大家睇咗之前介紹嘅“租車輕鬆自駕遊日本中部同北陸〜四日三夜行程（上篇）”未呀? 今日要接著介紹第3日同第4日嘅行程~一齊嚟日本自駕漫遊中部北陸, 影相影盡各地絕景啦！
第3天：金澤飯店出發＞近江町市場＞東茶屋街＞箔一本店箔巧館＞飛驒高山（味之与平船坂酒造）＞飛驒高山祭之森＞穂高莊山がの湯
📍第1站：金澤飯店出發＞近江町市場（約4分）
嚟到金澤唔可以錯過就梗係呢個近江町市場嘅海鮮美食啦。如果同小編一樣住普通嘅商務酒店嘅話，建議唔好食酒店早餐，嚟近江町市場嘆人氣海鮮丼把啦。
📍第2站：近江町市場＞東茶屋街（約5分）
食完海鮮丼之後，可以開車去金澤必訪景點之一「東茶屋街」，呢度係江戶時代好出名嘅享樂花街，除咗有好多代表金澤嘅手信同和風雑貨小物之外，呢條街度仲有國家指定文化財產「志摩」茶屋値得參觀。如果有時間可以預約和服體驗，著住和服行喺呢條街度，一定處處都是美景喇!
📍第3站：東茶屋街＞箔一本店箔巧館（約20分）
雖然兼六園同東茶屋街都有金箔相關商品嘅名店「箔一」，但如果係自駕嘅話就非常建議去總店，除咗有超型超上鏡嘅金箔雪糕, 各種金箔相關商品之外，亦係金箔嘅綜合博物館，擺設喺“金箔之間”嘅黃金鎧冑就更加係唔可以錯過嘅影相景點。另外仲有各種金箔體驗，小朋友都可以參加㗎！仲有仲有! 如果用JCB信用卡喺呢間店消費1萬円以上，仲可以免費獲得一枝891円嘅金箔雪糕添呀，係總店先有嘅特別優惠嚟㗎！
📍第4站：箔一本店箔巧館＞飛驒高山（約1個半鐘）
嚟到飛驒高山一定要食極致美味嘅飛驒牛啦~~位於岐阜縣山區嘅飛驒高山除咗可以睇到舊日本街道風景同傳統文化同工藝之外，飛驒牛更加係唔可以錯過嘅當地美食！喺老街散歩時搵到一間睇落好歴史悠久嘅日本酒廠「味之与平」（船坂酒造），入店後發見店内除咗提供日本酒之外仲有餐廳，見到有中文餐單嘅字眼同飛驒牛嘅相就決定喺呢度用餐，「飛驒牛排套餐」果然係預期咁好味啊! 同店員傾咗陣，知道咗原來呢度有提供素食添！而且拎住JCB信用卡購物2,000円以上有送枡酒或甜酒添～
第5站：飛驒高山＞飛驒高山祭之森（約20分）
飛驒高山仲有個聞名海外嘅高山祭，被喻為日本最美麗嘅三大祭典之一。每年春秋喺高山市區各舉辦一次，毎年總會吸引幾十萬嚟自日本同全世界各地嘅遊客參訪,挑戰咗多年都仲係訂唔到酒店。但如果想睇靚靚神轎可以開車嚟「飛驒高山祭之森」，館内陳列展示高山祭中出現過又豪華又絢爛嘅神轎喔！
📍第6站：飛驒高山祭之森＞穂高莊山がの湯温泉旅館（約50分）
開咗成日車，夜晚為咗好好打賞自己, 就去入住奥飛驒温泉同日本料理評價都唔錯嘅穂高莊山がの湯温泉旅館喇。和風大廳擺放飲料免費享用，親切嘅工作人員，加上好好味嘅飛驒牛全餐，仲有非常舒服嘅客房同溫泉都超正㗎。好値得開車去呢度入住一晚呀～
第4天：穂高莊山がの湯温泉旅館出發＞松本城＞中山道 馬籠宿＞土岐PREMIUM OUTLETS＞名古屋市内（ひつまぶし）＞緑洲21・名古屋TV塔夜景
📍第1站：温泉旅館出發＞松本城（約1個鐘20分）
食完旅館準備嘅美味早餐之後，就出發去長野縣松本睇約400年前築城嘅日本國寶松本城，係現存5段6樓嘅日守閣中最古老嘅一個。想去日守閣内嘅人，建議一開城就去。呢個係超人氣嘅觀光景點, 如果遲啲去, 淨係排隊可能就要1個鐘以上。睇完松本城仲可以散歩去市區行吓，感受一下城下町嘅歷史風情啦！
📍第2站：松本城＞中山道馬籠宿（約45分）
離開松本城之後，去咗一直以嚟都好想去嘅中山道馬籠宿，但交通唔係好方便，啱啱好呢次揸車就兜咗過去睇吓，喺馬籠館食完郷土料理之後，就順住石板路行。中山道係江戶時代嘅五街道之一，係從江戶經內陸前往京都嘅道路，而馬籠宿則係中山道嘅第四十三個宿場，沿道保留著江戶時代宿場嘅風光同建築風格。
📍第3站：中山道馬籠宿＞土岐PREMIUM OUTLETS（約2個鐘）
旅程即將結束，睇完咁多歴史景點之後就去土岐PREMIUM OUTLETS準備血拼。嚟到土岐PREMIUM OUTLETS後第一件事就梗係去美食街嘅Information Center報到，外國觀光客憑護照可以拎到Coupon Book㗎，可以用到好多優惠。另外，出示旅遊小冊子Good Luck 中部俾工作人員，仲可以免費拎到精美小禮物添！
📍第4站：土岐PREMIUM OUTLETS＞名古屋站（約1個鐘）
血拚後，開車到名古屋市區行吓商店街後，揀咗間評價都唔錯嘅名古屋必食美食「鰻魚飯名店 うな善」嚟品嚐鰻魚飯（ひつまぶし），蒸後鬆軟可口嘅關東風味鰻魚加上高湯係呢間店嘅招牌。高湯同醬汁簡直絕配，有好清爽嘅口感，非常可口嘅鰻魚飯為呢次嘅中部自駕遊畫上一個完美嘅句號。
睇完呢篇報導大家係唔係都好想挑戰一下日本中部自駕遊呢～係就快啲計畫下啦！
★想睇返上篇可以睇呢度：租車輕鬆自駕遊日本中部同北陸〜 四日三夜行程（上篇）
中部北陸自駕遊必備法寶：Central Nippon Expressway Pass（簡稱CEP）高速公路嘅通行優惠
※請注意！文中所提到嘅JCB優惠，除咗土岐PREMIUM OUTLETS之外，需要使用JCB付款後才能享用此優惠。
Comments