自從細個睇完《同一屋簷下》後，就一直幻想某一日可以如劇中柏木一家般住喺東京…大家好，我係FUN! JAPAN編輯部小薯員工C。
飯可以唔食、但東京唔可以唔去！相信FUN! JAPAN讀者當中，有唔少人晚晚連發夢都幻想自己可以去東京（尤其係新冠肺炎疫情開始後），但，您係咪真係熟悉東京先？
邊區最多在日外國人居住？
東京邊區嘅屋租最貴？
邊區又最多有錢人居住？
知道上述問題嘅答案，先稱得上真正嘅東京達人！FUN! JAPAN編輯部在此特別向所有人在香港、心在東京嘅讀者呈獻，絕對會令您下一趟東京之旅好玩100倍嘅東京二三事排行榜。睇完呢篇文章，人人都可以係東京23區博士！
話說回頭，如果您尚未了解何謂「東京23區」，記得瀏覽以下文章、上返堂「東京雞精場班」先！
邊區最多在日外國人居住？
要成為東京23區博士前，首先要掌握於東京居住嘅外藉人口。
根據東京都總務局於2022年1月發表嘅「東京都人口（推算）(*1)」統計數字所示，東京人口總數截至2022年1月時為大約1千400萬人。當中，外籍（非日籍）人口約為52萬人 (*2)，按比例計算的話即約3.7％為外國人。
咁居住喺東京嘅外國人，最多又集中喺邊區呢？
按同一資料指出，排名頭3位為以下：
| 區部 | 人口 | |
| 1位 | 江戶川區 （葛西、小岩、平井 等） | 35,220 |
| 2位 | 新宿區 （新宿、新大久保、高田馬場 等） | 33,907 |
| 3位 | 足立區 （北千住、綾瀨、舎人 等） | 33,138 |
第1位江戶川區與第3位足立區係東京都內數一數二物價與屋租較平嘅地區（有關屋租請參閱文章下方更詳盡説明），卻同時坐擁輕鬆前往東京都心嘅交通方便性，難怪成為唔少在日外國人鍾情嘅落腳地。而第2位新宿區，則因為區內日語學校與專門學校（專修學校）林立，因此唔少外國人留學生都會為縮短返學時間而住喺新宿區。（順帶一提：《同一屋簷下》取景地嘅柏木家，就係位於新宿區內嘅民家！）
此外，江戶川區「小印度」西葛西與新宿區「韓國街」新大久保等由各國出身嘅在日外國人發展而成嘅獨自生活圈子，亦係上述地區較多外國人集中嘅理由之一，勝在無論係商業方面或起居飲食方面都有個照應嘛！例如「小印度」西葛西內就有多間印度料理食肆與食材店，據聞甚至有完全不諳日文嘅印籍店員，即使淨係用印度文都可以滿足購物需要！
若再按國籍・地區（*3）將約52萬人東京在日外國人分類的話，結果則如下：
國家・地區 | 人口 | |
| 1位 | 中國 | 173,187 |
| 2位 | 韓國 | 70,421 |
| 3位 | 越南 | 26,360 |
不過若放眼日本全國，最多在日外國人居住嘅市區町村（地方行政區劃單位）其實並非位於東京都，而係埼玉縣川口市（*4）！由於搭JR唔需轉車即可直達池袋・新宿・澀谷等主要地方，加上埼玉縣屋租亦較平，因此吸引到唔少中國人或越南人選擇落腳於川口市。
- *1出處：總務局統計部「東京都の統計（東京都の人口（推計））」（意譯：東京都統計（東京都人口（推算）））
- *2出處：總務局統計部「住民基本台帳による世帯と人口 令和４年 」（意譯：令和４年 住民基本台帳家庭與人口分佈）
- *3出處：總務局統計部「区市町村別国籍・地域別外国人人口(上位10か国・地域)」（意譯：按區市町村及國籍・地區分類之外國人人口(前10位國家・地區)
- *4出處：出入國在留管理廳在留外國人統計2021年6月尾「（別表）在留外国人総数上位１００市区町」（意譯：在日外國人總人數前100位市區町）
邊區最多有錢人居住？屋租最貴又係邊區？
某位世田谷區區民曾經於日本清談節目《月曜から夜更かし》（月曜夜未央）一次街頭訪問中講過：「（住喺世界谷區嘅人都係）RIch People，格局同其他區完全唔同呢（哈哈哈）」。究竟世田谷區民係咪真係如呢位Rich People所講咁Rich咁有錢呢？睇完以下東京23區平均年薪・屋租相關資料自有分曉！
據總務省統計局資料（*5 & *6）資料顯示，東京23區平均年薪及屋租結果如下：
| 區部 | 平均年薪（日圓） | |
| 1位 | 港區 （品川、新橋、表參道 等） | 約1,160萬 |
| 2位 | 千代田區 （秋葉原、大手町、東京 等） | 約1,005萬 |
| 3位 | 澀谷區 （澀谷、原宿、代官山 等） | 約885萬 |
| 區部 | 每1m²平均屋租 | |
| 1位 | 港區 （品川、新橋、表參道 等） | 約3,050日圓 |
| 2位 | 中央區 （銀座、日本橋、築地 等） | 約2,917日圓 |
| 3位 | 澀谷區 （澀谷、原宿、代官山 等） | 約2,855日圓 |
正如各位所料，東京都23區平均年薪與屋租行情雙雙冠絕全國47都道府縣！以同一面積居住用租房比較的話，東京每月平均屋租（81,001日圓）比全國平均（55,695日圓）高出約3萬日圓，相比起最平嘅鹿兒島（37,863日圓）更足足高出近5萬日圓。全國平均屋租最高嘅市區町村前25位當中，位處東京23區內嘅市區町村就佔咗19席！
云云地區當中，又以都心3區（港區・千代田區・中央區）因作為政府行政機關、大企業總公司、金融機構集中地，以及皇居、國會、迎賓館（赤坂離宮）等首都功能・國家權力中樞而成功擠身上游位置。「Rich People」曾經居住嘅世田谷區以平均年薪約560萬日圓進駐第7位，不過正所謂「天外有天，人外有人」，港區・千代田區雙雙以平均年薪超過1,000萬日圓嘅驕人數字穩佔TOP 2。作為遊客嘅各位讀者，如果有曾經見識過區內高級住宅、超高層塔式住宅林立的話，都應該會認同排行榜結果吧？相反，東京23區平均年薪排名最低嘅足立區卻只有約347萬日圓，與第1位港區錄得約815萬日圓差距，反映出即使同樣係東京，年薪都可以差天共地，一年人工之差甚至足夠買到一架二手法拉利！
另一方面，澀谷區雖然作為著名購物聖地，不過其實只要離開繁華購物區，都一樣有松濤、廣尾等多個名牌高級住宅區。再再再順帶一提，港區・千代田區・澀谷區唔單只係東京23區「人工貴、樓價貴」頭3位，同時亦係全國排行榜3甲，不愧係東京！
番外篇―屋租最平係邊區？
距離企業集中嘅都心越遠，屋租就越平。例如江戶川區、葛飾區、足立區、練馬區與板橋區，只需要6萬日圓（*7）以下就可以租到一個1R（1 Room / 單房房型）單位。租金行情同時亦與酒店房價有關，下次日本旅行時想搵平酒店的話，細心搵搵上述幾區內嘅酒店的話可能會有意外驚喜呢！
- *5出處：總務省統計局「令和2年度課税標準額段階別所得割額等に関する調」（意譯：2020年4月1日～2021年3月31日年度 關於按課稅標準額分類之所得金額之調查）
- *6出處：總務省統計局「平成30年住宅・土地統計調査結果」（意譯：2018年住宅．土地統計調查結果）
- *7出處：公益社團法人 全國宅地建物取引業協會連合會「賃料相場：東京都」（意譯：房租行價：東京都）
東京23區排行榜文章陸續有嚟！
日本人最想住邊區？東京邊區治安最好或最差？等等，編輯部今後將會繼續更新有關東京23區各種排行榜嘅文章。記得鎖定FUN! JAPAN，話唔定您會發掘您所不知道嘅東京新一面！？
Comments