© Biwako Visitors Bureau
滋賀縣擁有日本國寶兼日本現存12天守之一嘅「彥根城」。不過，對於唔少日本城堡愛好者嚟講，擁有僅存城跡嘅「安土城」更值得一睹其風采，理由無他，因為呢度係日本第一座高層天守閣嘅誕生地，亦係開啟近世石造城郭世代嘅重要城堡，更加係一座由無人不知、無人不曉嘅「織田信長」所打造嘅幻之名城。
安土城築城者「織田信長」
戰國三英傑之一，喺日本戰國人物中人氣屹立不倒，長年獲得冠軍嘅「織田信長」，係當時集實力、權力、名聲於一身嘅頭號人物，不過喺勢力版圖即將拓展至日本中國地區與越後地區時，卻遭遇「本能寺之變」，選擇於大火中自盡，但屍首至今仍未被尋獲，令遺體去向成為歷史謎題，甚至有織田信長嘅愛好者相信，織田信長當初其實係無死到，只係順利逃脫。
織田信長49年嘅生平中，與其相關嘅日本城堡數量雖然唔多，但由織田信長開始築石垣、裝飾城郭、打造天守，後世對日本城嘅既定印象，都係出自於呢位戰國梟雄之手。
織田信長統一天下的據點「安土城」
1576年，作為一統天下據點與織田信長嘅居城，安土城開始動工，由丹羽長秀負責監工，築城地點係滋賀縣琵琶湖東岸嘅「安土山」山頂（現滋賀縣近江八幡市），當時嘅織田信長，與越後國 (現新潟縣一帶)嘅上杉謙信處於敵對關係，為準備進軍越後以及加快統一天下嘅腳步，選擇正好位於京都與越後間嘅安土築城。皆因安土唔單止方便移動，加上北臨琵琶湖佔盡水利，因此織田信長選擇喺度築城。
集大成的築城技術
花費約三年時間，呢座打破過往城堡概念，嶄新嘅日本城——安土城築城完畢。
首先，安土城係日本歷史上第一個擁有高層天守（安土城天守亦會寫作「天主」，日文中兩者讀法同音）嘅日本城，其高度有32米，與日本現存最高天守嘅姬路城天守幾乎相同，加上位於安土山高199米嘅山頂，氣勢更顯非凡。
除咗高度驚人，天守外觀亦令人嘆為觀止。安土城嘅天守構造為「5層7階」，即外觀望落係5層，實際內部分為7層，外觀1至3層係黑色，第4層係朱紅色，第5層則內外皆為金箔加身，並以墨繪裝飾，各層屋瓦顏色包括紅色、藍色、金箔等，望樓為紅色八角形。喺當時嘅日本，咁華麗嘅城堡設計係絕無僅有，更被譽為建築技術和藝術嘅集大成頂峰之作，就連當時到此拜訪嘅歐洲傳教士亦驚呼「就連歐洲都無咁壯觀嘅建築。」
另一個重點係圍繞城郭嘅石垣，安土城係日本古城史上首次出現高達10米嘅石垣牆，從正面門口大手門到山頂天守、本丸嘅道路「大手道」皆由石垣打造而成。呢種運用大量石材造城嘅相關概念，係過去以土城為主嘅中世城郭時代中不存在嘅建城方法，因此安土城被視為近世城郭建築嘅典範。
充滿謎團的安土城
安土城係當時吸引眾人目光嘅建築，甚至有相關記錄記載，安土城開放付費參觀，無論係大名抑或係平民都興致勃勃地去參觀，可以稱得上係當時嘅遊樂場或博物館呢。
然而，呢座集大成嘅城郭代表作，僅存在世上短短6年，隨著1582年織田信長喺本能寺遇刺身亡後，安土城亦因不明原因嘅火災而消失，只留低安土山上嘅遺址供後人想像。安土城就好似織田信長之死一樣，至今仍然充滿著謎團。
前往近江八幡市內了解更多安土城歷史
作為對後世城郭產生深遠影響嘅「安土城」，現名列為「日本100名城」之一。即使昔日嘅宏偉建築經已不再存在，但因其與織田信長有著密切關係與自身傳奇色彩，仍然吸引唔少人嚟參觀喔。喺位於近江八幡市嘅安土城郭資料館、滋賀縣立安土城考古博物館、安土城天主 信長之館（上圖）等設施中，都有豐富安土城相關史料，甚至有華麗天守部分復原模型，值得一遊。
安土城
- 地址：滋賀縣近江八幡市安土町下豐浦
- 開放時間：8:30～16:00（最終入場時間為16:00) ※ 依季節而有所變動
- 費用：成人700日圓、小童200日圓（安土山入山費）
- 交通：JR琵琶湖線「安土站」乘搭的士約7分鐘
安土城郭資料館
- 地址：滋賀縣近江八幡市安土町小中700
- 開放時間：9:00～17:00（最終入館時間為16:30)
- 定休日：每個星期一、年初年始
- 費用：成人200日圓、學生150日圓、小童100日圓
- 交通：JR琵琶湖線「安土站」步行約1分鐘
滋賀縣立安土城考古學博物館
- 地址：滋賀縣近江八幡市安土町下豐浦6678
- 開放時間：9:00～17:00（最終入館時間為16:30)
- 定休日：每個星期一（星期一為公眾假日時開館，隔日休息）、12月28日至1月4日
- 費用：大人500日圓、大學生高中生320日圓、中學生以下免費
- 交通：JR琵琶湖線「安土站」乘搭往「文藝之鄉」方向近江八幡市民巴士約14分鐘
安土城天主 信長之館
- 地址：滋賀縣近江八幡市安土町桑實寺800
- 開放時間：9:00～17:00（最終入館時間為16:30)
- 定休日：每個星期一（星期一為公眾假日時開館，隔日休息、12月28日至1月4日
- 費用：成人610日圓、高中生以上學生350日圓、中學生以下170日圓
- 交通：JR琵琶湖線「安土站」步行約25分鐘，或乘搭的士約5分鐘
Comments