日光市位於北關東栃木縣，擁有豐富大自然，同被列入世界遺產嘅寺廟神社等觀光景點。從東京出發都只係需要2個鐘就可以抵達日光市，去個一日遊都唔錯呀！
日光：日本山岳信仰的聖地
日光大半個地區都被山林覆蓋，係個自然環境豐裕嘅山林小鎮。自古以來都係日本山岳信仰（將山作為神聖崇拜對象嘅一種信仰）嘅聖地。後來為祭祀江戶時代嘅初代將軍—德川家康，而建立日光東照宮。而日光就作為日光東照宮嘅門前町而發展起來，繁榮至今。
日光的氣候、最佳觀光季節
日光被稱為「關東的雪櫃」，全年氣溫較低。雖然夏季濕氣少，比較舒適涼爽，但冬季天氣就好嚴峻。全年都可以去觀光旅遊，但特別推薦秋天。有「伊呂波山道（いろは坂）」，「龍王峽」等關東地區知名嘅紅葉景點。
日光必去景點
日光可以分為三大地區。寺廟神社聚集嘅「世界遺產區」、以鬼怒川溫泉為中心嘅「鬼怒川地區」，以及中禪寺湖等自然豐富嘅「奧日光地區」。以下要為大家介紹各地區嘅推薦景點。
日光東照宮等具日本代表性嘅寺廟神社
歷史悠久嘅日光寺廟神社聚集喺日光車站附近。喺呢個「世界遺產區」入面嘅日光東照宮、二荒山神社、輪王寺合稱為「二社一寺」。其中「日光東照宮」更係日光代表性嘅觀光景點。以祭祀江戶幕府初代將軍—德川家康神格化後嘅神明「東照大權現」的華麗正殿而聞名。
日光自然景點~感受日本四季嘅健行體驗 ~
被自然環繞嘅日光有多行山路徑。其中以奧日光地區嘅「戰場之原」最出名。戰場之原位於日光國立公園內，係海拔1400米嘅高地濕原。尤其喺紅葉季節，逐漸染紅染黃嘅奧日光山頭最靚！
感受日本文化！EDO WONDERLAND 日光江戶村等人氣觀光景點
鬼怒川溫泉地區有「日光江戶村」同「東武世界廣場」兩大主題樂園。「日光江戶村」重現江戶時代嘅街景。除咗可以喺主題樂園內著和服，仲可以扮演忍者或武士修行等獨特體驗。而「東武世界廣場」則以1:25嘅比例精巧重現世界遺產在內嘅世界知名建築物，就好似小人國咁，嚟呢度當環遊世界一周咁都幾得意吖！
日光推薦必食美食
以大豆製成豆腐皮嘅「湯波」係日光名產料理之一。可以直接食，或者有湯波可樂餅、湯波蕎麥麵、湯波和菓子等各種食法。想試吓湯波嘅味道，推薦去日光站同東武日光站附近嘅日式料理店同和菓子店。
體驗周到的日式服務！日光的酒店及溫泉旅館
日光嘅住宿設施分佈喺日光站同東武日光站附近、中禪寺湖附近同鬼怒川溫泉地區等。車站附近有好多價錢實惠嘅酒店。另外，鬼怒川溫泉地區仲有「ASAYA HOTEL」，「鬼怒川金谷酒店」等可以享受天然溫泉，輕鬆一下。
從東京出發去日光嘅交通方式
喺東京出發的話可以從新宿站乘搭「JR日光號」，所需時間大約2個鐘，至東武日光站嘅單程車費為4,000円。（截止2019年5月資訊）
景點資訊
- 景點名稱：日光（東武日光站）
- 地址：栃木縣日光市松原町4-3
- 交通方式：新宿站乘搭特急列車約2個鐘
- 是否提供Wi-Fi :有（Nikko City Wi-Fi）
- 對應語言：中文、英文
- 購票地方：各指定車站
- 可使用信用卡：VISA, MasterCard, JCB, AMERICAN EXPRESS, Diners Club International（根據店鋪而定）
Comments