位於京都東山地區，從八坂神社行過去只需約10分鐘路程嘅青蓮院，係天台宗三門跡寺院之一，擁有美麗日式庭園而聞名。每年於春天及秋天夜晚會舉辦特別參拜及亮燈活動，吸引眾多遊客造訪。
關於青蓮院
青蓮院為天台宗三門跡寺院之一。門跡即係由皇室或貴族擔任住持（日文稱為門主）承繼嘅上流寺院。而青蓮院自被鳥羽法皇定為門跡寺院開始，由皇族擔任住持代代相傳。
京都青蓮院特色之處
進入青蓮院除咗參拜殿舍後，一定要去埋欣賞日本庭園！以龍心池為中心展開嘅庭園，係由室町時代畫家相阿彌所創造。龍心池內有一道以兩個花崗岩組成半圓拱形嘅美麗石橋「跨龍橋」，仲有洗心瀑布相映成趣。而龍心池中央嘅大石猶如「淋浴於水中嘅龍脊」，滿有詩情畫意。而5月頭喺「霧島之庭」仲可以欣賞到霧島杜鵑綻放嘅花景添。另外，擺放於本堂內嘅「熾盛光如來」都唔好錯過吖！
京都青蓮院的歷史
據聞日本天台宗嘅祖先「最澄（傳教大師）」於比叡山開創延曆寺，於各地設置僧侶住坊。其中一個就係「青蓮坊」，據聞呢個就係青蓮院嘅起源。其後作為円仁（慈覺大師）、安恵等著名僧侶嘅居所。青蓮院最繁榮嘅時期係由平安末期至鎌倉時代，至第三代住持「慈圓」嘅時期。於江戶時代天明8年（1788），由於皇室所居住嘅御所遭受火災，青蓮坊亦作為後櫻町上皇臨時居住嘅地方。
開放時間及費用資料
開放時間為09:00至17:00（16:30截止入場），參拜費用為500円。春天及秋天設有夜間特別參拜及亮燈活動。往年春天嘅夜間特別參拜期間從3月中至5月頭、秋天從10月底至12月頭舉行，由18:00開放至22:00（21:30截止入場），參拜費用為800円。
春季亮燈活動
青蓮院喺春天及秋天都進行夜間亮燈活動，屆時會點亮約1,000盞大大小小嘅照明燈器，照亮院內高雅嘅池泉廻遊式庭園及全體寺院。
景點資訊
- 景點名稱 : 青蓮院
地址： 〒605-0035 京都府京都市東山區粟田口三條坊町69−1
- 交通方式：乘搭京都市營巴士5・46・100路線，到神宮道站落車，徒步約3分鐘。或乘搭地下鐵東西線至東山站落車行約5分鐘抵達
Comments