東京之旅嘅最後一日一定會安排時間購物，而品川就喺你嘅最佳選擇。品川車站附近本來就有好多購物嘅地方。而且距離羽田機場唔遠，對於使用羽田機場嘅旅客嚟講，更加係最後一分鐘嘅絕佳購物機會。
品川車站內嘅購物中心ecute品川
Ecute品川位於JR品川車站內，擁有優越嘅地理位置，而且唔洗出閘，可以作為離開東京前嘅最後購物地點。萬一前往機場中途，先至諗起要買嘢，或者提早出發前往機場，想搵個地方行下，咁呢度就最適合你。
呢間購物中心分為兩個部分，ecute 品川同ecute品川South。喺呢度可以搵到好多唔同類型嘅商店：如時裝、包包、配件飾品、手信、書籍、甜點零食等等。其中一哋商店係獨家嘅，除咗呢個指定車站外，其他地方都買唔到。如果你鐘意時尚服飾，並且喺東京旅程途中錯過咗購買機會，ecute品川South都有Uniqlo或其他服飾店俾你行下。
如果想喺返香港之前，最後一次享用日本美食，ecute品川都有好多餐廳可以滿足到你。
營業時間：08:00-22:00 (依店家而異)
景點資訊
- 名稱：Ecute品川
- 地址：東京都港區高輪3-26-27
- 交通方法：從JR品川車站直接進入，唔洗出閘
品川車站附近嘅購物中心
品川站有2個出口，西面係「高輪出口」，東面係「港南出口」。如果想尋找更多購物據點，每個出口都可以通往另外兩個購物中心，為你提供更多嘅選擇。
Atre品川
可以從品川站嘅「港南出口」直接通往Atre品川購物中心，方便快捷。喺二樓有服飾店同生活用品雜貨店，三樓主要係食品店，頂層嘅四樓則係餐廳同Café。
營業時間：07:00-00:00
景點資訊
- 名稱：Atre品川 (アトレ品川)
- 地址：東京都港區港南2-18-1
- 交通方法：JR品川站東面「港南出口」直接進入
Wing高輪
喺品川車站嘅西面，可以從「高輪出口」輕鬆前往另一個同車站直通嘅購物中心「Wing高輪」。「Wing高輪」分為兩個部分，「Wing高輪EAST」同「Wing高輪WEST」，EAST同車站嘅「高輪出口」直接相連。無論係EAST定係WEST嘅購物中心都有好多服飾店同食品店。
營業時間：11:00-21:00 (部份商店較早開店或關店)
景點資訊
- 名稱：Wing高輪 (Wing Tanakawa)
- 地址：
- Wing高輪EAST: 東京都港區高輪3-26-26
- Wing高輪WEST: 東京都港區高輪4-10-18 3
- 交通方法：JR品川站西面「高輪出口」直接進入
唔單止係酒店，品川王子大酒店都係一個購物嘅好選擇
品川王子大酒店位於Wing高輪購物中心以南，同其他酒店唔同，品川王子大酒店擁有自己嘅購物區，提供各種商品，包括珠寶、配飾、服裝、禮品同特產等。
如果離辦理登機手續嘅時間仲有好耐，品川王子大酒店有保齡球場，嚟呢度打個一、兩局保齡球都得吖。
營業時間：購物中心: 10:00-21:00 (部份商店嘅營業會有所不同), 保齡球場: 10:00-22:00
酒店資訊
- 名稱：品川王子大酒店
- 地址：東京都港區高輪4-10-30
- 交通方法：JR品川站步行2分鐘
Comments