以恐龍、眼鏡、螃蟹聞名嘅「福井縣」，喺美食方面除咗經常會聽到越前蕎麥、越前蟹等必食選項之外，原來仲有唔少不為人知嘅當地美食喔！今次就等我哋前往呢個擁有恐龍坐鎮嘅北陸國度，一探究竟吧！
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
福井美味優勢
福井縣廣為人知嘅特產有日本酒、蕎麥、稻米等，生產以上講到嘅特產共同條件就係「優質水源」。因為受惠於跨越福井、石川、岐阜和富山嘅白山山脈及其所形成嘅河流，令福井擁有富含礦物質嘅水資源，而且該縣內如大野市、鯖江市、小浜市等地嘅湧泉亦被認定為「福井美味水」。當中，大野市內更擁有被選為日本國家指定天然記念物棲息地嘅「本願清水」，以及被選為「日本名水100選」之一嘅「御清水」。而倚靠日本海嘅福井，冬季嘅美味海鮮亦非常出名，如越前蟹、福井甜蝦等。
福井B級美食
醬汁炸豬扒丼飯（ソースカツ丼）
「炸豬扒丼飯」（カツ丼）被譽為福井當地人嘅「靈魂美食」。喺福井如果嗌炸豬扒丼飯，送上檯嘅並非與金黃雞蛋相融嘅炸豬扒丼飯，而係喺白飯上放上大大塊沾滿醬汁嘅炸豬扒，係一款簡單又有點豪邁嘅料理。
福井醬汁炸豬扒丼飯嘅來源眾說紛紜，其中一個講法有提及到係起源於當地洋食店「歐洲軒」（ヨーロッパ軒），歐洲軒老闆高畠増太郎從德國留學返日本之後，最初先喺東京早稻田開店，提供醬汁炸豬扒丼飯，後來餐廳因1923年關東大地震毀壞，高畠返回家鄉福井，1924年再度開設「歐洲軒」（現時福井歐洲軒總店），醬汁炸豬扒丼飯亦喺福井一砲而紅。
現時福井縣內到處都可以品嚐到醬汁炸豬扒丼飯，每間醬汁各具特色，美味各有千秋，值得試多幾間，搵出你最鍾意嘅口味喔。
醬油炸物丼飯（醤油カツ丼）
菜式名睇落同醬汁炸豬扒丼飯非常相似，但外觀與味道係完全唔一樣㗎！
「醬油炸物丼飯」（醤油かつ丼）誕生於2010年，由福井縣大野市醬油老店「野村醬油」第六代傳人野村明志帶領下，致力開發專用醬油，並與當地餐飲業者共同努力，終於開發出福井新名物「醬油炸物丼飯」。
醬油炸物丼飯有3個規定：需要使用福井縣產醬油、丼飯裡需有炸物及搭配大量蔬菜。醬油口味食落比前面提到嘅醬汁炸豬扒丼飯清爽，尤其福井以水質優良聞名全國，以大野市好水製成嘅醬油當然具有品質保證。
炸物內容不限於豬肉，只要係炸嘅食物即可，所以有店舖會提供炸青花魚，甚至會出現番茄或矮瓜等炸蔬菜，可以食用大量蔬菜亦係與醬汁炸豬扒丼飯最大嘅差異喔。如果你想品嚐福井美食之餘，又想兼顧到營養與口味嘅平衡？小編非常推薦你一嚐口感清爽嘅「醬油炸物丼飯」喔！
敦賀拉麵（敦賀ラーメン）
以豚骨、雞骨加入濃厚醬油所熬煮湯頭，麵條為中細麵，初次品嚐嘅日本人都會一致評價為「懷舊的滋味」。
正如其名，「敦賀拉麵」係發祥於福井縣敦賀市嘅拉麵，如果要講得更精準嘅話，係由敦賀站附近嘅拉麵小販所開創嘅拉麵。據聞最早賣呢款料理嘅小販名為「一力」，亦係從當時營業至今嘅名店之一。昭和時代，為大貨車運輸業務蓬勃發展時期，敦賀站附近國道8號線馬路上總有好多大貨車往來停留，曾經有成十幾間拉麵小販沿著馬路開檔，貨車司機休息時會嘆返碗拉麵，因而令敦賀拉麵其名字逐漸被傳開。現時國道8號線沿線仍有多間拉麵小販於晚上營業，並受到當地居民喜愛。
BORUGA飯（ボルガライス）
「BORUGA飯」（ボルガライス）係福井縣越前市武生地區誕生嘅西洋食物，喺蛋包飯上放有炸豬扒並淋上特製醬汁（多蜜醬汁、茄汁或白汁等），適合典型嘅和洋合併料理。而且呢款料理搭配相當自由，蛋入面要包咩飯？炸物要用邊種肉？醬汁要用邊款醬汁？全部都交畀店舖自由發揮！
雖然「BORUGA飯」嘅發源地和誕生店舖等資訊至今仍然不明，但呢款料理喺當地經已有超過30年歷史。而名稱由來，有人話係同俄羅斯有關（因為有一款名為「BORUGA」嘅俄羅斯料理，同樣使用雞蛋作為食材），亦有人話係同意大利有關（因為類似意大利嘅博爾扎納地區嘅食物），係一款充滿謎團，樣貌千變萬化兼令人充滿期待嘅美食呢。
関連記事
Comments