戀愛。
呢個混合甜酸味嘅詞彙，雖然到咗呢個年齡已經同佢有咗距離感，但有時都會諗，
就算去到幾多歲都好，都會想擁有心動（キュン）嘅感覺。無錯，想擁有心動不已嘅感覺！！！
即使係大人都想擁有心動不已嘅感覺！
為咗搵返就快被遺忘嘅心動感覺，我去咗呢度。
少女漫畫館 TAKI 1735
店內竟然有1萬本少女漫畫！
哇～～！！本本都好懷念啊！
到底應該重溫自己鐘意過嘅漫畫，
定係閱讀鐘意嘅作者嘅新作呢。
啊，呢本咪就係最近真人版電視劇嘅原作？好有興趣添！
連拍拉圖式戀愛係啲乜都唔知嘅年少時代
『小小戀愛物語（小さな恋のものがたり）』
呢個係從1962年起連載嘅4格漫畫。
小編嘅屋企管得嚴，從細個開始就被禁止睇漫畫。
只有呢套漫畫排列喺媽媽嘅書櫃，係唯一一本可以堂堂正正咁閱讀嘅漫畫！
跟住向我最鐘意嘅少女漫畫埋手。
就係大家都知道嘅『NANA』作者，矢澤愛嘅『我不是天使（天使なんかじゃない）』。
王道學園少女漫，角色人物描繪鮮明細膩，魅力十足。
特別係女主角小翠，性格開朗活潑，令人憧憬
充滿戀愛嘅焦慮感，富有青春氣息，描繪咗糾葛嘅人際關係。
對於當時仲係一個學生嘅我，非常享受代入故事當中。
跟住落嚟嘅係，對我影響深遠，至今我嘅心仲離唔開佢嘅作品，就係
小花美穗嘅『玩偶遊戲（こどものおもちゃ）』
呢個係一個少女童星紗男同外表冷酷嘅羽山之間嘅校園愛情故事。
紗南純真天然，開朗活潑嘅性格令我印象深刻。
仲有當紗南失落嗰陣，養母同佢講嘅「要在逆境中快樂的生活」呢番話。
另外，唔容易相信人，心態扭曲嘅羽山黑化嘅情節等等，
至今都係我嘅心頭好！
心跳加速120%！！！
並唔係普普通通嘅漫畫café，而係專屬於自己嘅博物館
少女漫畫館 TAKI 1735係由5年前移居東京嘅志村Sakura (志村さくら)所開設嘅。
最得意嘅係，呢個地方並唔係普普通通嘅漫畫café，
而係一間博物館。
呢間小小博物館開設嘅契機係於1997年，志村Sakura喺東京秋留野市同營運少女漫畫館嘅夫婦相遇而開始。
志村Sakura同對夫婦二人好投契，有相同價值觀，所以承繼咗經營竅門同開始接受少女漫畫嘅捐贈，並於3年前開張大吉。
客人所捐贈嘅漫畫有所增加，所以店鋪都慢慢發揚光大。
為咗吸引更多人到訪，仲設置咗café，可以喺度慢慢享用午餐或者係嘆返杯下午茶，談天說地，度過一個悠閒嘅下午時光。
～1735蛋包飯～圖片來自Instagram
免費入場，歡迎大家來臨。
1樓擺設咗各大出版社旗下嘅少女漫畫，例如有RIBON（集英社出版）NAKAYOSHI(講談社出版)，MAGARET(集英社出版)等等。而較為成人傾向嘅作品擺放於2樓。
2樓限中學生以上才可入場。
據聞而家一到咗黃昏傍晚，小學生都會嚟呢度，做好功課，睇完漫畫先返屋企。
小學高年級嘅小妹妹不時向啲行上去2樓嘅姐姐投放羨慕嘅眼神，
”佢哋就好啦～”。
呢個仲唔係所謂嘅通往大人嘅階級？！
推薦俾連男性都適合睇嘅少女漫畫係？！
店鋪名稱”1735”，睇落意味深遠嘅數字。
其實就係呢度嘅門牌地址。
店內書棚擺滿少女漫畫，充滿少女氣息嘅氣氛，而店名較為中性嘅數字，內裡裝潢亦簡單時尚。
所以呢度即使有男性嘅出現亦毫無違和感。
―—咁適合男性閱讀嘅漫畫都有邊啲呢？
志村Sakura：「BANANAFISH、秘密、土星公寓等等都好受男性歡迎㗎！」
志村Sakura：「仲有呢一套我個人非常鐘意，非常推薦嘅作品。佢就係由三重縣津市出身嘅板羽皆所畫嘅Samuraikaasan (サムライカアサン)。」
Samuraikaasan係一個關於母親同反抗期嘅兒子之間嘅溫情故事，連男性都睇到又喊又笑。
閱讀漫畫嘅奢華時光。
少女漫畫，到底對我哋嚟講重唔重要呢？
雖然唔算係日常生活中嘅必須品，但絕對係慰藉心靈嘅甜美事物！
品嚐咖啡嘅同時，沉醉於不被打擾嘅午後甜美時光。
喺呢度渡過下午時光，可以令沉睡於身體內嘅少女之心甦醒，感受返戀愛嘅純真美好，
正因為長大成人，更加體會到戀愛錯綜複雜嘅滋味…
觸摸即將被遺忘嘅心動感覺，淨化被世間磨損嘅心靈，
就連思考都變得清晰遼闊～
Photo by y_imura
少女漫畫館 TAKI 1735 (少女まんが館 TAKI 1735)
- 地址：三重縣多氣郡多氣町丹生1735
- 電話： 0598-67-4968
作者：福田Miki
Fukuda Miki。OTONAMIE三重縣觀光情報網路雜誌副代表。OTONA MASTER
擔任東京某企業公司的社長秘書，兼任辦公室中心長。學生時代便開始半工半讀進行現在的工作。2014年隨著丈夫從東京搬遷至三重。在對於離別舊生活的感傷中也懷抱起對新環境所產生的好奇心。由於是從外地而來關係，更是深深受到三重這塊土地自身魅力的俘虜。
OTONAMIE：http://otonamie.jp/
*此網站附有Google網頁翻譯功能。
Comments