【食譜影片】重現日本鄉土料理系列⑬福井縣：美味又健康嘅「Bokkake」(ぼっかけ)

福井縣有多個充滿歷史和大自然魅力嘅好地方。當中，福井縣嘅鄉土料理「Bokkake」（ぼっかけ），無論係食法抑或係材料都非常特別，唔同地區嘅組合變化亦會有所不同，深受當地人喜愛。今次，小編要為大家介紹一個由當地傳統美味變化而成嘅「Bokkake」丼飯食譜，下次不妨跟住以下食譜，試吓親手整啦。

日本鄉土料理係？

鄉土料理係指活用各地區嘅當地特產，結合當地風土民情所烹煮出來，並經過長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。

關於「Bokkake」

福井縣嘅「Bokkake」（ぼっかけ），係一道擁有超過100年歷史嘅當地美食，以豐富嘅蔬菜和蒟蒻絲等食材，搭配上熱騰騰嘅湯汁，淋喺啱啱煮好嘅熱騰騰白飯上享用，為其特徵之一。

至於「Bokkake」呢個菜式名稱嘅由來則眾說紛紜，其中一個講法係因為「享用時，要將熱湯汁淋（日語ぶっかけ（ぼっかけ））於飯上」而得名「Bokkake（ぼっかけ）」，另外仲有傳話係因為當地方言「Bokkake」（ぼっかけ）代表著「追趕」嘅意思，因為呢道料理好味到令客人們食得津津有味，唔想離開，所以被譽為可以「追趕上客人」，令客人們忍唔住留低品嚐嘅料理，因而得名「Bokkake」。

實際上，根據唔同地區，食材和調味亦會有所不同，甚至會唔同到就咁望嘅話，根本就會覺得係完全唔同嘅料理！以勝山市為例，當地嘅「Bokkake」會淋上加入紅色魚板和三葉菜嘅高湯，並搭配山葵和紫菜享用嘅茶漬飯風格「Bokkake」。無論係咩風格都好，呢道料理除咗可以當正餐之外，仲非常適合送酒享用呢。

如果你想品嚐一下福井縣美味嘅飲食文化，不妨試試跟住以下食譜親手整呢個由「Bokkake」變化而成，簡單又健康嘅「Bokkake丼飯」吧！

食譜影片請參考（附有CC字幕）👇👇👇

「Bokkake丼飯」材料（2人份）

• 油豆腐1/2塊
• 牛蒡 1根
• 紅蘿蔔 1/2根
• 舞茸菇 1/2包
• 蒟蒻絲 1/4袋
• 柴魚片 1/2杯
• 水 約3杯
• 醬油 適量
• 麻油 1茶匙
• 芝麻 適量
• 蔥 適量
• 雞蛋 1個
• 白飯 2人份

「Bokkake丼飯」嘅製作方法

1. 將麻油倒入平底鍋中加熱，加入已切絲嘅紅蘿蔔和牛蒡、分成一小塊一小塊嘅舞茸菇、切成一口大小嘅油豆腐和適當大小嘅蒟蒻絲，翻炒。
   
2. 當食材炒熟後，加入水、醬油和柴魚片。
3. 用細火烹煮約10分鐘。
4. 將雞蛋攪拌均勻，倒入平底鍋中。
5. 當雞蛋熟透時，放上經已裝好白飯嘅碗上，然後倒入烹煮好嘅配料。
6. 按個人喜好，可以加入芝麻、蔥等食材，即大功告成！