高松市係日本四國地區香川縣內，面向瀨戶內海嘅都市。舊時作為高松城嘅城下町（以領主城堡為中心向外發展嘅城市地帶）而繁榮起盛起來。高松市內有好多香川縣特產—讚岐烏冬名店，仲有使用瀨戶內海捕獲嘅海鮮製作嘅料理都好豐富呀。
高松的基本簡介
香川縣嘅縣廳就坐落於高松市，所以亦可以講話係日本四國地區嘅中心都市。南部有讚岐山脈、丘陵地帶等自然環境，北部有面向瀨戶內海嘅平坦市鎮街區。而且，高松對出瀨戶內海中嘅男木島、女木島等離島作為觀光旅行地點都受到注目呀！
高松嘅天氣狀況及觀光最佳時期
高松嘅氣溫比較溫暖，年間雨量少，所以一年中都好適合觀光旅遊。但當中最推薦都係春天去，到時高松市內各個公園，或者女木島等有好多著名賞櫻地點，去日本望住一街櫻花嘅美景就最開心！
去邊玩好？高松嘅景點介紹
高松嘅主要觀光景點集中喺北部市中心位置，從歷史性景點到現代化嘅觀光設施、各式各樣充滿魅力嘅景點都有！小編就為大家介紹一下高松嘅景點先。
高松城、栗林公園等見證高松歷史的景點
高松市內有古時作為山城嘅古代山城屋嶋城，亦有16世紀建造嘅高松城等多個歷史遺跡。而面向瀨戶內海嘅高松城見證過不少歷史往事，城內有作為防禦作用同瞭望台嘅「櫓」、城主別墅嘅「披雲閣」等，有好多歷史建築物可以觀賞得到。
另外，都好推薦去埋另一個好有歷史性嘅日本庭園—「栗林公園」。古時高松藩主將第二住宅嘅別墅建立於此，日本著名嘅日式庭園之中係最大規模嘅。廣大嘅園內有水池、人造山丘、岩石造景、木造橋等，每行一步都可以欣賞不同美景，淨係睇庭園景色都好值得去！
屋島寺等位於高松嘅寺廟神社
喺高松有好多「四國八十八」嘅靈場（靈魂、靈氣聚集嘅寺社），寺廟方面有屋島寺、八栗寺；神社方面有田村神社、屋島神社等等。
當中屋島寺好出名，寺內有於17世紀建造、富有日式傳統建築風格嘅本殿，充滿莊嚴氣氛，更被列為國家重要文化財產。其他仲有收藏珍貴寺廟寶物嘅寶物館、以巨大狸之石像代表福運嘅蓑山大明神等等都係一大睇頭。
高松市美術館等博物館
除咗歷史建築物，高松仲有美術館、博物館、民俗資料館等多個觀光景點。例如喺高松市美術館有展示日本現代美術作品、香川縣嘅漆器工藝品、金屬工藝品等日本傳統工藝。
此外，香川縣立博物館係一座將歷史及美術融為一體嘅設施。透過館內嘅展品，唔只可以了解更多香川縣嘅歷史，仲可以鑑賞到豬熊弦一郎、Isamu Noguchi等香川縣嘅著名藝術家嘅美術作品
高松嘅美食同餐廳
高松有非常多提供香川縣特產—讚岐烏冬嘅店舖，仲有使用瀨戶內海嘅海產製成嘅料理都好出名，例鰆魚押壽司（鰆の押し抜き鮨）等。
基本上喺JR高松站、琴平電氣鐵道瓦町站等北部市中心地區附近都有好多飲食店。
高松嘅酒店、旅館住宿分佈
位於高松北部同南部嘅酒店、旅館都有唔同特徵。北部以JR高松站為中心嘅北部市中心集中有酒店、旅館、Guesthouse等。特別房價大約3,000至5,000円嘅經濟型酒店有好多，啱哂想去窮遊嘅你！
而南部方面就唔多住宿選擇，山中嘅塩江溫泉區雖然得幾間酒店或旅館，但喺寧靜嘅環境中享受浸溫泉都係唔錯嘅選擇。
高松嘅交通資訊
想去高松玩，首先去JR高松站就最好喇，因為有好多電車、新幹線會停經高松站，例如從JR岡山搭快速Marine Liner（マリンライナー）列車去高松站都係1個鐘就到。亦可以搭高速巴士從日本其他地方過去高松玩。
去到JR高松站就可以搭循環巴士Murakawa Loop Bus（まちなかループバス）去高松各個景點。仲有從JR高松站行5分鐘就到嘅琴平電氣鐵道去其他景點都好方便。
JR高松站嘅觀光旅遊資訊中心有識得中文、英文、韓文嘅工作人員，仲有提供平板電腦畀你尋找旅遊資料，而且都唔使錢㗎。
景點資訊
- 名稱：高松（JR高松站）
- 地址：〒760-0011 香川縣高松市浜ノ町1-20
- 交通：JR岡山站→[JR Marine Liner（マリンライナー）]約1小時→高松站
- Wi-Fi支援：有（KAGAWA Wi-Fi）
- 語言對應：中文、英文、韓文English, Chinese, Korean
- 可使用信用卡：VISA, MasterCard, JCB, AMERICAN EXPRESS, Diners Club International
Comments