日本時裝品牌「UNIQLO」以出售多款價錢經濟實惠、又充滿時下潮流設計嘅服飾，難怪喺香港都儲落一大班粉絲！如果您係日本時裝嘅愛好者，相信您都有去過UNIQLO嘅分店吧？而本文，就會為各位介紹於2020年夏天開張、位處話題新設施「WITH HARAJUKU」內嘅UNIQLO最新店舖！
UNIQLO 原宿店：引頸期待！U記終於重返東京潮流聖地
等咗咁耐，UNIQLO終於重返日本潮流發源地—原宿！事實上，距離品牌上次於2012年時於原宿開舖，今次「凱旋回歸」係相隔8年重返同一地區（截止2020年6月）。不負「潮流聖地」原宿之名，「UNIQLO 原宿店」以「將嶄新時裝發揚光大」為店舖理念，相信各位U記粉絲都非常期待今次新店有咩特色吧？事不宜遲，即刻出發到JR原宿站前複合設施「WITH HARAJUKU」内嘅「UNIQLO 原宿店」睇睇啦！
原宿店獨家「UT專區」
UNIQLO其中一款皇牌商品「UT」印花T恤每次有新作上市都會引起一陣談論話題。如果您係「UT」粉絲，咁您就絕對唔可以錯過原宿店獨家嘅「UT POP OUT」喇！
步入新舖1樓，您就即可以見到原宿店獨家「UT」專區。包括原宿店限定款式、與各路明星藝人或品牌嘅聯乘合作款式在內，店內每個UT系列都會輔有解說，為顧客介紹產品聯名設計師以及圖案理念等，就算淨係齋睇都已經非常有趣。
參考日式穿搭美學「StyleHint原宿」
另一邊廂，地下1樓則係有如圖書館嘅「StyleHint原宿」專區。顧名思義，區內整面牆壁擺放著240台螢光幕、螢幕上會逐一顯示由各位用家投稿嘅穿搭，而客人就可以透過瀏覽圖像、獲得心水產品嘅穿搭靈感。遇上心水產品的話，您更可以即時click入圖像檢視產品詳情、店舖庫存等資訊。店內有貨的話，就即刻可以將佢帶返屋企㗎喇！
更特別嘅係，穿搭會聯同店舖宣傳、隨每季推薦產品持續更新，所以就算行多幾次都唔會厭！鍾意UNIQLO服飾嘅朋友，保證原宿分店一定可以帶畀您購物樂趣以及全新穿搭靈感喔！
店舖資訊
- 名稱：UNIQLO 原宿店
- 地址：東京都澀谷區神宮前1-14-30 WITH HARAJUKU 1樓・地下1樓
- 營業時間：11:00～21:00
- 交通：JR原宿駅徒歩1分鐘、或東京Metro明治神宮前站徒步1分鐘
※另一篇文章內有介紹銀座分店「UNIQLO TOKYO」，記得睇埋喇↓
Comments