「居酒屋」即提供酒類飲品以及適合配酒一同享用嘅料理（下酒菜）嘅日式酒吧。每逢平日夜晚收工時分，新橋、新宿等商業區嘅居酒屋都總會擠滿收工後準備飲酒作樂嘅上班族，場面非常熱鬧。有別於壽司、天婦羅、壽喜燒等傳統「和食」，居酒屋提供嘅下酒菜為日式炸雞、薯仔燉肉、薯仔沙律等款式，您可以喺店內品嚐到日式家庭料理嘅樸實味道。今次，我哋就會喺居酒屋為數眾多嘅下酒菜當中，選出必叫不可嘅三道料理介紹畀大家！
啤酒嘅最佳拍檔！居酒屋必叫定番料理「日式炸雞」
日式炸雞製法非常簡單，只需將雞肉沾上一層炸粉或太白粉形成一層薄麵衣後，再落鍋油炸即大功告成。呢款炸物料理之所以咁受歡迎，皆因炸得酥脆嘅麵衣以及入口後隨著咀嚼滿溢而出嘅肉汁，簡直係同啤酒配合得天衣無縫！如果炸雞旁邊伴有切片檸檬，您更可以將檸檬汁擠喺炸雞上，將酥脆炸物帶同檸檬清香一同入口、瞬間將炸物嘅油膩感一掃而去並轉變為清爽口感。由於日式炸雞都會經常被用作便當內嘅配菜，所以超市內嘅熟食角落、或者冷凍食品區都唔難搵到佢嘅存在。通常一盤兩人分量嘅價錢約為600至800日圓左右。
於攪勻蛋汁中加入高湯煎成嘅「高湯煎蛋捲」
無論係早餐或係午飯便當內，「高湯煎蛋捲」都係對日本人而言非常熟悉嘅配菜之一，可謂一道慰藉心靈嘅「母親嘅味道」代表性料理。呢款雞蛋料理係將高湯加入打勻蛋液後煎製而成，依據個人喜好，您仲可以喺上頭佐點豉油食用。關東地區的話，除咗高湯之外，民眾一般仲習慣加入砂糖，務求令整體口感帶甜味；另一方面，關西地區嘅煮法則普遍唔會加砂糖，反而係部分舖頭會喺煎蛋捲旁佐上白蘿蔔泥或蔥絲供客人享用。就連鎖居酒屋嚟講，一盤雙人份量煎蛋捲大約盛惠600至700日圓左右。
唔理三七廿一，埋位後先叫一盤「枝豆」啦！
枝豆即尚未成熟、呈青绿色嘅食用大豆。一般食用方法為「水煮」，喺放咗鹽巴調味嘅熱水內直接連著豆莢一齊放入煲裡灼熟撈起後，再依個人喜好灑上鹽即可食用豆筴內嘅部分。因為烹調方法只需水煮、十分簡單，所以一般客人就座嘅同時，都會習慣「先嚟一杯啤酒同一碟枝豆」，於居酒屋內第一道菜就點枝豆嘅客人不計其數。一盤價位大約為500日圓左右。枝豆主要收成期為夏季，夏天去日本旅行時請記得嗌返一盤試下啊！
Comments