![野澤溫泉村:名符其實的溫泉村](https://content.fun-japan.jp/renewal-prod/cms/articles/content/b1f3378020c94cc5e1e8279904b126dbcedbf3d7.jpg)
野澤溫泉係長野數一數二嘅溫泉地。除咗有滑雪度假村,仲有有各種休閒景點。
關於野澤溫泉村
![野澤溫泉村:名符其實的溫泉村](https://content.fun-japan.jp/renewal-prod/cms/articles/content/e378fa55b3f632ea58aa57bc31145a78136a1ab4.jpg)
位於長野北部嘅野澤溫泉村,係一個總面積約58平方公里嘅小村莊,其中一半為森林地帶。除咗有溫泉同滑雪場,被指定為國家重點無形民俗文化遺產嘅日本三大火祭之一嘅「道祖神祭」都非常出名㗎。
野澤溫泉村嘅氣候、推薦觀光季節
野澤溫泉村全年平均氣溫低至9.5℃,冬季更加會落大雪,係全國首屈一指嘅豪雪地帶。全年都可以享受浸溫泉。亦推薦喺冬季至春季期間嚟呢度滑雪。
去野澤溫泉村有咩好玩?
野澤溫泉村嘅溫泉同自然觀光景點都不容錯過。今次就由小編帶大家玩轉野澤溫泉村啦!
野澤溫泉村溫泉巡禮
![野澤溫泉村:名符其實的溫泉村](https://content.fun-japan.jp/renewal-prod/cms/articles/content/4e50169b380a91e9a5a5e9ccc38b69442e876056.jpg)
野澤溫泉村內有13個公眾浴場及足湯,係一個可以隨時隨地享受浸溫泉嘅地方。另外仲有各種泉質,無論係氣味、顏色、肌膚觸感等都有所不同。就算介意人前浸溫泉都建議浸吓足湯,體驗唔同嘅泉質!
野澤溫泉滑雪場
![野澤溫泉村:名符其實的溫泉村](https://content.fun-japan.jp/renewal-prod/cms/articles/content/c1d69d808e2228a3abc1acd8e663de7cc7c8cca6.jpg)
「野澤溫泉滑雪場」位於海拔約1,650米嘅「毛無山」。可以於天然嘅粉雪上體驗單板或雙板滑雪。不過就算唔係雪季,都可以去「上之平高原」遠足行山。另外,仲可以體驗吓喺海拔122米高,全日本最長嘅高空滑索嘅「Zip Sky Ride」。
野澤溫泉村嘅美食
野澤溫泉村嘅餐廳大部份都係集中喺溫泉街。
推薦喺酒吧享用當地名酒
去野澤溫泉嘅話,咁就一定要試吓以野澤溫泉嘅名水所釀造嘅日本酒「水尾」等當地名酒。推薦「狸 tanuki bar」、「HAKUNA MATATA」等提供當地名酒嘅酒吧,出發之前記得事先check好營業時間啦!
於野澤溫泉享用壽司
![野澤溫泉村:名符其實的溫泉村](https://content.fun-japan.jp/renewal-prod/cms/articles/content/18245273c843a83f9b3ad94eb94bd23651716d66.jpg)
於野澤溫泉內嘅壽司店或溫泉旅館可以享用壽司。另外,野澤溫泉係「野澤菜」呢個日本蔬菜其中一個著名嘅產地。店鋪自家醃製嘅「野澤菜」漬物係知名嘅傳統料理。落單叫一份壽司或海鮮丼就會隨餐附送,一場嚟到點都要試吓啦!
野沢溫泉村嘅酒店、旅館住宿
![野澤溫泉村:名符其實的溫泉村](https://content.fun-japan.jp/renewal-prod/cms/articles/content/159b0577b2049b8e1c22252368e93253409c7c76.jpg)
野沢溫泉村以野澤溫泉街為中心,有酒店、溫泉旅館、民宿等住宿設施。另外,滑雪場附近仲有小木屋、渡假別墅等等。
從東京出發去野澤溫泉村嘅交通方式
從東京出發嘅話,從東京站乘搭北陸新幹線最方便。約1小時50分鐘至飯山站,轉乘直通巴士約25分鐘抵達。
景點資訊
- 景點名稱:野澤溫泉村(野沢温泉中央ターミナル)
- 地址:長野縣下高井郡野澤溫泉村豐郷
- 交通方式:從東京站乘搭新幹線約1小時50分鐘至飯山站,再乘搭直達巴士「野澤温泉liner (ライナー)」或路線巴士「長電巴士飯山野澤線」即可到達野澤溫泉村
- 是否提供Wi-Fi:有(根據住宿設施而定)
- 對應語言:英文
- 可否使用信用卡:不支援
Comments