碗子蕎麥麵（わんこそば）又稱為一口蕎麥麵，係聞名全日本嘅岩手縣特產美食。有唔少人去到岩手縣時都會化身成大胃王，挑戰自己極限、睇吓最終究竟可以食到幾多碗咁話！碗子蕎麥麵與盛岡冷麵、盛岡炸醬麵合稱為「盛岡三大麵」，今次FUN!JAPAN編輯部要為大家介紹有關碗子蕎麥麵嘅二三事。
何謂「碗子蕎麥麵」？
碗子蕎麥麵係岩手縣傳統特色料理之一，主要分佈喺岩手縣西邊嘅盛岡與花卷，其起源眾說紛紜，當中主要分為「花卷起源說」與「盛岡起源說」2種。
「花卷起源說」版本係因為江戶時代，南部氏第27代當家喺花卷品嚐到當地蕎麥麵而來，相傳第27代當家去食蕎麥麵嘅時候，當時店裡面嘅人非常謹慎，小心翼翼地用少份量嘅蕎麥麵一碗一碗咁招待第27代當家，第27代當家仲好開心咁連續食咗好幾碗，因而得名；「盛岡起源說」版本嘅講法則係第19屆內閣總理大臣返鄉下食蕎麥麵嘅時候，講咗一句「蕎麥麵僅限碗子」而得名。
※「わんこ」係地方方言，指嘅就係「木碗」。
碗子蕎麥麵嘅食法
碗子蕎麥麵嘅食法非常獨特，就係將一口份量嘅蕎麥麵放喺一個個細木碗仔裡面。碗子蕎麥麵一般以任食方式進行，除咗蕎麥麵和配料份量夠足，仲有唔少人會趁機挑戰自己極限，睇吓最多可以食到幾多碗，一般人正常食量介乎於35碗至60碗之間。
當您食完一碗，店員就會一邊嗌著「HAI、JANJAN、DOKKOI」（ハイ、どっこい、じゃんじゃん）獨特呼喊聲，一邊用「光速」將麵條加到食客碗裡面，令人一口接一口食過唔停。雖然根據唔同店舖，當中嘅蕎麥麵份量都會有所不同，但係整體嚟講，大約10～15碗碗子蕎麥麵就相等於一碗正常蕎麥麵嘅份量。
品嚐碗子蕎麥麵嘅秘訣
- 品嚐碗子蕎麥麵，係一場挑戰自己個胃嘅極限比賽，最好喺飢餓狀態下進行挑戰，就唔怕食少少就結束，餓住食就可以食得更抵更盡興。
- 喺品嚐碗子蕎麥麵之前，要先著上圍裙。
- 每碗蕎麥麵少不免都會少少湯汁，當碗裡面殘留湯汁過多嘅時候，可以倒入餐檯上面特別放置嘅桶裡面。
- 當覺得自己已經食唔落，唔想再繼續食落去嘅時候，就將手上嘅蕎麥麵食完之後，即刻冚上碗蓋，並講一聲「MAITTA」（参った）！
碗子蕎麥麵嘅配料
配搭唔同配料品嚐，可以增添蕎麥麵嘅不同風味。根據餐廳風格唔同，配料亦有所差異，大致選項如下：
- 吞拿魚魚生
- 白蘿蔔泥
- 芝麻
- 海苔
- 山葵
- 醬油
- 滑子菇
- 雞肉鬆
- 山藥泥
- 蔥花
碗子蕎麥麵大胃王挑戰賽
1957年，花卷市嘉司屋舉辦首次「碗子蕎麥冬競賽」（わんこ相撲冬場所），日後大賽改名為「碗子蕎麥全日本大會」（わんこそば全日本大会）並於每年2月11日於花卷市舉辦。大賽規模其後發展規模越大，一舉讓碗子蕎麥名聲於日本全國傳開。
不讓花卷市專美於前，1986年盛岡市亦創立碗子蕎麥麵比賽「全日本碗子蕎麥麵錦標賽」（全日本わんこそば選手権），定期於每年11月上旬舉辦。兩場大賽規則時間有少少唔同，花卷限時5分鐘；盛岡則過去無限制，但自1997年開始改為限時15分鐘。
話明係大胃王挑戰賽，共通點係名參賽者需要喺限時內互相較量究竟邊個食得最多碗！碗子蕎麥麵每碗規定要裝10g，係一碗普通蕎麥麵份量嘅10分之1。每位參賽者隔離都會有一位服務人員在旁幫忙加麵，目前為止創下嘅最高紀錄分別為5分鐘吃了258碗，15分鐘吃了632碗，「食」力相當驚人！
*受新冠肺炎疫情影響，比賽舉辦日期或會作出變更。
要品嚐碗子蕎麥麵去邊度食至好？
岩手縣有唔少餐廳提供碗子蕎麥麵，下次去岩手遊嘅話，記得化身成大胃王去挑戰一下自己究竟可以食到幾多碗喇。
東家蕎麥麵（盛岡）
多間蕎麥麵店當中，最受歡迎嘅東家本店位於盛岡，岩手縣縣內亦有好幾間分店。東家嘅碗子蕎麥麵挑戰套餐除咗主角蕎麥麵之外，仲有10道小菜，1道甜品，可以邊食邊加入各種小菜轉變唔同口味，話唔定會食極唔厭仲可以食多幾碗，只要喺東家食完100碗以上，就可以得到一張木牌作為紀念喔。東家嘅店員會喺午餐、晚餐時段，等候大家大駕光臨，有機會記得去挑戰一番。
店舖資訊
- 店名：東家蕎麥麵 本店（そば処 東家 本店）※本店因廚房裝修休息中，預計2022年10月底重新營業
- 地址：岩手縣盛岡市中之橋通1-8-3
- 價錢：成人3,700日圓
- 交通方式：JR秋田線、東北北海道新幹線、田澤湖線、東北本線、山田線或岩手銀河鐵道線至JR盛岡站，從盛岡站步行約25分鐘
- 營業時間：11:00～15:00 、 17:00～18:30
初駒碗子蕎麥麵（盛岡）
初駒亦有提供碗子蕎麥麵，提供3種任食套餐，需事要先預約，分別係梅套餐提供7道配料，含稅2,640日圓；松套餐提供10種配料，含稅3,190日圓；櫻套餐提供12道配料，含稅3,850日圓。如果您胃口比較細，可以選擇30碗蕎麥麵套餐，配菜種類與梅套餐相同，含稅1,980日圓。如果您係中學生、高中生，仲有機會體驗擔任店員，幫客人加麵，但只接受少人數團體報名。
店舖資訊
- 店名：初駒碗子蕎麥麵 本店
- 地址：岩手縣盛岡市八幡町10-21
- 交通方式：從盛岡巴士總站步行約10分鐘，從盛岡站搭巴士約20分鐘
- 價位：30碗套餐為1,980日圓
- 營業時間：11:00～20:00
嘉司屋（花卷）
嘉司屋位於花卷，店舖面積雖然細，但氣氛充滿地道日本風味，有提供碗子蕎麥麵挑戰，亦有一般蕎麥麵可供選擇。當中，成人與學生套餐有8種小菜、小童套餐有5種小菜。另外，店內所有食材都係每日由當地農家與肉店新鮮入貨，蕎麥麵更加係自家製喔。
店舖資訊
- 店名：嘉司屋
- 地址：岩手縣花卷市東町2-19
- 地址：搭JR釜石線、東北線至花卷站，從花卷站步行約15～20分鐘
- 價錢：成人（中學生以上）3,500日圓、小學生2,800日圓、小童1,700日圓
- 營業時間：11:00～15:00、17:00～21:00
Comments