日本有著各式各樣嘅酒精類飲品專門店。例如有日本酒同「Craft Beer」（クラフトビール）等嘅專門店，低酒精、無酒精Cocktail嘅店舖，獨特嘅「Kahlua Milk」（カルーアミルク）專門店等⋯ 今次小編從多個專門店中，決定走入梅酒最大製造商「CHOYA株式會社」所開嘅「The CHOYA銀座BAR」進行實地採訪。究竟喺年輕一代中極受歡迎，位於高級地段銀座嘅梅酒雞尾酒（Cocktail）專門店有咩咁吸引人嘅魅力？即刻跟著小編揭開當中嘅神秘面紗！
※未滿十八歲者，禁止飲酒。酒後駕駛屬刑事罪行。妊娠中和哺乳期間飲酒會對胎兒、嬰幼兒發育帶來不良影響。
梅酒究竟係咩酒？
於2月初至3月初盛開嘅「梅花」，比櫻花更加早讓人感受到春天嘅到來。日本會用梅花嘅果實，製成梅乾等各種加工品。將5月尾至6月尾於市場流通嘅青梅、完熟梅，浸泡於蒸餾酒（一般為白酒、燒酒、白蘭地）中，所製成嘅酒精飲品，就係梅酒。
梅酒究竟係由幾時開始，被眾人所喜愛？雖然並無留下相關確實嘅記錄，但於300多年前1697年所撰寫名為「本朝食鑑」嘅文獻中，經已記載著「梅酒」嘅食譜。當時，砂糖係非常珍貴嘅高級品，所以被認為能夠飲用梅酒嘅人數非常有限，但隨著時代發展，「梅乾」、「梅酒」等有關於梅果實嘅加工文化就著實成形。另外，江戶時代後期嘅書籍中，有記載著「關於種植梅花提高農民利益」嘅項目，從而得知，當時已將梅花栽培與製作其加工品，作為推動副業嘅方向。由此可見，日本自300多年前，有關於梅果實加工、梅酒等文化經已成形。
梅酒最大製造商「CHOYA」所開嘅首間梅酒Cocktail專門店「The CHOYA銀座BAR」
梅酒最大製造「CHOYA」為咗令大家可以享受喺日本自古以來就被喜愛嘅梅酒，其各種不同飲法與料理，而喺銀座5丁目開設「The CHOYA銀座BAR」。
地理位置係從銀座四丁目嘅十字路口，進入一條小路後所見到嘅大廈7F。搭𨋢上到去，既瀟灑又時尚嘅櫥窗，就出現喺小編眼前！明明係位於華麗嘅銀座中心區域，卻營造出一股隱世酒吧嘅氛圍。
店內檯面與外面櫥窗一樣，亦係以書架為主題，店內彷似海外舊圖書館與貴族館中嘅書房一樣。 充滿厚重、沉穩嘅氛圍，果然係屬於大人嘅隱世酒吧喔！
銀座呢個地理位置，有著成熟隱世氛圍嘅內部裝修，驟眼一望好似甚有距離難以捉摸咁。但其實使用「The CHOYA」梅酒所調配嘅Cocktail種類豐富，包括無酒精飲料在內，種類有成100種以上，亦有下午茶與甜品等選擇，連女士們都可以好好享受，係店舖嘅特徵之一。因此，亦成為唔少年輕女性聚會、或約會時嘅地點喔。
梅酒Cocktail、啤酒、Chuhai、邊飲邊比較組合為你逐一介紹！多款獨特又易入口嘅飲品餐單推介！
「The CHOYA銀座BAR」嘅魅力之一係，擁有豐富嘅酒精飲品選擇。除咗有將「The CHOYA Single Year」、梅糖漿、「Sonic Water」等混合，放上浮起嘅「Frozen梅」所調配而成嘅「The CHOYA Sonic」等「Long Cocktail」。亦會有與梅糖漿以及芒果汁混合而成嘅香甜「Golden Rod」等「Short Cocktail」。雖然同樣係梅酒Cocktail，但各自搭配嘅食材組合與味道可謂層出不窮。
於「The CHOYA SINGLE YEAR」中加入「Crème de Cassis」同氣泡酒（Sparkling Wine）嘅「The CHOYA Royal」，充滿著碳酸嘅清爽口味，非常適合作為慶祝場合、特別日子嘅第一杯飲品！
另外，除咗會有提供好幾款唔同嘅梅酒組合，等您可以邊飲邊比較一番之外，仲會有「Highball」（ハイボール）、「檸檬Sour」（レモンサワー）、啤酒等與梅酒相關嘅餐單，望著咁多款有別於一般居酒屋、酒吧嘅陣容，真係令人未飲先興奮。
梅酒嘅一般飲法一直都大概只有加冰塊嘅「Rock」（ロック）、加梳打水（ソーダ割り）、加水（水割り）等調配方法，想擴大梅酒嘅無限性，令更多人可以享受梅酒嘅好滋味，所以衍生出多種創意梅酒飲法。
從適合梅酒嘅下酒菜到主菜、飯類、甜品！享用埋絕配飲品嘅料理餐單
唔單止係飲品餐單，連料理、甜品等亦有使用梅醬、梅調味醬汁。另外，連料理秘方亦用上梅酒，可以話係呢間酒吧嘅特徵之一。
「梅酒風味鯖魚炊飯 配燻製梅」（梅酒風味の鯖炊き込みご飯 燻製梅添え）嘅米飯帶有梅酒風味與香味，搭配上充滿油脂嘅鯖魚，享用時將兩者相混合從而品嚐箇中滋味，係一道極具人氣嘅菜式。如果想以品嚐美酒為主嘅話，則推薦「UME Full Plate 5種」（UMEづくしプレート 5種），當中有加入梅酒製作嘅「梅酒芝士忌廉最中」（梅酒入りチーズホイップ最中）、燻製梅、「四元豬煙燻肉片」（四元豚パストラミ）等5種下酒菜。
梅酒中除咗有從梅花中提取嘅檸檬酸之外，仲含有維他命B2、維他命B6、鉀、苦味酸、多酚等，具有防止粉刺、皮膚粗糙等「殺菌作用」，亦具有抗衰老「抗氧化作用」 。據說，亦有效於「恢復疲勞」、「改善免疫功能」喔。好味道之餘仲具有健康兼養顏功效，梅酒真係一舉幾得嘅好選擇！另外，「The CHOYA 銀座BAR」根據不同飲品與料理，會分別選用梅乾、醃漬於梅酒中嘅梅、完熟梅等選用適合嘅梅喔。料理中所使用嘅梅，其鹽分濃度唔會太高，所以就算唔太鍾意梅酸味嘅人，都可以好好享用喔。
「The CHOYA 銀座BAR」嘅下午茶亦相當受歡迎。特別係搭配上「至極薰製梅布甸」（至極の薫製梅ぷりん）嘅「Afternoon Tea Course」。除咗有咖啡紅茶之外，亦有提供超過50種使用「The CHOYA」所調製而成嘅「梅酒Cocktail」，超過20種「無酒精Cocktail」等總共超過100種嘅飲品嘅任飲150分鐘嘅放題喔。另外，「至極薰製梅布甸」送餐前會放喺圓頂玻璃容器中，保持薰製狀態，讓人可以享受得到唔會太甜，恰到好處嘅成熟好味道。
另一個人氣料理之選係附上「梅酒Cocktail Cream Soda」嘅下午茶套餐。另外，亦有提供「梅酒Cocktail Cream Soda」嘅單品，有機會可以試一試喔。
※甜品為2022年12月採訪當時資訊。甜品內容會根據不同季節而有所改變。
景點資訊
- 名稱：The CHOYA 銀座 BAR
- 地址：東京都中央区銀座5-6-5 NOCO大廈7F
- 交通：從地下鐵丸之內線銀座站徒歩1分鐘
- 營業時間：【週一至週五】16:00-22:00（L.O. 21:30） ,【星期六、日、假日】13:00-22:00（L.O. 21:30）
- 官網：https://www.choya.co.jp/the-choya-ginza-bar/
※未滿十八歲者，禁止飲酒。酒後駕駛屬刑事罪行。妊娠中和哺乳期間飲酒會對胎兒、嬰幼兒發育帶來不良影響。
Comments