點解會叫福袋？
新年係去日本買特價貨嘅好時機。好多舖頭都會揀喺新年開工大吉嘅時候開始打折做大減價。而喺新年期間，更加會有好多舖頭將唔同嘅商品放係密封袋入面包裝出售，稱為「福袋（fukubukuro）」。因為一般袋入面商品嘅總值會高過原價，可以話非常超值，對消費者嚟講係幸運袋（福袋）！
福袋入面嘅內容？
通常福袋嘅內容都係唔公開嘅為多，未畀錢係唔準打開福袋！所以只可以靠揀價錢、尺吋或者舖頭設定嘅分類嚟揀，最後買到啲咩真係靠運氣！但因為一般袋入面嘅商品總價值都會遠高於售價，所以唔知入面有咩都會好多人買。人氣嘅福袋更加係排哂長龍，搶都未必搶到。平時畀人感覺好含蓄嘅日本人，係搶購福袋時就好似轉性咁，可以好瘋狂！
而近年，為咗增加大家嘅購買意欲，好多舖頭都會事先預告福袋嘅內容。大家可以喺買之前，上鍾意嘅品牌官網睇吓，又或者上社交網站睇吓有無過去福袋開箱嘅相或者預告。
獨特嘅福袋
一般會包裝成福袋銷售嘅通常都係時裝、食品、電器、雜貨等，以日常生活中較容易用到嘅商品居多，但近年就越嚟越多舖頭會推出獨特嘅福袋，就好似照片中嘅知名運動品牌推出嘅「福筒」。係唔係超特別，據聞，個桶最後仲可以用嚟做有儲物空間嘅櫈呢。
福袋售價
近幾年，有啲百貨公司為咗製造話題，會推出令人驚訝嘅福袋，例如澀谷嘅西武百貨曾經推出售價2億日圓嘅福袋，入面有珠寶等高價商品，市值大概3億日圓。除咗昂貴嘅福袋之外，大多數嘅定價都係非常親民。好似 mister donut 福袋嘅定價為2,200日圓，內含20個冬甩兌換券同埋毛毯、眼鏡、月曆、袋仔等雜貨。mister donut 特價時一個冬甩至少108日圓，所以等於冬甩之外嘅商品都係免費，係咪好扺呢！而且每年都會有唔同嘅卡通人物合作，毎年大概喺11月底就會公布新年福袋内容，鍾意嘅人可以上官網確認！
仲有一間名為Village Vanguard嘅玩具雜貨書店，佢地福袋亦都相當獨一無二。老實講，購買時需要有相當大嘅勇氣。有去過日本Village Vanguard嘅朋友都應該知道，雖然掛名叫做書店，但其實舖頭入面好多奇趣又特殊嘅雜貨、食品。毎年初都會見到好多買Village Vanguard福袋嘅人post相上社交網站…想要刺激嘅人，非常推薦喔！（笑）
知名咖啡店嘅福袋
如果您鍾意咖啡嘅話，就千祈唔好錯過知名咖啡店所推出嘅福袋，最出名嘅要數日本星巴克嘅福袋。除咗福袋本身個袋好睇可以日常用之外，咖啡、外帶杯同其他商品都好超值，所以非常搶手喔！近幾年，星巴克福袋改用抽籤制，有抽中嘅人先可以買到福袋，想購買嘅人一定要隨時注意官網消息，唔好傻傻咁跑去排隊喔！
如果仲未買過福袋嘅人，可以計劃下去日本過年，體驗一下購買福袋時嘅氣氛同打開福袋時緊張期待嘅心情～一定會係其他旅程感受唔到嘅經驗。
Comments