長野縣北西部北阿爾卑斯山山麓上有一座名為「白馬村」嘅地方。每逢夏季，村內都會迫滿北阿爾卑斯山登山客，而到咗冬季，就會吸引各地滑雪客聚首一堂，場面非常熱鬧。此外，此處亦係出名雪質優良嘅「粉雪」嘅一大產地。
而今次，FUN! JAPAN團隊成員就有機會親自到白馬取材，為大家介紹2018年冬季嘅「白馬」滑雪場！
白馬－滑雪客聖地
白馬村範圍內一共有10個大大小小嘅滑雪場，當中包括1998年長野奧運會場「白馬八方尾根滑雪場」、以及能夠眺望北阿爾卑斯壯麗景色嘅「EIBURU白馬五龍」等。雖然大小不一，但無論邊個滑雪場都設有初級、中級、高級滑雪課程，即使係初學者及高級者都無需擔心。另外，即使係無嘗試過滑雪板或單板滑雪嘅遊客都大可以放心，因為多個滑雪場都有舉辦英文滑雪教室。集體課程費用一般為兩小時約6,000日圓左右，而私人授課則為兩小時約20,000日圓。FUN! JAPAN特派員今次採訪時亦見到好多參加課程嘅訪日遊客呢！
溫馨提示：初次體驗滑雪嘅人士參加課程會比較容易上手㗎！
深受外國人歡迎嘅「粉雪」到底係...？
白馬地區以清爽、粉狀且水分少嘅「粉雪」而聞名，鬆軟積雪嘅漂浮感獲得全世界滑雪客注目，甚至更促使新字彙「Japan」+「powder snow」＝「Japow」嘅誕生𠻹！
順帶一提，FUN! JAPAN特派員雖然係滑雪初學者，但就因為跌倒時係跌喺鬆軟粉雪上，因此屁股完全唔覺得痛。白馬對於滑雪初學者嚟講真係非常適合呢！
由東京搭乘新幹線及巴士只需時2小時30分鐘！
從東京揸車前往白馬村約需要4小時；而從東京站乘搭北陸新幹線就需要先搭1小時30分鐘到長野站，然後再喺「特急巴士白馬線」（ALPICO交通）轉車、再乘搭1小時15分鐘抵達白馬八方巴士總站。因為當日來回的話時間會比較趕，因此我哋會建議喺村內住宿一晚。此外，亦有新宿「高速巴士白馬・安曇野－新宿線」、羽田機場「高速巴士白馬－羽田機場線」、以及成田機場「高速巴士白馬－成田機場線」等等交通方式可供遊客選擇。
Comments