大家好，我係第三回日本旅遊獎賞活動既得獎者Jimmy Tam。首先，我要感謝FUN! JAPAN舉辦獎賞活動同安排行程，今次可以成為幸運兒，去完成睇雪猴既夢，又同時認識到嚟自世界各地既朋友，旅途中既交流經驗，真係用錢都買唔到。跟住落黎，我會為大家分享呢五日勁玩既一點一滴。
第1日 到達東京，展開UENO JOSHI上野深度遊
坐凌晨機，一朝早到達日本羽田機場後，匯合FUN! JAPAN嘅團隊同嚟自馬來西亞、印尼、越南、印度嘅團友後，就喺上野正式開始我地首個行程：去到上野公園門口，迎接我地既係兩位著和服既年輕可愛美女。喺交談中得知，佢地係學生，並希望透過行程同來自世界各地既旅客交流。
我地遊走上野嘅橫街小巷，途中到訪「瑜伽庵」，體驗日本茶道，由歷史到制作，從品嘗到解說，心境亦由緊湊變得輕鬆。午飯過後，再遊覽附近嘅舊建築同埋葬咗著名將軍嘅墳墓，由歷史中認識更多日本。如果自己嚟日本旅遊既香港人，相信未必會遊覽到呢啲地方，所以今次確係一個難忘而且有意義既行程。
同兩位和服美女講再見之後，我地返回上野車站，坐北陸新幹線到長野，再坐巴士到志賀高原。成程巴士兩個鐘，我把握機會捉住馬來西亞嚟嘅團友Long Lit傾計！傾傾下就到目的地，喺落車嘅一刻，我真係成個呆左…積雪成半尺咁厚！無諗過由上野同志賀高原既天氣差別係咁大。
當晚氣溫只有-10度，扺達酒店放扺行李後，就去咗酒店餐廳食晚餐。唉？驚喜既事情就係度發生！原來今日係Long Lit生日，酒店特別準備左個蛋糕慶祝。我諗呢個生日Long Lit一定一世難忘。食飽飯就拿拿聲返房訓，因為聽日有一個極大考驗等緊我……
第2日 與雪猴相遇，再瞓身玩雪
第二朝有咩大考驗？就係要7點起身！之前一晚夜機無瞓過，仲有一個鐘時差，7點鐘起身真係人間煉獄。但「早起的鳥兒有蟲吃」，咁早起身都係為左我地今次旅程重點，睇雪猴！我地坐車去到地獄谷野猿公苑停車場，再行大概約30分鐘到入口，好彩當日天氣夠凍，可以見到一隻隻馬騮行入溫泉入面浸，佢寫意時我地都享受。
呢個咁難得見到既景象，就算我自由行都未必會黎。再早起，都係值得！
睇完雪猴，我地去到山之內町嘅湯田中。呢度出名多公眾溫泉，俾錢就入得，所以亦有溫泉街之稱。除左公眾溫泉多到通街都係，佢嘅古舊建築，每一棟都散發文化氣息，聽講連《千與千尋》入面既背景都有參照呢到嘅景物。
之後再回酒店，有一連串開心活動。酒店經理篠原竜彥非常好客，佢先帶我地去滑雪場參觀。原來呢間酒店極大，分東、南、西館，基本上整大個後山滑雪場都係同一集團打理。我地先到練習場感受一下滑雪既樂趣，雖然唔係正式既滑雪，但玩雪上單車已足以令我地樂而忘返。
跟住仲坐吊車上海拔2000米嘅山頂。喺坐吊車時，同經理談話中得知，原來酒店喺大約5月至11月會休息，夏天做維護工作，主要冬天先營業。
下一篇，我會繼續分享之後幾日勁玩嘅一點一滴！
Comments