福井縣位於日本中央位置嘅中部地區，面向日本海，除咗有日本屈指可數嘅螃蟹卸貨漁港，更加係以擁有多間螃蟹料理名店嘅縣而廣為人知。無論係「越前蟹」（福井產嘅雄性松葉蟹）、「香箱蟹」（福井產嘅雌性松葉蟹）、抑或係「水蟹」（脫殼半年以內嘅福井產雄性松葉蟹），都係去福井旅行時必食嘅美食。
今次會以「越前蟹」為主，從螃蟹基本情報，到可以嘆到當造螃蟹料理嘅精選旅遊景點等資訊，都會為大家進行徹底式報導！
福井縣引以為傲嘅優秀食材「越前蟹」係？
「越前蟹」其實係指喺福井縣嘅越前町越前漁港、阪井市三國港、敦賀市敦賀港、小濱市小濱港，4個港口捕獲嘅雄性松葉蟹，作為全國松葉蟹中嘅頂級蟹品牌而聞名，亦係唯一會進獻皇室嘅最高級品種。其特徵係擁有好似樹枝一樣嘅細長蟹腳，生活喺日本海嘅巨浪和嚴寒中培育出嘅蟹身，其肉身厚之餘仲甜得恰到好處，蟹蓋入面仲藏有大量嘅濃厚蟹膏添。
當中，越前町係福井縣內4個港口中越前蟹卸貨量最多，因為距離漁場非常近，所以新鮮嘅越前蟹可以大量流通。旅館、民宿、鮮魚店、餐廳等，提供越前蟹料理嘅店舖有成70幾間。喺縣內嘅飲食店可以品嚐到水煮蟹、烤蟹、螃蟹刺身、螃蟹火鍋等，各種烹調方式嘅蟹料理。
點睇福井縣「越前蟹」靚唔靚？
睇「越前蟹」好唔好味有兩個要點：第一個係蟹殼上要有黑色點點。呢啲黑色點點其實係一種名叫蟹蛭嘅卵，依附得越多，就意味著距離上一次脱皮時間越長，蟹身亦會因此變得更肥美。另一個係要有大蟹鉗，皆因每次脫皮後蟹鉗都會變大，係經歷過歲月成長嘅證明。
當中，2015年登場嘅新品牌「極（きわみ）」更被稱譽為味覺最高峰兼極大Size（尺寸）嘅越前蟹。只有蟹殼為14.5厘米以上，（卸貨時）重1.5公斤以上，蟹鉗闊3厘米以上嘅雄性松葉蟹，先至可以被認定為「極」級越前蟹。全年只有0.05%嘅捕獲量可以達到呢個「極」級標準規格，正因為超級珍貴罕有，2022年曾出現拍賣價為1隻310萬日圓嘅高昂價格喔！
另外，福井縣內所捕獲嘅所有越前蟹都掛上刻有品牌名和捕獲漁港嘅黃色標籤。呢個掛喺蟹腳嘅標籤牌係為咗證明此越前蟹為「福井縣產」。另外，越前蟹從2018年開始被登記為「地理標誌（GI）保護制度（*1）」，產地證明嘅黃色標籤上附有「GI標誌」。可以稱得上係被國家評估為高品質嘅螃蟹。
*1：農林水產省正在推動將具有日本各地域環境和傳統等特徵嘅地域產品，作為知識財產保護嘅制度。截至2022年10月，福井縣包括越前蟹在內，共註冊5種產品。
福井縣「越前蟹」解禁日係幾時？當造時期又係幾時？
福井縣雖然有餐廳不分季節、全年提供美味嘅越前蟹料理畀大家品嚐，但如果想要嘆返隻當造嘅螃蟹，推薦於冬季前往。越前每年11月6日係捕撈解禁日，捕撈期一直到第二年嘅3月結束。喺捕撈期即將結束嘅1月至2月左右，螃蟹正好儲存著大量脂肪，亦係最美味嘅時期。但係有一點要注意，就係解禁後和年末年始時期價位會變高，如果想品嚐價格實惠嘅越前蟹，推薦11月中下旬，或第二年2月左右，捕撈期即將結束嘅時期前往。
福井縣可以品嚐到越前蟹嘅精選旅遊景點3選
越前蟹可以喺福井縣內嘅酒店、旅館、食肆等各種地方品嚐得到。以下落嚟，會為大家介紹喺福井縣可以品嚐到越前蟹嘅3個經典旅遊景點。
福井縣越前町「越前蟹博物館」：冬天螃蟹自助餐&了解越前蟹嘅體驗設施！
「越前蟹博物館」係一個可以邊玩邊學習，了解越前蟹和日本海神秘一面嘅體驗型設施。小編非常推薦想一家大細一去福井旅遊嘅讀者朋友們前往喔。擁有300米深海全景劇場，重現漁船操作嘅模擬器，以及佔一整面牆壁嘅虛擬水槽等，讓人置身於非日常體驗中，大人小朋友都可以玩到不亦樂乎。喺越前蟹嘅生態研究室內，可以參觀到罕見嘅越前蟹研究風景！博物館2樓嘅「食堂Uoichi」 （お食事処うおいち），提供包括越前蟹嘅冬季限定海鮮自助餐，並相當受歡迎。
另一方面，行1分鐘即可抵達博物館對面嘅海鮮市場「道之驛Echizen Uoichi」（道の駅えちぜん うおいち）。除咗有賣喺越前港口捕獲嘅新鮮魚貝類之外，仲可以購買當地獨有特產。越前蟹當造季節時，亦有販售最高級品牌越前蟹嘅「極」。每年11月都會舉辦福井縣最大型嘅螃蟹祭典「越前蟹祭（*2）」，當中會提供即賣越前蟹，和海鮮美食外賣等等。
*2：2020年～2022年改為早市風格嘅「越前蟹朝市」。
越前蟹博物館
- 地址：福井縣丹生郡越前町廚71-324-1
- 營業時間：09:00-17:00
- 定休日：第2、第4個星期二（11月至3月，暑假期間無休）
- 入場費用：成人500日圓，小童300日圓
- 交通：福井鐵路「神明站」落車後，乘坐福鐵巴士（鯖浦線）約80分鐘，喺「道之驛『越前』」巴士站落車後即可抵達
- 官方網站：https://www.echizenkk.jp/kanimuseum
福井縣敦賀市「日本海魚街」：螃蟹海鮮丼飯&回轉壽司極受歡迎嘅海鮮市場
「日本海魚街」（日本海さかな街）集結賣越前蟹嘅專門店，以及提供海鮮丼飯、回轉壽司和螃蟹料理飲食店等45家店鋪（截止2022年7月）嘅敦賀市海鮮市場。正因為係日本海一側最大型嘅海鮮市場，所以無論係蝦、蟹，貝殼類、魚類等，由敦賀港口直送嘅新鮮海產排行成列任君選擇，仲有魚漿製品和珍味小食等水產加工食品可供選購。
市場內除咗遊客之外，當地人亦經常特地前往選購。因為場內充斥著聲勢浩瀚嘅叫喊聲，可以享受一個充滿活力兼日本特有嘅市場體驗。店員亦好樂意話畀大家知點樣揀美味靚蟹，以及更滋味嘅食法。如果想了解更多有關螃蟹嘅資訊，就一定要問問店內工作人員啦。
日本海魚街
- 地址：福井縣敦賀市若葉町1丁目1531
- 營業時間：平日10:00-17:00、星期六日及假日10:00-17:30
- 定休日：1月1日，其他不定休
- 交通：從JR敦賀站乘坐「Gurutto敦賀周遊巴士」約10分鐘，喺「日本海魚街」巴士站落車即到
- 官方網站：https://www.sakanamachi.info/
福井縣阪井市「東尋坊」：一邊嘆越前蟹午餐一邊眺望絕景吧～
「東尋坊」係位於越前加賀海岸國家公園嘅日本天然紀念物及名勝。被日本海巨浪侵蝕下形成嘅崎嶇峭壁延綿長達1公里，亦被稱為世界三大奇勝之一嘅珍貴之地。喺呢個代表著福井縣嘅旅遊名勝，其實有唔少提供極品越前蟹料理嘅店舖喔！
從東尋坊懸崖延伸開去嘅東尋坊商店街有多間提供海鮮類料理嘅食肆林立。另外，有店舖提供自選烹調服務，顧客們可以從店內水槽中揀選心儀嘅生猛越前蟹，再選擇燒蟹、水煮蟹、螃蟹刺身等各種烹飪法去品嚐螃蟹。
東尋坊
- 地址：福井縣阪井市三國町東尋
- 交通：從越前鐵道「三國站」乘坐京福巴士約10分鐘，從「東尋坊」巴士站徒步即可抵達
福井縣嘅魅力仲未完！想好好準備你下一個日本之旅，就記得睇埋以下有關螃蟹和日本美食嘅相關文章吧！
Comments