奈良嘅新藥師寺距離奈良公園以南行約五分鐘嘅地方，圍繞本尊「藥師如來」嘅十二神將立像非常出名。周邊環境充滿田園風光，幽靜令人放鬆。春天嘅櫻花、秋天嘅紅葉都非常美麗，好多遊客都會喺呢兩個季節前往參觀。
關於新藥師寺
新藥師寺創建於天平19年（747年），係當時嘅光明皇后為咗祈禱聖武天皇嘅眼病能夠早日治癒而下令建造嘅。創建當初嘅寺院規模龐大，僧侶多達一千人。但係到咗平安時代，主要嘅伽藍（即寺院）因暴風雨而倒塌損毀，只剩下本堂仍以當時嘅模樣保存至今。新藥師寺內，可以睇到包括本堂嘅本尊—藥師如來坐像、圍繞藥師如來嘅十二神將立像等13個國寶，仲有鐘樓、南門、東門、地藏堂等4個重要文化財。
新藥師寺嘅鑑賞重點
從新藥師寺嘅南門入去，正面映入眼簾嘅就係建造於天平時代嘅「本堂」。以創建當時嘅樣貌保留至今，外型相對比較簡潔樸素，屋頂嘅坡度曲線非常漂亮。本堂內，圍繞藥師如來嘅十二神將立像係必睇之處！堂內中央係一個塗上白灰漿嘅圓形土壇（高約90米、直徑約9米)，上面安置咗本尊藥師如來坐像，周圍環繞擺放著十二神將立像。十二神將立像包括伐折羅大將、迷企羅大將、招杜羅大將等十二尊臉帶威嚴、憤怒表情，等身大小嘅雕像，擔任著守護藥師如來坐像嘅角色。等身大小嘅造像刻畫得惟妙惟肖，望耐咗，可能像真到會產生「話唔定會郁喎」嘅奇妙想法呢。
本尊藥師如來坐像高約190米，係由一整棵樹木雕刻而成。左手拎住藥壺、眼睛睜得大一大。呢尊藥師如來嘅眼睛特別大且美，至今仍有好多人特地去祈求眼疾早日治癒。喺鎌倉時代建造嘅鐘樓、雄偉壯觀嘅南門都係值得一睇㗎。
去新藥師寺嘅交通方式
從JR奈良站搭乘巴士「奈良交通62系統、往山村町方向」或「奈良交通2系統外循環、往近鐵奈良站方向」，車程約15分鐘，於巴士站「破石町」落車後步行10分鐘。搭計程車嘅話，從JR或近鐵「奈良站」出發前往新藥師寺，車程約10分鐘。
景點資訊
- 名稱：新藥師寺
- 地址：奈良縣奈良市高畑福井町1352
- 對應語言：現場有提供英文嘅導覽手冊
- 入場費：600円
- 開放時間：09:00～17:00
- 休息日：全年無休
Comments