奈良吉野必食5大特產推薦餐廳&和菓子店

奈良縣吉野町有好多可以品嚐吉野名產美食嘅餐廳同和菓子店。以下要為大家介紹吉野必食5大特產。記住要買返香港做手信啦～

奈良吉野必食：柿葉壽司

柿葉壽司係吉野地區具代表性嘅鄉土料理。喺醋飯上面放醃漬過嘅鹽味鲭魚，再用柿子葉包成壽司後，一個個放入木盒，放置一晚就完成。鯖魚嘅味道鮮美、搭配酸度適中嘅醋飯，食落仲帶淡淡柿葉香氣，簡直係絕妙配搭。

想食柿葉壽司，推薦去創業超過100年嘅「Yakko（やっこ）」同創業超過50年嘅「醍予（Daiyo）」等知名老店。

葛烏冬（葛，又名黃斤）使用添加咗吉野特產嘅葛粉製成，麵條光滑柔軟易入口，可以食到葛嘅原味。有多種食法，例如天婦羅烏冬、鴨肉烏冬等代表性嘅熱湯日式烏冬。

提供葛烏冬嘅餐廳唔多，但可以試吓去「靜亭」同「西澤屋」等日式料理店都可以食到。

草麻糬（草餅）係一種用艾草做成嘅和菓子，外皮係鮮明草綠色。咬一啖後，淡淡嘅艾草清香喺口中蔓延，艾草嘅苦味同甜而不膩嘅紅豆餡取得妙絕嘅平衡感。

草麻糬（草餅）嘅和菓子名店有「萬松堂」。而餐廳「花見亭」更可以食到「烤」嘅香草餅，或加咗櫻花同艾草等嘅白、綠、粉紅色組成嘅「三色團子」，仲有其他用艾草製成嘅和菓子添。

櫻羊羹係賞櫻名勝吉野當中非常具代表性嘅一種和菓子。櫻羊羹分為兩層或三層，外觀非常漂亮。製作方式因店而異，但下層基本上係紅豆餡，上層係加咗鹽漬櫻花嘅洋菜啫哩，櫻花嘅香氣中帶有恰到好處嘅鹽味，食起嚟既清爽又甜而不膩。

「舟形家」、「近藤商店」等和菓子店賣嘅「櫻羊羹」都好出名。另外，餐廳「花見亭」都可以食得到㗎。

「葛甜品」係使用用水同吉野特產—葛粉製作而成嘅簡單夏日甜品，半透明狀呈現清涼感，而且口感清爽彈牙、潤喉易食。有各種各樣嘅食法，例如可以切成一口大小，沾黃豆粉食嘅「葛餅」；切成又長又幼嘅透明條狀，沾黑糖食嘅「葛切」。

有賣「葛甜品」嘅日式料理店、和菓子店有好多，其中特別出名嘅店有「中井春風堂」同「芳魂庵」。