中心係超正嘅購物景點，市中心聚集咗好多大型百貨公司、亦有好多小店，仲有知名嘅購物商場，而且距離都好近好集中添。

如果你有興趣去行百貨公司，可以考慮吓大丸百貨或高島屋。呢兩間百貨公司都只係相距700米。兩間百貨公司都引進咗好多進口品牌，包括最新時尚流行、配件飾品同埋居家用品等等。

仲有唔好錯過行吓地庫嘅食品區，絕對會令人留下深刻印象。喺呢度可以買到好多好味嘅美食、仲有和菓子（日本傳統點心）同茶葉等。

如果想買獨特嘅日本藝術同手工藝品，咁都可以去行吓「森田和紙」同「紙司柿本」呢兩間和紙品牌（日本手工造紙）、或者去京漆匠象彥買頂級漆器。

有時想要買平嘢就絕對唔可以錯過市場、商店街喇。一定要去呢啲地方行吓, 話唔定會尋到寶呢。

呢間歷史悠久嘅零售市場，人稱「京都嘅廚房」，有賣好多京都特色嘅菜餚。嚟到呢度，可以搵到各種同食相關嘅商品，新鮮嘅海鮮, 農產品, 日本糖果點心同手工製嘅廚房用品都有賣。

寺町一帶遍布好多普通服飾店、書店同藝術畫廊。而迎合參拜寺廟嘅信眾要求，亦可以搵到宗教相關用品，例如佛珠、佛教雕像、薰香, 仲有好多裝飾品。除此之外，京都限定商品都唔少㗎。

新京極商店街裡頭大部分都係服飾店同手信店。所以吸引咗好多後生仔女嚟，仲有機舖同戲院添。想搵經濟實惠嘅禮物，就一定唔可以錯過呢度喇。

京都有好多地方都可以買到衫，無論係傳統服飾定現代設計，正式定係休閒style，各種各樣嘅服飾都應有盡有，每個人都一定可以搵到適合自己嘅衫。平時行開百貨公司或知名服飾商店嘅話，不妨試吓去呢度shopping啦。

靠近河原町站，名叫「SOU・SOU kikoromo」嘅獨創品牌喺嗰一帶開設咗好多分店。每間分店嘅每樣商品都獨一無二，喺其他地方搵唔到第二件相同㗎。為求滿足各種顧客嘅需求, 「SOU・SOU kikoromo」賣嘅女生和服，每件設計都好唔同，夠唒獨特、而且色彩豐富，時尚又前衛。

而男裝部分可以去「SOU・SOU keii」，店入面所賣嘅服裝一樣令人印象深刻，全部都係和服設計，適合啲唔隨波逐流，追求與眾不同嘅人。鍾意買和服浴衣嘅朋友，都可以嚟呢度行吓，店內亦有銷售整套商品。