踏入2020年下半年，一眾東京新景點設施相繼落成開幕。其一備受注目嘅，就有2020年6月11日新開張、位於東京新興發展區「有明」嘅「SMALL WORLDS TOKYO」。「迷你世界」顧名思義，一眾袖珍展品適合打卡影相不在話下，編輯部認為佢更係2020年必去東京景點之一！到底呢個東京新蒲點有咩值得你玩，以下就為大家作詳盡介紹！
IG打卡影相天堂！超逼真6大主題展區
全新開幕嘅室內微縮模型主題公園係一座總面積超過8,000平方米，以「可動微縮模型世界」為概念嘅設施。場館一共由「太空中心」、「世界小鎮」、「關西國際機場」、「美少女戰士」、「新世紀福音戰士第3新東京市」、「新世紀福音戰士格納庫」6大區域組成。
先由大家都非常熟悉嘅關西國際機場講起。「關西國際機場」場景內總共會有40架飛機升降，起飛著陸期間各機體更會發出各自引擎聲，配以場景晝夜燈光變化，你只需要短短30分鐘就可以觀察到機場實際一日運作！
「世界小鎮」則係SMALL WORLDS TOKYO內嘅迷你版「世界之窗」。主題區域以1900年代第一次工業革命時代嘅亞洲及歐洲5個國家為舞台，實行一站式帶你環遊世界！小鎮佈置內隱藏著多達30處小機關，一邊探索煤礦、圖書館、村莊等場景時，話唔定你會發現到意外驚喜…？
「太空中心」將70年代「阿波羅計劃」及近未來太空中心合二為一，場景周邊可見大大小小嘅科研人員、湊熱鬧民眾以及整裝待發準備到太空旅人嘅旅客。宇航科技主題展區內每日都會上演合共48次火箭及穿梭機發射過程，想要「見證」火箭升空嘅朋友記得要事先check清楚時間喇！
≪新世紀福音戰士≫×≪美少女戰士≫兩大必睇動漫主題
≪新世紀福音戰士≫展區分為「第3新東京市」以及「格納庫」2個主要展區。「第3新東京市」以1/80比例演繹作品世界觀，活用近景遠景手法將舊市街地及第3新東京市栩栩如生重現眼前；「格納庫」內則會展出初號機出擊嘅埸景，並輔以照明聲音於現實世界上演原作經典場景。
另一方面，≪美少女戰士≫展區則以90年代嘅東京麻布十番地區為藍本，帶大家走進漫畫第1卷至第4卷街景以及原作未來世界故事舞台「CRYSTAL TOKYO」。見到月野兔、禮服蒙面俠與一眾水手服戰士濟濟一堂，粉絲回憶即刻返晒嚟啦！
你都可以成為微型世界一份子！？期間限定變身迷你居民！
全新設施唔只得個「睇」字咁簡單，你仲可以透過最新技術3D掃瞄器拍攝自己嘅微型公仔，一年內作為SMALL WORLDS TOKYO居民進駐指定展區！
入場人士可以參加一項附帶「居住權」嘅模型計劃，即場製作1/80及1/35比例嘅微型公仔各一，前者會於拍攝後14日起被放置於展區內；而後者則可於拍攝完成後14日後帶返屋企紀念。體驗計劃附設年間passport，方便你下次再去東京時順便探吓迷你版嘅「自己」！想要「定居」於≪新世紀福音戰士≫故事舞台定關西國際機場場景，一切由你話事！
小心荷包大出血！瘋狂血拼東京手信
中：≪新世紀福音戰士≫ 彩絵碟（3盒裝） 2400日圓（未含稅）©khara
右：≪美少女戰士≫ 馬克杯（麻布十番） 2100日圓（未含稅）©Naoko Takeuch
臨走之前，又點少得趁機血拼呢？「Souvenir shop」已為遊客準備最具東京特色嘅手信，例如印有櫻花、東京鐵塔、富士山嘅水樽，≪美少女戰士≫及≪新世紀福音戰士≫相關獨家聯乘精品等。
官方商店旁邊嘅「WORLD Lab」亦預計今後舉行微縮模型工作坊，先申請「入住」公園、再拎走尊屬自己嘅模型，一家大細識玩一定係咁玩！
SMALL WORLDS TOKYO
- 開幕日期：2020年6月11日
- 地址：東京都江東區有明1-3-33 有明物流中心
- 營業時間：09:30-20:00（最後入場時間19:30）
- 交通：百合海鷗號有明網球之森站徒步約3分鐘
Comments