日本人引以為傲嘅靈魂食物「飯糰」，唔單止攜帶方便，更加係日本人最熟悉嘅傳統食物之一。話明係「飯」糰，主要食材當然係米飯吧？
不過，日本最近成為人氣熱話嘅飯糰並非以米飯為主要食材，竟然係以燕麥片代替米飯捏成「燕麥片飯糰」，近期「燕麥片飯糰」可謂席捲日本各大社交媒體喔！
燕麥片含有豐富的膳食纖維，醣類含量亦比白米低，有助維持均衡營養飲食。再加上，唔使特登煲飯，只需用微波爐叮幾叮即可完成，夠晒簡單！重點係簡單得嚟又好味，令人毫無抵抗地將「燕麥片飯糰」吸納到日常飲食當中。今次小編要為大家介紹嘅係「毛豆燕麥片飯糰」食譜，簡單好味又易整，下次不妨跟住以下食譜，捏返個毛豆燕麥片飯糰啦！
喺介紹食譜之前，首先了解一下「燕麥片」本尊究竟係何方神聖，以及當中所含嘅營養價值。介紹完畢後，除咗會有文字食譜記載，仲會有附上字幕嘅食譜影片，記得睇完之後，試試落手整啦！
燕麥片係？
燕麥片係由燕麥等穀物，所加工而成嘅方便食用食品。雖然與普通大米同樣為穀物類，但係醣類含量比普通大米來得低，而且並不進行精白程序，保留外皮進行加工，因此含有豐富嘅膳食纖維和營養價值。
燕麥片嘅營養成份
燕麥片除咗富含鈣、鐵等礦物質，仲富含維他命E、維他命B1等維他命。更含有高於精米約20倍、糙米約3.5倍嘅膳食纖維，並具有降低膽固醇嘅功效。
燕麥片嘅相關介紹就到此為止，即刻去睇睇「毛豆燕麥片飯糰」嘅製作方法吧！
食譜影片請參考（附有CC字幕）👇👇👇
「毛豆燕麥片飯糰」材料（１個）
- 燕麥片 40g
- 水 70ml
- 加熱過嘅毛豆 適量
- 葱花 適量
- 白芝麻 適量
- 鹽 一小撮
- 雞粉 半茶匙
- 麻油 半茶匙
- 紫菜 適量
*配料可以隨意配搭，不妨揀返幾款鍾意嘅食材自由配搭喔。
「毛豆燕麥片飯糰」製作方法
1. 於耐熱容器中，倒入燕麥片和水，輕輕攪拌後以600W微波加熱1分30秒。
2. 於另一個耐熱容器上，放上保鮮膜後，再放上（１）。
3. 放上白芝麻、雞粉、 麻油、加熱過嘅毛豆、葱花、鹽，攪拌均勻。
4. 用保鮮膜包好全體，捏成三角形。
5. 輕輕地卷上紫菜，即大功告成。
Comments