鄰近東京都嘅千葉縣，有東京迪士尼度假區®、東京德國村、成田山同鋸山等好多充滿魅力嘅觀光景點。就算唔去東京，飛到成田國際機場去千葉玩吓都好吖！
喺呢篇文章就等我哋介紹吓千葉旅遊時推薦嘅幾間酒店住宿啦。
千葉 格蘭花園Panex酒店
千葉 格蘭花園Panex酒店係既經濟實惠、交通方便、設計時尚嘅商務酒店。
附近有千葉市動物公園同千葉港展望塔等景點，距離「幕張展覽館」、「東京迪士尼度假區®」、甚至東京車站都只係一個鐘車程就到。作為千葉旅行嘅落腳地入住都唔錯呀。
館內嘅餐廳「Hale Ku Lani」提供自助餐早餐，有健康和食、西式、中式等合計共30種以上嘅食物任君選擇。而午餐時段則提供可從肉類、魚類、義粉等當中揀一款喜歡嘅主菜，加上其他配菜小食、甜品等都以自助餐形式提供，連午餐都咁豐富！淨係食都夠唒開心～
此外，酒店內設有大浴場，行完一山去浸返個熱水澡，放鬆舒解旅途疲勞，住得舒適。
旅館資訊
- 名稱：千葉 格蘭花園Panex酒店（Grand Park Hotel Panex Chiba）
- 地址：千葉縣千葉市若葉區殿台町123-4
- 交通方式：距離JR千葉站車程約12分鐘
- Wi-Fi：有
- 語言：無
- 信用卡：可使用
三井花園飯店 千葉
「三井花園飯店 千葉」係氣氛沉靜舒適、具有高級感嘅酒店。客房幾乎都係西式客房，但亦有日式和室房可以揀。如果係2至4人入住，推薦可以體驗有榻榻米嘅和室都唔錯呀。
酒店嘅餐廳都使用當地食材製作美味料理嘅日本料理餐廳，仲有貴賓室、酒吧等等，係同三五知己休閒談心嘅好地方。
早餐為自助式早餐，當中嘅食物仲有千葉特產美食嘅「魚丸子湯（つみれ汁）」同「海藻湯（あおさ汁）」添！相當推薦你一定要食呢啲千葉嘅當地特色美食啦。
住喺呢間酒店，無論係要去房總方面定係東京市區，交通都好方便，到千葉觀光旅遊時不妨參考吓喇。
旅館資訊
- 名稱：三井花園飯店 千葉（Mitsui Garden Hotel Chiba）
- 地址：千葉縣中央區中央1-11-1
- 交通方式：距離JR千葉站東口徒步約7分鐘
- Wi-Fi：有
- 語言：英文
- 信用卡：可使用
東京迪士尼樂祥飯店®
「東京迪士尼樂祥飯店®」係距離東京迪士尼度假區®搭免費接駁巴士車程約20分鐘嘅旅館。
東京迪士尼樂祥飯店®有2棟酒店，分別係以「冒險和發現」為主題嘅「探索館」同以「夢想和幻想」為主題嘅「心願館」。各館皆以符合主題嘅裝飾擺設布置，可以盡情享受迪士尼嘅世界，住喺酒店嘅同時都可以體驗好似喺東京迪士尼度假區®玩緊嘅氣氛。
特別人數多時，仲有較平易近人嘅房價入住添。如果一直都覺得迪士尼酒店太貴，住唔起嘅朋友，不妨參考吓呢間「經濟型」嘅迪士尼官方酒店呀。
旅館資訊
- 名稱：東京迪士尼樂祥飯店®（Tokyo Disney Celebration Hotel®）
- 地址：千葉縣浦安市明海7-1-1
- 交通方式：從JR舞濱站搭乘免費接駁巴士車程約20分鐘
- Wi-Fi：有
- 語言：無
- 信用卡：可使用
Comments