宮城縣仙台市嘅瑞鳳殿，係戰國武將伊達政宗嘅御靈屋(即靈廟)。呢個係仙台市內眾多與伊達政宗有關嘅古蹟之一，仙台市觀光一定要去嘅景點。據聞瑞鳳殿設置喺經峰（經ヶ峰）呢個地方係伊達政宗生前親自指定，希望作為佢死後嘅埋葬之處。瑞鳳殿深具桃山文化風格嘅華麗建築特色係其參觀重點。
關於瑞鳳殿
瑞鳳殿位於一座名為經峰（經ヶ峰）嘅小山丘上，正面朝向仙台城本丸。瑞鳳殿遵循伊達政宗嘅遺言，於寛永14年（1637年）建造「靈廟」安葬佢嘅地方。瑞鳳殿由本殿、拜殿、唐門、御供所、涅槃門等部份組成。
於昭和20年（1945年）仙台空襲時燒毀，於昭和54年（1979年）重建。作為江戶時代早期嘅禪宗建築，瑞鳳殿喺昭和6年（1931年）被指定為國寶。瑞鳳殿設有仙台二代藩主・伊達忠宗嘅靈廟－感仙殿、三代藩主・伊達綱宗嘅靈廟－善應殿等伊達家族歷代藩主嘅陵墓。
關於伊達政宗
伊達政宗於永祿10年（1567年）出生於出羽國米澤城（而家嘅山形縣米澤市）。喺慶長5年（1600年）嘅關原之戰中，伊達家支持東軍德川家，之後伊達政宗成為仙台藩嘅初代藩主，修築咗仙台城，將其名稱從千代改成仙台城。仲進行咗防洪工程及土地開墾。身為一名武將同文化人，即使到咗而家，伊達政宗仍然備受日本人民嘅愛戴。
瑞鳳殿參觀重點
瑞鳳殿嘅參觀亮點係華麗嘅靈屋。以黑漆塗色為基調，再施以艷麗嘅紅色同黃色、光彩奪目嘅金箔装飾及精緻彫刻，顯露出伊達政宗嘅品味。另外，通往瑞鳳殿嘅參拜道石階有62級（目前有63級），傳說中石階嘅數量象徵仙台藩62萬石嘅產米量。秋季可以欣賞美麗嘅紅葉，到咗11月頭到中旬，週末仲會有紅葉夜間點燈活動，營造出夢幻氛圍。另外隔離有一個「瑞鳳殿資料館」，播放發掘調查嘅紀錄短片，並展示出當時出土嘅陪葬品及相關文物，都相當值得一睇。
如何前往瑞鳳殿
從JR「仙台」站開車約10分鐘；或乘搭「LOOPLE仙台巴士」車程約15分鐘，於「瑞鳳殿前」落車。從仙台站前出發嘅「LOOPLE仙台巴士」首班車喺上午9點開出，平日每隔20分鐘一班，周末假日每隔15分鐘一班，於第4個站「瑞鳳殿」落車。如果乘搭地鐵，於仙台市營地鐵東西線「大町西公園站」落車後，步行約15～20分鐘即可抵達。
景點資訊
- 名稱：瑞鳳殿
- 住所：〒980-0814 宮城縣仙台市青葉區靈屋下23-2
- 門票：成人550円、高中生400円、初中生小學生200円
- 開放時間:
- 2月1日～11月30日09:00～16:30（入館截止時間）
- 12月1日～1月31日09:00～16:00（入館截止時間）
- 休息日：12月31日
照片提供：公益財團法人 瑞鳳殿
Comments