日本嘅情趣酒店（LOVE HOTEL）有幾特別？

「情趣酒店（ラブホテル，Love Hotel）」，又或者譯愛情旅館，係日本獨特文化之一，指嘅就係情侶們會去嘅酒店。隨住時代嘅發展，近年Love Hotel竟然亦成為女生們聚會，辦「女子會」嘅地方。點解除咗情侶，其他客人都會想去Love Hotel呢？

愛情旅館係乜嘢？

情趣酒店（Lovel Hotel）嘅意思係專為情侶們設計嘅旅館，佢嘅詞源係嚟自美國嘅汽車旅館（Motel）。「Love Hotel」呢個詞語，係為數不多嘅其中一個世界各地會用嘅「和製英語」。呢項日本獨特文化，亦吸引咗好多海外媒體關注。

日本嘅Love Hotel始於1930年嘅「円宿」。「円宿」唔止提供過夜住宿，仲提供短時間休息服務，可以睇成類似香港嘅時鐘酒店。後來，「円宿」喺戰爭中被燒毀，轉變成為另一種稱為「結伴入住旅館（連れ込み宿）」。

至1960年代末～1970年代末，「結伴入住旅館（連れ込み宿）」嘅稱呼逐漸演變成「Love Hotel」。而家嘅愛情旅館設備好齊全，甚至有好靚嘅小木屋外型，各款型式都有。

近年經營方式轉變，有啲Love Hotel仲會推出以「女子會」為目標客群嘅服務，例如有豪華轎車接送，或入住帶岩盤浴嘅房間等等。此外，因為Love Hotel雖然一般比經濟型酒店（Business Hotel）寬敞同豪華，但價格就唔會比較貴，所以近年受到好多外國旅客歡迎。

Love Hotel通常設備好齊全。除咗大家想像嘅成人情趣用品外，仲會備有一般嘅生活用品同電視。有啲仲會有按摩椅、按摩浴缸等放鬆紓壓設備；甚至卡拉OK同遊戲機等娛樂設備。根據房間等級，有啲仲可能有岩盤浴或附有好靚嘅公主豪華床等等。

Love Hotel入住一晚費用大約為7,000～10,000円。但係，東京新宿歌舞伎町、六本木等市中心地區，亦都會有比較貴價嘅高級Love Hotel，一晚住宿費用可能達2萬円以上。（截至2019年10月資訊）

另外，Love Hotel收費一般以兩人入住一間房為前提。如果3個人用嘅話，可能會有額外收費。費用根據日子同客房等級而定，平日收費一般比較平，而客人較多嘅週六、週日，同埋假日、假日前夕就會收費較高。

Love Hotel通常都會係大車站附近，同埋高速公路交匯處附近。而喺東京、大阪呢啲大城市，就會有啲地區集中有比較多Love Hotel。

例如，東京新宿歌舞伎町，就有約70間Love Hotel，池袋附近就有約80間，澀谷約有60間。而喺大阪，梅田地區約有40間，難波地區亦有大約40間。（截至2019年10月資訊）

Love Hotel唔單止喺東京同大阪有，日本全國各地都有。如果有興趣嘅朋友，可以事先做好功課，睇吓目的地有無Love Hotel，話唔定可以揀間又扺又豪華嘅Love Hotel享受，增添旅程中嘅樂趣。