去名古屋旅遊時必訪長島度假村嘅3個理由

距離名古屋車站約30分車程嘅「長島度假村」，擁有去日本旅遊不可或缺嘅要素「溫泉」、「自然」、「購物」，一次過滿足你三個願望嘅人氣度假村。今次小編就要向大家介紹長島度假村嘅魅力之處、住宿設施、交通方式等等，睇完之後話唔定即刻就想嚟一趟名古屋之旅！

必訪長島度假村嘅理由之一・溫泉設施

可以話係日本最大型嘅自然露天溫泉「湯浴之島」。男湯同女湯加上嚟總共有17種類嘅溫泉。秋季欣賞楓葉、冬季則係雪景，喺大自然環境當中體驗難以忘懷嘅浸溫泉樂趣。

浴衣可免費租借，如此日式嘅體驗千祈唔好錯過。

位於長島度假村嘅「名花之里」，四季更迭有唔同嘅花卉綻放。特別係每年10月到第二年3月上旬左右嘅「冬之輝煌」冬季燈彩活動最受歡迎。光之隧道及夜間燈光照亮嘅花卉景色，係情侶最佳嘅浪漫約會好去處。

約有58種類遊樂設施嘅「長島樂園」。熱愛過山車嘅愛好者絕對唔可以錯過。

此外，仲有日本最大規模、約有300間以上店舖嘅「MITSUI OUTLET PARK 爵士之夢長島」，可以嚟呢度盡情享受購物樂趣。餐廳亦相當充實，更有受小朋友歡迎嘅「名古屋麵包超人兒童博物館＆公園」，適合一家大細嚟呢度度過愉快嘅時光。

長島度假村喺4〜6月、9〜10月期間通常都係喺20度左右嘅氣溫，適合觀光旅遊。1月最低氣溫降至0度左右，而7～8月則係持續超過30度嘅炎熱夏天，不過唔使擔心，園區內設有游泳池可以玩水消暑。

長島度假村有3間官方嘅住宿設施。高級酒店「花水木酒店」、「橄欖花園酒店」以及「長島酒店」。住宿房客可享有長島度假村相關設施嘅優惠折扣。

喺長島度假村，溫泉、燈彩、遊樂園各自需要入場門票。亦有同住宿或巴士一齊販售嘅套票，請事先check官網確認。

門票售票窗口有時需要排好長隊，建議事先預約購票。預售票可以在日本嘅FamilyMart或7-Eleven便利店、灣岸長島停車場等地方買到。

距離長島度假村最近嘅車站係JR・近鐵線「桑名站」。從東京、橫濱、大阪、神戶、名古屋都有直通巴士可以乘搭，輕輕鬆鬆就抵達長島度假村。

鄰近名古屋嘅長島度假村，係你去名古屋旅遊嗰陣必訪嘅景點。