唔知各位男士們係咪都有同感，要整個靚髮型其實難度好高？
FUN！JAPAN嘅亂入先生亦係經常為髮型而煩惱嘅男士之一（亦有發生過因為疫情影響，有一段時間無去髮型屋剪頭髮，亂入先生當時嘅髮型就好似雪人一樣，超級長！更引起公司內一陣騷動嘅小插曲喔）。就算有理想中嘅髮型，如果無法以言語百分百表達想要嘅髮型設計嘅話，亦有機會發生不堪入目嘅後果……總括而言，將理想中嘅髮型圖片，直接交畀負責嘅髮型師參考就肯定係最安全。
相信唔少讀者都覺得日本人對於自己嘅髮型相當講究。因此只要模仿日本流行髮型，或許瞬間就可以化身成日系型男喔。如果你正在為髮型煩惱嘅話，呢篇「日本美容師親身分享 2022年人氣日系男士髮型」嘅文章，就一定要睇到最尾啦！
日本髮型師親授！2022年最新日系男士髮型
鍾意日本文化嘅各位讀者，除咗會留意日本旅遊資訊之外，仲應該會網羅最新嘅流行服飾、妝容、髮型等資訊？ （木村拓哉、佐藤健、菅田將暉…相信唔少男士們，都有參考過心儀演員嘅流行服飾與髮型吧？）
今次，就由現役日本髮型師岩本桂彌（左）和後藤愛夏（右）親身講解，現時日本流行嘅男士髮型趨勢，從王道至流行趨勢髮型都會圖文並茂逐一介紹。
只要睇完呢篇文章，相信你都可以擁有一個不失敗嘅日系髮型！
日系男士髮型①：蘑菇風格
毫不造作蘑菇頭
因為與「蘑菇（Mushroom/Ma-sshu-ru-mu）」嘅圓形輪廓相似，所以被稱為「蘑菇頭」嘅日系王道髮型。加上比起其他髮型，「蘑菇頭」適合任何面型，因此備受日本國民歡迎。
岩本桂彌與後藤愛夏兩位日本髮型師亦有提到，自然不造作嘅「蘑菇頭」髮型，係最多客人order要剪嘅人氣No.1男士髮型喔。
「使用光澤系嘅髮蠟塑造出帶點性感嘅造型。稍微望得見後頸毛髮為其特徴。」
「蘑菇頭風格髮型，即使係初學者都可以輕易上手，所以非常推薦畀大家。無需使用任何夾、捲髮棒，用髮蠟簡單撥幾撥即可完成造型！」
日系男士髮型②：短髮
各位居港讀者如果覺得蘑菇頭有少少悶熱嘅話，不妨參考以下所推介，清凉感十足嘅短髮髮型喔。
短髪「Reverse Up Bang」
「短髮造型透過Reverse（*1）方式，加上電髮棒塑造出富動感嘅髮型風格。」通過往上推讓頭髮豎立，營造出立體感，亦能令頭形更出色有型。
*「Reverse Up Bang」為和製英語。
*1：將頭髮，向自然生長嘅相反方向抓撥整理
日系男士髮型③「Tarachan」頭
對於偏好短髮嘅男士，我想再推薦一個名為「Tarachan」嘅髮型。
「Tarachan」頭
「Tarachan」係長谷川町子所創作嘅日本漫畫《海螺小姐》中登場嘅3歲男童「河豚田鱈男」（フグ田タラオ）嘅暱稱。側面、背部為Two Block（*2），有如「Tarachan」般可愛嘅清爽短髮。
「短髮都可以塑造出放下頭髮嘅風格，為咗令整體髮量望落較為緊貼唔會過多，只於髮尾稍微向外捲！」
*2：Two Block為和製英語，係指由上下兩種不同長度嘅頭髮，組合構成嘅髮型設計。上面係從頭頂到耳朵上方保留較長嘅頭髮髮量，下面係指兩側、鬢角、後頸等毛髮削短，以上面嘅較長部分頭髮，遮蓋住下面嘅短髮髮型
日系男士髮型④：中分髮型
近幾年受韓流影響，K-POP偶像嘅中分髮型，於日本亦大受歡迎。據聞受歡迎嘅理由，除咗因為喺疫情期間，由於半塊面都被口罩遮蓋住，再加上劉海嘅話，就連半塊面都睇唔見之外，亦有部分人係經已厭倦長年不變嘅蘑菇頭風格，想轉換一下新髮型。
自然中分髮型
「呈現出輕盈感嘅自然中分髮型。髮型嘅重點係使用電髮棒時，要注意避免過度移動。」
Reverse中分髮型
將頭髮，向自然生長嘅相反方向抓撥嘅中分髮型。「通過改善劉海嘅立體感，塑造出富有彈性感，且帶畀人一種較輕盈不沉重嘅印象。要將前面劉海，稍微拉開調整喔！」
韓式中分髮型
「將頭髮向自然生長嘅相反方向抓撥整理，髮型望落會比較立體。」
逗號瀏海頭
顧名思義，將瀏海塑造成如逗號一樣嘅韓式髮型。現時，唔單止於年輕男士之間燃起熱潮，近年來亦備受女士喜愛，成為備受矚目嘅女士髮型之一。
「其特徵為即使係一個擁有光澤感嘅髮型，亦帶畀人富有彈性！更加係一個令人感到性感嘅髮型風格！」後藤小姐話order呢個髮型嘅客人，同蘑菇頭一樣咁多喔。
韓式逗號瀏海頭
「將劉海嘅髮尾位置調整至眼睛與鼻子之間，瞬間塑造出韓系髮型風格。」
唔知各位男士們，搵到自己鍾意嘅髮型未呢？
各位男士們，睇完以上介紹之後有咩感想呢？
除咗上述所介紹嘅髮型之外，岩本先生、後藤小姐兩位髮型師，每日都會喺Instagram、TikTok上分享各種資訊，如果有興趣嘅話記得Follow佢哋啦。（如果有讀者對亂入先生大改造企劃有興趣嘅話，記得留言話畀小編知！小編會借助專業人士嘅力量，將亂入先生進行型男大改造！）
【岩本桂彌’s Profile】
活躍於東京新宿、福岡兩個地方嘅Freelance專業髮型師。根據「日本髮型師・髮型屋綜合媒體」讀者們所評選嘅「髮型師排行榜2021」，岩本先生更獲得全國第10名嘅榮譽。截至2022年9月，Instagram粉絲人數為14萬人。
- Instagram: @keiya_iwamoto
- TikTok: keiya__iwamoto
【後藤愛夏’s Profile】
岩本桂彌嘅專屬助手。從女性角度出發，擅長塑造受女性歡迎嘅男士髮型。
- Instagram: @ma_na_ka_819
- TikTok: manaka_819
Comments