乘搭「寢台列車SUNRISE出雲」，從東京・橫濱出發去島根・出雲吧！

島根縣擁有「出雲大社」、世界遺產「石見銀山」、「松江城」等著名景點。當中，出雲大社所在嘅出雲地區更加係日本首屈一指嘅能量景點，深受國內外遊客歡迎！

本篇文章將會同大家分享，從關東地區出發前往島根縣嘅人氣景點・出雲地區時，推薦乘搭日本唯一定期運行嘅寢台列車（又稱為臥鋪列車）「SUNRISE出雲」。寢台列車最近於女性與背包客群中極具人氣，下次去日本旅遊時，不妨親身體驗乘搭寢台列車嘅樂趣，享受一個非一般嘅旅程吧！

※費用及時間表等相關資訊為截至2022年8月份之情報。

何謂寢台列車「SUNRISE出雲」？

島根縣擁有出雲大社等多個著名旅遊景點，但因為縣內並無新幹線，所以乘搭列車前往嘅話要從岡山縣轉車；搭飛機嘅話，則需要考慮到從機場到旅遊地區時，乘搭公共交通工具嘅所需車程時間（約40分鐘），交通相當不便。因此，於晚上兼可以「瞓」住出發去出雲市站嘅寢台列車，就相當受遊客歡迎！

「SUNRISE出雲」係運行於東京至出雲市站之間嘅寢台特急列車。列車共有14節車廂，由前往高松嘅「SUNRISE瀨戶」7節車廂，與前往山陰地區出雲市嘅「SUNRISE出雲」7節車廂連接而成。東京至岡山區間會以14節車廂行駛，抵達岡山站後列車會於分離成兩段，分別行駛至唔同目的地。

車身以高雅明亮嘅米色與紅色作為配色，車廂內部與住宅製造商共同設計，活用流露溫暖份圍嘅木材質感，設計出富有高級感嘅車廂內部裝修。寢台列車中均採用個室包廂設計，亦設有浴室與觀景一流嘅迷你休息室等設備。

瞓住去出雲市吧！SUNRISE出雲嘅停車站・運行時間係？

從東京站至出雲市站嘅停車站

「SUNRISE出雲」（東京出發）嘅停車站有橫濱站、熱海站、沼津站、富士站、靜岡站、濱松站、姫路站、岡山站、倉敷站、備中高梁站、新見站、米子站、安來站、松江站、宍道站以及出雲市站。遊客可以從東京站以外嘅橫濱站、靜岡站、熱海站上車，亦可以喺出雲市站前嘅松江站中途落車。

從東京站瞓住去出雲地區吧！各站嘅出發與到達時間係？

「SUNRISE出雲」會於新幹線尾班車結束後嘅21:50從東京站出發，第二日朝早06:27抵達岡山站、06:46抵達倉敷站、09:29抵達松江站，再於09:58抵達終點出雲市。朝早抵達當地後馬上就可以開始行程，非常高效率！

「SUNRISE出雲」客房・設備

講到寢台列車與夜行列車，會唔會覺得環境設備拘束、無覺好瞓兼越搭越攰？以上問題您可以唔使擔心！皆因「SUNRISE出雲」提供多個房型，座位種類任君選擇，務求讓乘客可以度過一個舒適夜行列車之旅，車內設備亦相當充實喔。以下即刻跟著小編去睇睇究竟有邊幾種房型（座位種類）～

「SUNRISE出雲」房型（座位）種類

「SUNRISE出雲」分別有「A寢台」、「B寢台」與普通車指定席「座敷席（ノビノビ座席）」等房型，以下落嚟將會介紹「SUNRISE出雲（寢台列車嘅內部裝修與房型等資訊。

「A寢台」 單人獨立房（Single Deluxe）：4・11號車廂

既豪華又係車上唯一嘅Single Deluxe，除咗設有獨立桌椅，仲有提供羽絨被令您更加好瞓，加上地板鋪著地氈，感覺舒適又帶點高級感。雖然房間內並無獨立淋浴間，但會獲得一張淋浴卡用以免費使用淋浴間，裡面有齊酒店浴室梳洗用品歡迎任意使用，簡直就好似住喺酒店一樣，相當舒適。

「B寢台」雙人獨立房（Sunrise Twin）：4・11號車廂下層

可供2人使用嘅獨立房型，擁有既簡約兼不浪費空間嘅設計。即使係2人共處1室，可使用面積亦非常充裕。房間內2張床以並排方式擺放，可與家人朋友邊瞓邊傾，亦係此房型特色之一。

床頭位置設有操作式枕邊燈，帶有鬧鐘功能嘅時鐘、室內燈開關等按鍵面板。另外，由於所有房間均設置於下層位置，所以搖晃程度相對較少，搭起上嚟亦相當舒適。

「B寢台」單人獨立房（Single Twin）：1・2・6・7・8・9・13・14號車廂1樓（非全層、僅限部分房間）

備有輔助式床位，上下格床鋪嘅設計唔單止可以1人使用，就算2個人一齊瞓都無問題。當然，1個人嘅話亦可以將上、下格分開利用，唔需時用到上格床時可以將佢摺疊收納，讓室內空間更廣闊之外，亦可以將下格床分拆並變成簡易梳化，又或者用嚟擺行李都相當方便。按個人喜好選擇要瞓上格定下格，再靈活利用剩餘嘅空間吧！

「B寢台」單人獨立房（Single）-1・2・6・7・8・9・13・14號車廂1樓（非全層、僅限部分房間）

以最小限度配套搭上簡而精設計，如床與床邊嘅檯，床頭嘅控制面板等必要設備嘅單人房。雖然根據列車本身嘅佈局位置，當中會細分成上層類型、下層類型、車邊類型共3種唔同類別，但房間內嘅基本構成配套基本上係一樣。順帶一提，列車過半數嘅獨立房型都係屬於此房型類別喔！

「B寢台」單人獨立房（Solo）：3・10號車廂

Solo係獨立單人房當中最經濟實惠嘅選擇，單人房型分成上層、下層兩種類型，省卻多餘設備、確保最多實用空間，雖然價格比較平，但係因為室內空間較為狹窄兼密集，所以比起其他獨立房型會更易聽到房門嘅開關音等吵雜聲音。如果您對聲音比較敏感又想多少少私人空間嘅話，小編比較推薦「B寢台」單人獨立房型「Single」喔。

「座敷席（ノビノビ座席）」：5・12號車廂

無需另付寢台票價，只需特急指定席費用及車票價錢即可乘搭，因此價格方面可以話係既實惠又吸引。床位猶如簡易床鋪，採用通鋪式設計，分成上、下格，通道一側設有窗簾，但與隔離床位之間並無任何窗簾作遮擋，只有床頭一側設有隱藏隔板，因此無法擁有完整嘅私人空間。整體感覺類似宿舍型「Guest house」或青年旅舍嘅房型構造。

有一點要注意，「座敷席（ノビノビ座席）」與其他房型唔同，只有提供薄被而並無提供枕頭被鋪及酒店備品，如果想要瞓得更舒適，最好自己帶定個充氣枕頭上車喔。另外，無論係上格定下格，都設有地暖設備，就算喺冬天入住都唔怕凍親。

「SUNRISE出雲」獨立房型房間設備用品清單

「B寢台」單人獨立房（Solo）為獨立房型中費用最平，當中房間設備及用品清單如下：

• 床（含床墊被鋪組）
• 電源插座
• 睡衣
• 鬧鐘
• 冷氣機
• 杯
• 衣架
• 拖鞋

「A寢台」 單人獨立房（Single Deluxe）除咗以上物品之外，亦有提供以下物品可供使用。

• 床（羽絨被、床褥組）※所提供嘅被與其他房間唔同，「A寢台」房間所使用嘅係羽絨被
• 洗手間備品（潔面乳、洗頭水、護髮素、刮鬚刀、牙刷、化妝水、護髮素&頭髮精華素、浴帽、棉花棒、橡筋、化妝棉、沐浴露、番梘盒（含番梘）
• 洗面毛巾
• 淋浴卡

 同場加映：列車其他必check設備

淋浴室：3號車廂・10號車廂

除咗「A寢台」 單人獨立房房（Single Deluxe）會免費提供淋浴卡之外，其餘房客都要透過販賣機購買淋浴卡（330日圓）以使用淋浴室。

淋浴室內備有沐浴露及2合1洗頭水，更衣室則備有風筒。請留意，車內並無提供毛巾等販賣服務，記得喺上車前準備好。

迷你休息室：3號車廂・10號車廂

3號車廂與10號車廂內設有迷你休息室，並有設置面向窗外嘅檯櫈，乘客可以在此享受東海道沿線街道及日本中國地方山地嘅連綿山景、日本海或宍道湖等景致。雖然迷你休息室內設有自動販賣機，但就無任何輕食類或便當等食物販售。想買早餐嘅話，就要喺停車時間較長嘅岡山站購買輕食同飲品喇。

「SUNRISE出雲」費用係？可否使用JR PASS乘搭？

可以使用JR PASS，但需另付獨立房間費用

乘搭「SUNRISE出雲」嘅費用，基本上係抵達目的地嘅車票費用＋特急指定席費用＋寢台費用嘅總額。如果您手揸日本旅遊必備嘅JAPAN RAIL PASS（簡稱JR PASS），同時選擇無需另付寢台費用嘅「座敷席（ノビノビ座席）」，則無需另付任何費用即可乘搭。如果想選擇獨立房型嘅話，就要另付寢台費用。

費用一覽表

始果係無使用JR PASS嘅情况下，就需要支付車費＋特急指定席費用＋寢台費用嘅合共金額。例如從東京出發去出雲市並選擇「B寢台」單人獨立房（Single）嘅話，就要畀運費：12,210日圓＋特急券費用：3,300日圓＋寢台費用：7,700日圓＝23,210日圓。

「SUNRISE出雲」購票方法係？

遊客可以喺網站「JRおでかけネット」、JR車站售票機、綠色窗口購買車票，其中最簡單方法係乘車當日喺綠色窗口直接購買車票。不過因為「SUNRISE出雲」太受歡迎，心水座位類型好有可能會出現售罄嘅情況。唔想撲空的話，就要記得起車票、特急券、寢台券等會喺起點站出發日前嘅一個月於早上10點開始於窗口發售，建議决定行程後儘早購買。同時，亦會有旅行社提供相關團體旅行行程，建議可向相關旅行社查詢購買。

寢台列車喺日本已經係買少見少，有機會嘅話記等要親身體驗，享受一個與別不同嘅日本旅程喔！

JR西日本官網

• https://www.westjr.co.jp/global/en/ticket/

相關文章

• 【日本島根】享受最頂級療癒！島根縣必去溫泉地3選＆必住旅館推介
• 【日本美食】嚴選島根縣5大必食當地特色美食！