從鹿兒島搭飛機約40分鐘就到屋久島。島上有繩文杉，仲有青苔及森林世界為特色嘅白谷雲水峽等世界知名景點。另外，屋久島上有日式旅館、民宿、酒店等住宿設施。當中最推薦嘅就係島上唯一嘅小型豪華度假型酒店「Sankara Hotel＆Spa」，就等小編為你介紹呢間酒店嘅魅力所在啦。
「sankara hotel&spa屋久島」魅力之1：背山面海、視野絕佳嘅客房
首先，酒店擁有絕佳嘅地理位置，背後有山林，被綠野環繞，前面係一望無際嘅海景。酒店坐落喺亞熱帶雨林中，清涼海風吹拂下可以同時欣賞到鬱鬱蔥蔥嘅森林及汪洋大海嘅美麗風景。
酒店有5種唔同類型嘅客房。標準房型「Sankara Villa」屬別墅型客房，位於森林中，客廳中放置睡床同Sofa床，有著舒適觸感嘅木質裝潢。另外仲設有木質露台嘅海景客房「Sankara Villa Suites」及內附戶外露天浴池嘅房型「Sankara Junior Suites」。
「sankara hotel&spa屋久島」魅力之2：生活用品齊備，從保濕皂到牙刷一應俱全
客房內嘅設施及生活用品齊備又貼心，同時都有顧及到環境保護嘅問題。例如，臉部護膚品、洗面凝膠同基本化妝品，都係以屋久島嘅大自然為主題嘅原創產品，採用Sankara嘅水同屋久島上種植嘅花卉、水果同植物萃取物製成。產品無添加色素、合成香料或防腐劑，所以對皮膚好又環保。其他用品仲有天然豬鬃毛牙刷、經過80日以上熟成期而製成嘅保濕皂，質素好到你唔捨得用，直程想直接帶返屋企添！
「sankara hotel&spa屋久島」魅力之3：餐廳使用嚴選「本地生產、本地食用」嘅食材
酒店內有2間餐廳，充滿休閒氣氛嘅「ayana」餐廳，提供九州當地料理，仲有「okas」餐廳提供法式套餐。兩間餐廳都遵循「本地生產、本地食用」嘅原則，向當地漁民同農民購入海鮮同農產品，嚴選屋久島食材嚟製作料理。小編仲好推薦「ayana」餐廳嘅早餐，有用屋久島嘅水同酵母製作嘅新鮮麵包同美味煙燻飛魚！
「sankara hotel&spa屋久島」魅力之4：參加屋久島旅遊團、秘境瀑布之旅等戶外活動
由酒店專屬導遊帶你遊覽屋久島，共有4種行程可以揀（半日遊每人1萬円起）。另外都有好多豐富嘅戶外活動可以參加，例如安房川獨木舟體驗（半日遊每人8,000円起）、夜間海龜產卵觀察（每人7,000円起），同屋久島能量景點巡禮（半日遊每人1萬円起），以上價格皆未含稅。所有活動都可提供英文導覽。
酒店資訊
- 名稱：sankara hotel & spa屋久島（サンカラ ホテル&スパ屋久島）
- 地址：鹿兒島縣熊毛郡屋久島町麥生字萩野上553
- 交通：配合航班時間，提供從屋久島機場到酒店嘅免費接駁（車程約40分鐘）
- Wi-Fi：有提供（所有客房）
- 語言對應：提供英文導覽簡介
- 可使用信用卡：VISA、MasterCard、JCB、AMERICAN EXPRESS、Diners Club International、UFJ、銀聯
- 住宿費用：1晚2餐1名3萬3,000円起（2人一房的話需另支付費用）
- 辦理入住時間：15:00
- 辦理退房時間：13:00
Comments