相信大家一定相當熟悉日日用嚟煮飯嘅電飯煲，但日本飯煲功能始終都同香港款式有分別，因此如果有喺日本買過電飯煲、又話將來有興趣想買日本版電飯煲的話，就要先了解各種功能嘅日文寫法！
以下，FUN! JAPAN編輯部將會為你介紹每一個按鈕嘅功能，仲會簡單解釋基本嘅操作控制方式～
日本電飯煲煮出頂級日本白飯
世界有好多國家都以米飯為主食，日本只可以話係其中一個。但係點解日本嘅電飯煲咁享負盛名呢？出名特別功能多，仲可以煮得出品質高級、獨特風味，特別好食嘅日本飯？日本家家戶戶所使用嘅電飯煲，其實係用咗好頂尖嘅技術。大多數嘅日本電飯煲，由設計嘅時候已經係預定唔止用嚟煮飯，仲有好多其他功能。當然，功能越多，優點越多，價格就越貴啦。所以日本頂級嘅電飯煲，可以話係所費不貲。
但係如果預算唔多，而且只希望電飯煲可以將生米熟成熟飯就好嘅話，就可以用呢篇文章所介紹嘅最基本功能就可以。（雖然最基本嘅電飯煲，可能都會有好多其他功能按鈕，甚至可以焗蛋糕）。
最重要嘅掣係「炊飯」
炊飯/再加熱：啟動開始煮飯嘅掣，如果想再加熱亦係呢個掣。
予約：預約，可以用呢個功能嚟指定時間，預約電飯煲自動開始煮飯嘅時間。
左右方向鍵：呢兩個掣只喺用嚟較時間時用。
メニュー：選單，呢個掣可以用嚟切換唔同嘅模式。只要撳呢個掣，就可以見到各個選擇嘅上面有個小箭頭出現，用來揀要用邊一個模式。關於各個模式嘅用法可以睇下面。
通常會選擇「白米」模式
エコ炊飯：慳電模式，當唔係煮好多飯嘅時候，可以用呢個模式，但係相對嘅會慢啲，煮好嘅飯亦會比平時硬啲。
白米：呢個係最常用到嘅一般模式。
炊き込み：雜炊飯，將其他各式食材同白米混埋一齊煮時用，係一種日本嘅米食料理方式。
無洗米：呢個模式可以煮唔使洗嘅米，更加的環保。但係前題係要用「無洗米」，唔係平時一般嘅白米。無洗米用嘅量杯亦會同一般白米有啲唔同。
白米急速：如果趕時間嘅時候，希望快啲煮好飯嘅話，就可以用呢個功能。但煮好嘅飯會比平時稍微硬少少。
亦可以用嚟煮粥、雜穀米同糙米
おかゆ：粥，用呢個模式時，亦可以放埋其他食材一齊煮，就好似煮雜炊飯時一樣。
玄米：糙米，如果成日飲茶，可能有飲過「玄米」茶。呢個模式就係用嚟煮玄米或者叫糙米。
雑穀米：雜穀米，將各式雜米、穀類混埋入白米一齊煮嘅時候，就可以用呢個模式。
金芽米：金芽米係一種介乎糙米同精米之間嘅米。係一種己經完成碾磨，但穀類精華仍完整保留住，擁有更好風味同營養價值嘅米。
最後，「保温/とりけし」呢個掣係用嚟開啟或者關閉保溫模式，當米飯己經煮好，呢個燈會亮起，表示而家己經轉為保溫模式。再按一次可以將保溫模式關閉。
簡易嘅雜炊飯食譜
喺呢到我地唔只說明唔同嘅掣，仲簡單咁介紹一下點樣煮雜炊飯。需要的嘅食材如下：
- 米 2量杯
- 雞胸肉 50克
- 鴻喜菇 100克
- 紅蘿蔔 30克
- 酒 15毫升
- 鰹魚風味調味料 8克
- 日本醬油 20毫升
首先，將米洗好後放入煲入面。
放進醬油、調味料同埋酒。跟住放入比一般煮白飯時，稍微少嘅水。（因為加入嘅其他食材中含有水份）
然後喺上面放埋想一齊煮嘅食材。根今次食譜，就放鴻喜菇、紅蘿蔔同埋雞胸肉。
最後，閂埋蓋。調整模式至雜炊飯模式（炊き込み），然後按下啟動(炊飯)。喺顯示面板上會出現數字，係倒數幾時會煮好。
當飯煮好時，電飯煲就會發出音樂來通知，就咁可以開餐喇！
就係咁簡單！根據你個人喜好放入食材，歡迎你都試下做啊！
Comments