小豆島係香川縣瀨戶內海上嘅一個自然環境豐裕嘅離島。島上大部份都係山地，有好多山同海嘅自然風光景點。另外，受惠於小豆島嘅自然環境同適當嘅氣候，島上盛產橄欖、醬油等多種特產。
小豆島嘅簡介
喺7百幾個島嶼嘅瀨戶內海海域中，小豆島係第二大嘅。島上山地多，平地大多於大海沿岸或川流散開。另外，小豆島係日本首個成功培植橄欖嘅地方，所以島上生產嘅橄欖及其加工商品都好出名。
小豆島嘅平均天氣及最佳觀光時期
小豆島全年都比較暖和，而且雨量少，邊個季節都好適合觀光。如果想玩盡成個小豆島，咁春天至秋天就最推薦。因為山頭嘅溪谷附近喺春、夏天時，有各式各樣嘅花卉盛放，而秋天又睇到一大片紅葉美景。而且喺夏天又可以去海灘同陽光玩遊戲，仲有划獨木舟等海上活動。
小豆島必去景點介紹
小豆島上有自然風景、歷史遺跡、神社寺廟、特產美食等充滿魅力嘅觀光景點分散喺各地。以下就為你介紹必去嘅景點。
天使之路（Angel Road）、寒霞溪等大自然創造嘅景觀
小豆島上盡是山林及海洋嘅自然風景，海邊有小瀨海岸、天使之路（Angel Road）等著名絕景；山中有銚子溪、寒霞溪等美麗溪谷。天使之路（Angel Road）係一條沙路連接四個小島，係一個由海洋、島嶼、砂州組成嘅夢幻景觀。其中最特別在於因為潮汐嘅關係，一日之中你只有2次機會睇到呢片砂州，而且只會出現2個鐘㗎咋！所以如果真係想睇呢個絕景，咁去之前就一定要Check清楚潮汐資料啦。
小豆島橄欖公園、MARUKIN 醬油紀念館等小豆島特產相關景點
小豆島唔只係橄欖、醬油等特產嘅生產地咁簡單，仲有好多特產相關嘅觀光景點。小豆島橄欖公園係一個介紹有關橄欖歷史嘅設施，仲參觀到生產橄欖嘅地方，例如種植橄欖嘅橄欖園同進行榨油嘅地方。
另外，小豆島嘅「醬油之鄉」一帶就有好多製作醬油及佃煮（以醬油製作嘅食品）嘅傳統工場。如果去到呢一區，就一定唔可以錯過參觀MARUKIN 醬油紀念館。除咗有展示醬油嘅製作工具，仲有物產館可以俾你買日本醬油返香港煮日式料理，而且仲可試吓食醬油軟雪糕添。
小豆島八十八所寺廟巡禮
小豆島上有88間弘法大師開設嘅真言宗寺院，所組成嘅「小豆島八十八所」巡禮非常出名。而且好多寺廟都建於風光明媚嘅地方，例如山上嘅碁石山可以欣賞到瀨戶內街及街道嘅景色，仲有海邊洞窟內嘅「江洞窟」佛殿等等。要拜訪哂所有寺廟的話，全程要成約150公里，所以旅行時揀幾個去都夠哂啦。
小豆島美食及餐廳
小豆島嘅美食方面，有全人手製作嘅素麵，及以新鮮海產及醬油等特產製作嘅料理等美食可以品嚐。特別推薦一定要試吓小豆島產嘅特產製作嘅料理。例如醬丼飯（ひしお丼）係使用豬肉同海鮮當地食材，加上小豆島產嘅醬油或「諸味（もろみ）」等調味而成嘅丼飯。其他仲有以橄欖作為飼料養育嘅橄欖牛，漢堡肉同牛扒嘅料理都推薦呀！
喺土庄港、草壁港、坂出港等港口地區沿岸都有好多餐廳或住宿設施都有提供以上美食㗎。
小豆島嘅酒店、旅館住宿
小豆島上嘅各個港口附近都有好多住宿設施，例如以土庄港為中心嘅街區最多酒店、旅館同民宿。其他地區雖然相對較少，但喺草壁港、坂出港周邊都有住宿選擇。
土庄港地區有房價約5,000円前後嘅住宿選擇，其中仲有啲客房可以望到海景添。
小豆島嘅交通資訊
來往小豆島至日本本州或日本四國地區的話要搭船，雖然島上有幾個碼頭都可以搭到去，但提供最多班次嘅就係土庄港，而且去其他景點都好方便，要去小豆島揀呢個碼頭就最好。
從本州地區出發，即係岡山縣嘅新岡山港碼頭的話，搭1小時10分鐘就到。從四國出發的話，香川縣嘅高松港碼頭搭高速船都係35分鐘添咋。
另外，土庄港碼頭有特產小賣店同提供觀光資訊單張嘅土庄港觀光中心。而且仲有多條巴士路線通往島上各個景點，如果想喺小豆島玩的話利用呢個碼頭就最方便啦。
景點資訊
- 名稱：小豆島（土庄港觀光中心）
- 地址：〒761-4104 香川縣小豆郡土庄町甲6194-10
- 交通：新岡山港→[船]約1時間10分鐘→土庄港 / 高松港→[高速船]約35分鐘→土庄港
- Wi-Fi支援：有（KAGAWA Wi-Fi）
- 語言對應：中文、英文、韓文
- 可使用信用卡：VISA, MasterCard, JCB, AMERICAN EXPRESS, Diners Club International
Comments