「香港明明已經有IKEA，去到日本都仲要去？」
—以上係當小編話畀朋友聽要去最新開幕嘅IKEA新宿採訪時，WhatsApp即時傳嚟嘅一句回覆…無錯！2021年大大小小東京新景點相繼落成，而且IKEA新宿已經係品牌第3間開設於東京都內嘅「都心型店舖」，然而新開張分店依然值得朝聖！到底係咩驅使您去到日本都要去朝聖？係瑞典肉丸，定係其他原因？下文自有分曉～
※註1：以下圖片皆以編輯部採訪當日為準，店內商品與店舖陳列或會作出變更。
4層店舖佔盡地利 IKEA新宿贏在起跑線！
「都心」即市中心，顧名思義地理位置非常「就腳」！繼日本IKEA進駐原宿、澀谷後，第3間「都心型店舖」選址於於新宿三丁目，從JR或東京Metro車站出站後徒步幾分鐘就到，地理位置終極方便。
新宿分店一共樓高4層（地底1層+地面3層），總面積闊約3,200平方米，包含傢俬、雜貨、食品等在內，商品款式多達約1,600款。論規模，IKEA新宿於3間都心型店舖中排名第二（※註2），不過就勝在地理位置屬於港人熱門住宿地新宿，附近酒店、商場、餐廳等熱鬧程度無需多作介紹，非常適合行街時抽少少時間順便兜個圈、朝聖一番！
※註2：規模最大為IKEA澀谷，樓高共7層。
喜愛夜蒲一族福音！IKEA版外賣「深夜食堂」—「Swedish Bite」
提起IKEA，可能好多人第一時間並唔係諗起傢俬，而係招牌瑞典肉丸（笑）！新店當然不負一眾肉丸迷所望，於1樓「Swedish Bite」內出售經典瑞典肉丸、植物素肉丸與蔬菜丸共3款肉丸口味。係熟悉嘅味道啊～～～
不過既然喺香港都食得到肉丸，嚟到日本梗係想要試吓啲特別嘢啦！IKEA新宿另一大特色，就係部分食物採用日本首次引入嘅「秤重賣」制度，連同肉丸、薯仔沙律、醃製香草三文魚在內，多款食物最低消費僅為100克起跳（千層麵除外），啱晒夜蒲一族行完街後買定少少返酒店「儲糧」！
有一種藍叫「IKEA藍」！藍色蘋果雪糕係「福」定係「伏」？
IKEA原宿有限定「IKEA HARAJUKU」手挽袋、IKEA澀谷有限定「Frakta」漁夫帽，同樣地IKEA新宿亦有獨家限定商品！
對「限定」一詞毫無抵抗力嘅朋友，記得要鎖定IKEA新宿獨家限定「藍色植物性蘋果味雪糕」。其他店舖出售嘅蘋果味雪糕一律為奶黃色，唯獨新宿店款式特登改為藍色圓身形狀，並以黑色雪糕筒盛裝，酸酸甜甜、爽口清新，夜晚「口痕」時過過口癮都算係唔錯嘅選擇。有無諗過，宜家傢俬都可以係您日本之旅嘅「深夜食堂」呢？
同場加映：小編採訪心水推介
由於商品種類實在太多，未能一一盡錄，因此以下將以「懶人包」形式，為大家送上小編實地採訪紀錄（又或精選敗家手信）。有得食又有得買，一句講晒，行宜家傢俬幾時都係咁開心～（誤）
踏入1樓正門，首先會見到扶手電梯旁邊放有各式招牌實用小物雜貨。除咗有較早前曾經掀起過一陣搶購熱潮嘅「EFTERTRÄDA」系列Barcode T恤及衛衣，仲有支援LGBT+社群嘅「STORSTOMMA」彩虹系列手挽袋，拎出街肯定超吸睛！
東京同香港一樣以「蝸居城市」聞名全球。為解決城市人狹隘居住空間，IKEA新宿內一共展出6間「示範單位」畀客人參觀，房間最小面積由10平方米起跳，並從著重睡眠質素、善用再生資源等角度出發，提案現代居住態度。就算係無「斬獲」都好，向日本人偷師一下揉合日式與瑞典嘅美學，話唔定可以從中學返幾招解決「土地問題」嘅收納秘訣？
景點資訊
- 名稱 ：IKEA新宿
- 地址 ：東京都新宿區新宿3-1-13 京王新宿追分大樓B1/F-3/F
- 交通 ：JR新宿站徒步約5分鐘，或東京Metro新宿三丁目站徒步約3分鐘
- 營業時間：11:00-20:00 （截至2021年6月4日）
※因新冠肺炎(COVID-19)影響，實際營業時間或會作出變更。通常營業時間為11:00-21:00。 - 定休日 ：年中無休（1月1日除外）
Comments