柳川，係沿著圍繞舊柳川城嘅護城河為中心而蓬勃發展起嚟嘅城鎮。去到柳川，「柳川遊船」係其中一項人氣活動，搭著小船遊護城河，欣賞兩旁雅致景色依季節營造出唔同嘅風情姿態。喺柳川有多個旅遊景點，例如保留昔日大名（即地域領主）所居住嘅舊址遺跡，可以窺探當時大名嘅生活樣貌。春暖花開時仲會舉行「柳川雛偶祭雛吊飾巡禮」，街上各處都可以見到女兒節嘅雛吊飾，以祈求女兒健康長大。喺特定祭典舉行時遊柳川，更能感受日本嘅傳統氣氛！
歷史悠久的柳川
柳川係福岡縣南部筑後地區主要都市之一，位於福岡市南方，相距約50公里。戰國時代（西元15世紀末～16世紀末）柳川城城主蒲池一族建造城下町，後來經過時代變遷，進入安土桃山時代由田中一族統治。到江戶時代，由立花一族成為柳川藩藩主治理呢個地方，一直至明治時代。
另外，為柳川景致增添特色嘅護城河，係於戰國時代領主蒲池鑑盛，為咗增強柳川城防禦能力而挖掘及建造。後來，安土桃山時代由田中吉政成為領主，將護城河整修成為水運、灌溉稻米用嘅水渠，奠定現今護城河嘅基礎。
去柳川必搭「柳川遊船」！
去到柳川，一定要體驗嘅行程就係「柳川遊船」！搭著柳川遊船暢遊護城河，感受柳川歷史風光。
從西鐵柳川站步行約5至10分鐘就到搭船處，一共有四個地方可供乘客搭船。
遊船行程為單程，一共有兩條路線，從搭船處出發，分別係「柳川藩藩主立花邸 御花」北門附近路線（航行時間約60分鐘），同沖端町路線（航行時間約70分鐘）。落船之後要返去搭船處嘅話，可以搭船公司所營運嘅接駁巴士即可返回原地。
遊船過程中，可以欣賞到非常多具歷史性嘅建築物，例如建於江戶時代嘅「柳川藩藩主立花邸 御花」、明治時代紅磚倉庫「並倉」等等。除此之外，仲有相當狹窄嘅水門，闊度啱啱好淨係夠「柳川遊船」船隻通行，每當船隻行經一座又一座小橋時，乘客嘅頭部都幾乎要掂到橋底！令人覺得既緊張又刺激，擔心會唔會撞到頭。
冬天仲會用上經常喺日劇、漫畫等當中會出現嘅「被爐」，提供「被爐船」畀大家搭，非常過癮！喺初春「柳川雛偶祭雛吊飾巡禮」期間，會有「雛偶巡禮船」，夏天限定行駛嘅納涼船「夜燈小舟」，四季都會有唔同嘅遊船樂趣，體驗各種風情嘅柳川景色。以上特別時期去體驗柳川遊船嘅話，一定別有一番滋味！
營業時間從早上九點至傍晚時分。成人票價（中學生以上）1,500〜1,650日圓、兒童票價800〜830日圓，根據唔同船公司，票價亦會有所差異。亦接受包船服務，可以同船公司另外查詢相關資訊。
船公司官網如下，提供參考：
＊以下提供嘅船公司網站只有日文版本，識日文嘅朋友亦可以參考
必去旅遊景點
跟著要介紹嘅係柳川必去旅遊景點。去到柳川，除咗遊船，仲可以參觀以下旅遊景點，親自感受一下各時代嘅日本風情。
柳川藩藩主立花宅邸 御花
江戶時代統治柳川藩嘅藩主立花家所居住嘅大宅，面積範圍約7,000坪（約23,000平方米），更被指定為國家名勝「立花氏庭園」。建立於1910年嘅洋館和庭園「松濤園」保存完整，資料館裡面亦有展示立花家代代相傳嘅大名（地域領主）所持有嘅武器、道具，另外仲有酒店、餐廳，仲可以喺度入住一晚，品嚐美食，悠閒地體驗一下呢棟建築物嘅典雅風情～
官網 : http://www.ohana.co.jp/index_e.html
舊戶島家住宅與庭園
舊戶島家住宅與庭園，於1789年至1801年寬正年間建造而成，係用作為藩主嘅茶室。被指定為國家名勝，喺呢度可以欣賞到日本獨特嘅庭園景致。
柳川城址
柳川城於永祿年間完工，護城河圍繞著周圍嘅城堡姿態，被認為係九州數一數二難攻嘅城堡，固若金湯、牢不可破。但非常遺憾地，城郭喺1872年遭受火災並已燒毀，昔日城跡已成為柳川高中、柳城中學嘅用地。
Karatachi 文人足湯
Karatachi 文人足湯係2007年開幕嘅設施。足湯附近仲有展示北原白秋、檀一雄等等同柳川有深厚淵源嘅文人嘅相同與事蹟。行到攰嘅話，不妨嚟呢度浸一浸足湯，放鬆一下雙腳，順便認識一下展示中嘅日本文人。
必嚐柳川美食
蒸籠鰻魚飯
柳川必食美食就係「蒸籠鰻魚飯」！先將醬汁淋上白飯之後拎去蒸，然後係上面放上蒲燒鰻魚，再蒸多次。利用蒸籠蒸兩次，令鰻魚肉質變得更柔軟、入口即融化。可以喺度趁熱食到柔軟嫩滑嘅鰻魚，真係好幸福啊！
柳川的交通方式
- 搭西鐵天神大牟田線，從西鐵福岡（天神）站至西鐵柳川站，車程約49分鐘
- 從太宰府站至西鐵柳川站，車程約41分鐘
- 從大牟田站至西鐵柳川站，車程約13分鐘。
- 從佐賀巴士中心搭路線巴士至柳川，車程約50分鐘。
- 自駕的話，行駛九州高速公路，於「三山柳川IC」出。
大家對柳川又有咩感想呢？係咪已經感受到柳川嘅魅力所在？以上所介紹嘅景點只係一小部分，柳川仲有更多魅力之處等緊大家去探索，可以參考觀光協會官方網站，規劃一場自我風格嘅旅程，體驗一下柳川嘅日式水鄉風情！
Comments