「盛岡炸醬麵」係岩手縣盛岡市嘅日本鄉土料理之一，與盛岡冷麵、盛岡碗子蕎麥麵並列為「盛岡三大麵」。「盛岡炸醬麵」嘅製作食材，一般以肉類為主，但今次嘅食譜希望素食者都可以大飽口福，改成無肉類素食版，別有一番風味。不妨跟著以下食譜，挑戰一下自家製素食版「盛岡炸醬麵」啦。
日本鄉土料理即係？
鄉土料理係指活用各地區嘅當地特產，結合當地風土民情所烹煮出，長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。
「盛岡炸醬麵」嘅起源
其實「盛岡炸醬麵」係起源於中國嘅家庭料理「炸醬麵」，係一款使用盛岡當地食材，去重現「炸醬麵」嘅麵食。
戰前，有一位居住喺當時滿洲（即現今中國東北地區）嘅日本男性，於戰後返回日本之後，喺盛岡開始經營以曾經喺滿洲食過嘅「炸醬麵」為主嘅麵食屋台（路邊攤檔）。當初，呢位「盛岡炸醬麵」元祖店嘅老闆係經營餃子屋台，於昭和28年（1953年）左右，以殘餘嘅餃子皮製作麵條，放上肉醬和其他食材製作出「盛岡炸醬麵」進行販售。並使用日本食材，將味道改成乎合盛岡人嘅口味，「盛岡炸醬麵」亦隨之誕生。
另外，呢間由屋台開始發展至今，「盛岡炸醬麵」元祖發源店——盛岡冷麵店「白龍」，現時係盛岡市民無人不知嘅著名店舖喔！
「盛岡炸醬麵」嘅特徴
「盛岡炸醬麵」係一款喺煮好嘅麵條、烏冬上放上肉醬、青瓜、葱等食材，根據個人喜好加入生薑、蒜頭、醋、辣油等調味料，所製成嘅麵食，係岩手縣盛岡地區嘅鄉土料理之一。
有別於一般嘅「炸醬麵」，「盛岡炸醬麵」係使用扁平烏冬等麵條，然後加入炒好嘅「肉味噌」（味噌肉燥）、心儀嘅調味料去嚟製作。將「肉味噌」等食材，與調味料攪拌均勻，連麵條一齊享用係其重點之一，總之要攪拌均勻，先至稱得上係「盛岡炸醬麵」嘅正確食法喔。
素食版「盛岡炸醬麵」材料（2人份）
- 烏冬 2人份
- 青瓜 1/2條
- 長葱 1/4條
- 冬菇 50g
- 水煮竹筍 50g
- 洋葱 50g（約1/4個）
- 生薑 6g（約1/2個）
- 麻油 5g（約1茶匙）
「混合調味料」嘅材料：
- 蒜泥 7g（約1/2瓣）
- 豆瓣醬 1g（約1/4茶匙）
- 甜麵醬 1又1/2湯匙
- 酒 1又1/2湯匙
- 白芝麻 1/2湯匙
- 醬油 1湯匙
- 片栗粉（薯仔澱粉） 1/2茶匙
- 水50ml
素食版「盛岡炸醬麵」嘅製作方法
食譜影片請參考👇👇👇
- 將青瓜切成細絲。從長葱嘅葱白部分落刀切到葱芯處，取出葱芯。葱白部分切成細絲，放入水中備用，葱芯則切成碎末。
- 將洋葱、竹筍切成碎粒。
- 將生薑切成碎末。
- 冬菇去蒂，切成碎粒。
- 將「混合調味料」嘅材料倒入同一容器中攪拌均勻。
- 中火加熱煮食鍋。
- 落麻油。
- 炒熱薑與葱芯粒。
- 炒至聞到香氣後加入洋蔥粒。
- 加入冬菇粒。
- 冬菇粒炒至變軟身後，加入竹筍粒繼續炒。
- 倒入「混合調味料」。
- 烹煮一段時間，把水份煮乾，讓醬汁煮至濃稠狀呈「收汁」狀態。
- 烏冬煮熟後，放入冰水「過冷河」，然後瀝乾水份。
- 將烏冬放入準備好嘅碗裡面，再放上＃13 ，即大功告成。
Comments