鶴岡市立加茂水族館全世界最大嘅水母水族館

位於日本山形縣鶴岡市、緊鄰日本海嘅「鶴岡市立加茂水族館」，係世界上最大嘅水母水族館，展出嘅水母種類同數量堪稱世界第一，有個叫「夢幻水母館（クラゲドリーム館）」嘅愛稱。除咗水母，仲可以睇到山形縣嘅淡水魚、棲息於日本海沿岸嘅各種海洋生物。另外，仲有精采嘅海獅、海豹表演可以欣賞。

鶴岡市立加茂水族館小檔案

鶴岡市立水族館係山形縣內唯一嘅水族館。水族館總共3層，1樓有海獅表演嘅地方「鰭足類廣場（Pinniped place）」、「Seal Pool（海豹泳池）」；2樓有水魚同魚類水槽，仲有紀念品店同餐廳。

鶴岡市立加茂水族館除咗水母，仲有各種棲息於海洋、湖泊同河川嘅動物，同埋多項體驗活動同設施。例如，體驗餵食海鷗嘅「Black-tailed gull sport（海鷗區）」、可以眺望日本海海景嘅天台草地公園。

另外，喺館內餐廳可以試吓難得見到嘅「水母拉麵」同「水母雪糕」，其實就係加入海蜇皮嘅料理。紀念品店有賣海蜇皮口味嘅日式饅頭、水母公仔等獨特商品。

以下為你介紹鶴岡市立加茂水族館嘅必睇重點。

鶴岡市立加茂水族館內展出60種以上唔同品種嘅水母，堪稱世界第一多。世界上最大規模嘅水母水槽喺設計上都幾講究，一個直徑5米嘅圓形水槽「Jallyfish Dream Theater（水母夢幻影院）」，有大約1萬隻「海月水母」喺眼前悠游，非常夢幻，令人嘆為觀止。

另外，其他水母品種仲有會發出綠色光芒嘅「維多利亞管水母」，同埋會發出藍色、白色同啡色等唔同顏色嘅「馬賽克水母」等等。

而喺「Jellyfish Commentary Corner （水母解說區）」，仲可以觀賞水母喺各個成長階段嘅樣貌，又可以了解水母點樣食嘢。

展示山形縣嘅淡水魚同鹹水魚嘅展區，可以睇到紅點鮭魚、櫻鱒等淡水魚，同埋赤鯛、鰤魚、小銀綠鰭魚等鹹水魚。呢個水族館仿照沿海自然環境而設計出嚟，令各種魚類喺海中嘅生態樣貌能夠重現眼前。

鶴岡市加茂水族館有專人為大家講解海獅同海豹嘅特徵同之間差異，叫做「Pinniped time（鰭足類的時間）」嘅環節，都好受歡迎。海獅同海豹配合飼養員嘅指令做出精彩表演，引起觀眾熱烈歡呼聲。「Pinniped time」除冬季外，每日都會舉行。（截至2019年8月資訊）

另外，喺「Seal Pool」可以睇到海豹自由自在地泳水，或者喺地面上懶慵慵嘅臥姿，都好得意呀！

鶴岡市立加茂水族館全年無休，開館時間由上午9點到下午5點。7月下旬到8月中旬延長開館至下午5點半。最後入館時間為閉館前30分鐘。

門票為成人1,000日圓。（截至2019年8月資訊）

要去鶴岡市立加茂水族館，可以從JR鶴岡站乘搭庄内交通巴士，車程約35分鐘，到加茂水族館巴士站落車後即達。

名稱：鶴岡市立加茂水族館
地址：〒997-1206 山形縣鶴岡市今泉字大久保657-1
交通方式：鶴岡站→[庄内交通巴士途經加茂・開往湯野濱溫泉]約35分鐘→加茂水族館巴士站...步行即達
Wi-Fi：有（入口大廳、餐廳、水母大水槽前、海豹游泳池前）
語言：中文、英文
購票方式：現場售票處
信用卡：VISA、MasterCard、JCB、AMERICAN EXPRESS、Diners Club International、Discover card（僅限2樓入口大廳旁紀念品店）