位於東京嘅多摩，好似無乜聽過呢個地方，但當地有幾個非常受旅客喜愛嘅觀光景點。例如，大家應該都有聽講過嘅SANRIO彩虹樂園，仲有多摩動物公園同多摩美術大學圖書館，都係三大推介觀光景點，以下為大家詳細介紹。
多摩SANRIO彩虹樂園
嚟SANRIO彩虹樂園同HELLO KITTY講聲HELLO！SANRIO彩虹樂園到處都可以睇到經典可愛嘅招牌角色出沒喺各地，隻隻都色彩繽紛可愛。對SANRIO角色嘅粉絲嚟講，呢度簡直係天堂。呢座超人氣嘅主題樂園，每年都吸引咗超過150萬名HELLO KITTY粉絲到訪。
一座適合闔家歡樂嘅樂園，擁有各種專為兒童設計嘅遊樂設施。
SANRIO彩虹樂園嘅餐廳
SANRIO彩虹樂園內嘅餐廳均依各SANRIO明星角色為主題，有卡通特色美食區、SANRIO彩虹世界餐廳、CINNAMOROLL夢幻咖啡廳、甜品小舖等等。可以食到HELLO KITTY造型嘅咖哩飯、仲有藍色CINNAMOROLL嘅餐點！真係過分可愛，完全唔捨得食落去吖。
SANRIO彩虹樂園嘅表演活動
SANRIO彩虹樂園隨時都有表演活動。鐘意睇SANRIO明星角色歡樂唱唱跳跳，咁就一定要買飛入場睇遊行啦。
SANRIO彩虹樂園門票喺香港各家旅行社可以買到，或直接上官網買都得。
景點資訊
- 名稱：SANRIO彩虹樂園（Sanrio Puroland）
- 地址：東京都多摩市落合1-31
- 交通方式：京王線至多摩中心站徒步約6分鐘
多摩動物公園
多摩動物公園本來嘅規劃係歸屬於上野動物園嘅一部分。志在俾動物能夠生活喺自然嘅棲息地內。園區主要分為四個區域—亞洲園區、非洲園區、澳洲園區及昆蟲園區。
亞洲園區
喺亞洲園區，可以睇到好多日本當地嘅動物同其他亞洲動物，如梅花鹿、蝦夷棕熊、日本獼猴、長鬃山羊、大象、印度犀牛、馬來貘、老虎、角鴞、金鵰以及白尾海鵰等各種各樣嘅動物。
非洲園區
非洲園區會搵到各種生活喺熱帶草原嘅動物。如獅子、長頸鹿、斑馬、羚羊同鴕鳥等。
澳洲園區及昆蟲園區
澳洲園區有可愛嘅樹熊、袋貂、紅袋鼠、袋熊、鶴鴕、以及其他更多喺澳洲先至有嘅動物。而昆蟲園區喺1988年興建完工，展示並培育好多稀有珍貴嘅昆蟲。
景點資訊
- 名稱：多摩動物公園
- 地址：東京都日野市程久保7-1-1
- 交通方式：從立川站開車約20分鐘；乘搭京王線、多摩都市單軌電車至多摩動物公園站落車
多摩美術大學圖書館
由伊東豐雄設計嘅多摩美術大學圖書館，位於八王子校區，係一座寬敞嘅大型圖書館。高大嘅玻璃窗同大大嘅拱門設計，令校園周遭嘅自然環境融入圖書館室內，打造出美麗嘅開放空間，提供學生同遊客一個舒適安心嘅閱讀環境。
呢座圖書館於2007年竣工，館藏共約77,000件日本書籍、47,000件外國書籍同1,500種期刊。2012年慕名而來嘅訪客達86,000人次。
景點資訊
- 名稱：多摩美術大學
- 地址：東京都八王子市鑓水2-1723
- 交通方式：JR橫濱線、京王相模原線橋本站北口嘅6號巴士站，乘搭「往多摩美術大學方向」嘅神奈川中央交通巴士，車程約8分鐘
Comments