如果去大城市旅行已經満足唔到你嘅話，不防試吓租車自駕遊日本比較郷下嘅地方啦，相信一定可以俾你邊欣賞優美景色, 又可以體驗獨特文化㗎喇。今次同大家分享嘅係從名古屋出發嘅中部北陸地區嘅四日三夜行程。呢次為咗想分享多啲景點俾大家, 所以行程排得比較密，如果時間比較充裕嘅人可以喺毎個景點留多啲添㗎!
第1日：名古屋中部國際機場＞伊勢神宮＞史奴比茶屋＞鳥羽海女小屋＞名花之里＞MITSUI OUTLET PARK 爵士之夢長島
從香港出發飛去中部國際機場之後，入境大廳嘅二樓就有TOYOTA租車嘅服務櫃檯，或者直接去一樓嘅店面 (建議提前預約租車)報到辦理租車手續都得。到時會有専人詳細說明喺開車時需要注意嘅地方同車內設備嘅使用方法同保險等，工作人員會用英文同中文嘅資料同你溝通，就算唔識日文都唔使擔心。
★喺日本嘅有効駕照相關資訊請參考呢度
順帶一提，中部國際機場四樓嘅商店街有100間以上嘅餐廳同商店，名古屋知名美食或傳統日本料理，出名手信嘅分店同雜貨等都可以喺呢度搵得到, 都未出機場就開始買嘢嘅人都唔少，記得安排啲時間喺機場好好行吓啦。
另外，租車時建議買埋中日本高速公路Central Nippon Expressway Pass (簡稱CEP) 高速公路嘅通行優惠，可以喺NEXCO中日本管理嘅大部份高速公路用一個固定金額、唔限距離嘅方式暢行無阻。而且用租車公司所提供嘅ETC卡，即可以自動扣款，唔使停車俾錢或計算収費, 非常方便。
★詳細請睇NEXCO官網
📍第1站：中部國際機場>>>伊勢神宮（約2個鐘車程）
伊勢神宮係日本三大神宮之一，號稱日本8萬多神社之首，係好多日本人心目中呢世最想去嘅地方之一。包含皇大禪宮（內宮）同豐受大神宮（外宮）兩大神社，同埋其他125間神社嘅總稱。
📍第2站：御蔭橫丁又稱做「托福橫丁」 (Okage-yokocho)
喺呢度可以食到好多當地美食, 就好似有赤福餅同伊勢烏冬, 手捏壽司（手こね壽司）等，亮點係仲有超級可愛嘅史奴比茶屋添呀! ! 除咗有好得意嘅美食之外，仲可以去隔離個商品區選購各式各樣嘅史奴比周邊商品，伊勢限定嘅嘢都非常多呀！搞到人樣樣都想帶返屋企！
📍第3站：托福橫丁>鳥羽海女小屋はちまんかまど- Ama hut HACHIMAN（約35分車程）
之後就由伊勢神宮出發去鳥羽海女小屋はちまんかまど。推薦你嚟體驗海女生活，「海女ama」係自古以嚟用嚟作為潛水捕魚女性嘅通稱，日本現存約兩千名海女，有一大半都喺三重伊勢鳥羽地區呢度㗎。呢次上網預約嘅係下午茶套餐。如果係午餐時間嚟嘅話可以揀豪華海鮮套餐呀~另外用JCB信用卡買海女婆婆做嘅御守可以有8折喔！
📍第4站：鳥羽海女小屋>名花之里（約2個鐘車程）
名花之里最出名嘅就係夜間燈飾展。今年舉辦日期係2018年10月20日至2019年5月6日，除咗知名燈飾展之外，毎個季節都會展示各種唔同嘅花木，園區唔算細，建議安排多啲時間慢慢影相囉〜
📍第5站： 名花之里> MITSUI OUTLET PARK 爵士之夢長島（約15分車程）
第1日嘅最後1站嚟到名古屋觀光客必訪之地「MITSUI OUTLET PARK 爵士之夢長島」買呢度先有嘅品牌商品，順便食埋晚餐都好！嚟到名古屋當然唔可以錯過矢場丼（Yabaton）嘅味噌豬排啦！
自駕遊嘅好處之一就係無論去邊個景點, 買幾多限定商品或記念品都唔怕重又累人~~先係第1日咋, 就帶咗滿滿嘅戰利品返酒店休息啦~ 今日入住嘅喺桑名酒店，準備聽日去白川郷!!!
第2日：桑名酒店出發＞郡上八幡＞白川鄉＞兼六園＞金澤車站
📍第1站：桑名酒店>郡上八幡（約1個半鐘）
郡上八幡除咗古色古香嘅日式街景之外，毎年夏天日本盂蘭盆節（お盆）期間短短四日會吸引超過25萬旅客前嚟觀賞「郡上踊舞」，如果錯過呢四日都可以嚟「郡上八幡博覽館」報到，館內「每日」都有著浴衣木屐嘅舞蹈老師示範教學郡上踊舞，呢次去仲遇到台灣人嘅舞蹈老師喔！
📍第2站：郡上八幡>白川鄉合掌村（約1個半鐘）
已經嚟過幾次嘅白川鄉，爬到展望台一望市景依然令人感動。毎個季節都有唔同嘅風貌，如果有時間嘅話甚至可以安排住一晚合掌屋，無太多時間嘅人亦可以去村內合掌屋餐廳「いろり irori」用餐，埋單時用JCB信用卡可以拎到商店9折優惠券喔！
📍第3站：白川鄉合掌村>兼六園（約1個鐘）
從白川鄉出發去到石川縣日本三大名園之一嘅兼六園，林泉迴遊式庭園四處都係影相嘅好景點，四季都有唔同嘅風情，尤其係毎年11月開始可以睇到嘅兼六園最出名嘅「雪吊」，夜晩就去好行又好買嘅金澤車站食飯，嚟到日本點可以錯過食壽司呢！食飽之後喺金澤車站買咗啲金澤特産，返酒店休息，準備聽日去飛驒高山食飛驒牛浸温泉囉！
鍾意小編介紹嘅自駕遊之旅嗎？敬請期待下篇喔～～～
※請注意！文中所提到嘅JCB優惠，需要使用JCB付款後先可以享用此優惠。
Comments