秋吉台係山口縣一個好出名嘅地方，亦係深受日本人喜愛嘅旅遊勝地。然而，對於匆匆路過嘅旅客嚟講，秋吉台可能唔會被列為旅遊目的地嘅首選。咁樣的確係有啲可惜，因為秋吉台嘅秋芳洞係日本規模最大嘅鍾乳洞，亦係東洋最大嘅鍾乳洞之一。就算你曾經去過鍾乳洞，呢度都非常值得你到訪。如果從來無去過鍾乳洞，咁我就話你知，嗰度係一個好涼爽、甚至涼到令人有啲毛骨悚然嘅地方......不過都好值得你深入秋芳洞，漫步於昏暗、河水流動，佈滿美麗岩石嘅秘境之中。
關於秋吉台
秋芳洞開放參觀嘅部分，全程行完大約需時40分鐘。洞穴入面有啲寒，氣溫只係得攝氏17度左右，入去之前記住要著夠保暖衣物。參觀洞穴後，可以順便去埋秋吉台嘅田野散步。嗰度有非常出名嘅散步道，仲有餐廳可以買到特色紀念品同埋買雪糕食。
秋芳洞參觀攻略
秋芳洞全長8.9公里，其中1公里對外開放參觀。如果想參加比較特別嘅洞穴觀光團，需要提前預約。對外開放參觀嘅部分雖然只係得1公里，但已經足以令人感受大自然鬼斧神工嘅魅力。
秋芳洞嘅入場費為1,200円。洞穴出發後首先會經過一座紅色小橋。建議花啲時間慢慢參觀洞穴內嘅每個部分，唔好趕時間。洞穴內參觀雖然無限制時間長度，但如果中途想原路折返，同大部份嘅人反方向行就可能啲唔方便喇。
秋芳洞嘅規模非常大，設有遊客專用行人路，為大家安全，建議唔好隨意偏離行人路。鍾乳洞內不時會有水滴落嚟，地面濕滑，所以一定要小心行啦。
秋芳洞內嘅鐘乳石景觀令人嘆為觀止。最有趣嘅係，有好幾處外觀奇特嘅鐘乳石仲有自己嘅名字，命名取決於石頭嘅外觀或被發現嘅歷史。進入洞穴參觀時可以觸摸鐘乳石牆，所以非常推薦大家親身體驗鐘乳石嘅觸感。唔使擔心洞穴內有任何動物，因為開放參觀嘅部分唔會有其他生物出現。可能喺好耐好耐以前，呢啲動物就已經被人類嚇跑哂，而家洞穴內甚至連蝙蝠嘅蹤影都無。
景點資訊
- 名稱：秋吉台
- 地址：山口縣美禰市秋芳町秋吉3506-2
- 交通：[JR]新山口站→[巴士]45分鐘→秋芳洞
- 開放時間：3至11月：08:30～17:30（閉洞18:30）、12至2月：08:30～16:30（閉洞17:30）
- Wi-Fi：沒有提供
- 語言對應：提供中文（繁體字、簡體字）、英文、韓文嘅導覽資料
- 入場費：大人1,200円、中學生950円、小學生600円
- 購票方式：請使用入口處嘅售票機購票
- 可否使用信用卡：不可
Comments