聽日就萬聖節喇! 繼續提供鬼故俾你沉浸喺恐怖氣氛之中~~~!! 今次帶俾你嘅係日本好出名嘅日本民間傳說–皿屋敷的怪談。
阿菊, 10隻珍寶碗碟, 同一個井
呢個故事叫做皿屋敷(Sarayashiki), 其實佢有好多唔同版本, 但當中共通點就係有主角阿菊(Okiku), 10隻珍寶碗碟, 同埋一個井。而現代最普遍被認知嘅係東京江戶版本嘅「番町皿屋敷」(Banchō Sarayashiki)同兵庫縣姬路版本嘅「播州皿屋敷」(Banshū-Sarayashiki)。每個版本都會有唔同嘅細節位, 例如個主因可能係太嚴苛嘅刑責, 未了的愛, 暗殺行動, 或者係真愛嘅考驗, 甚至係夫人嘅嫉妒都有。
如果你從未聽過任何版本, 咁我哋就唔阻你自己睇一睇呢個係咩嘅恐怖故事喇。
番町皿屋敷版本: 嫉妒, 殘酷與復仇嘅故事
呢個故事喺370年前江戶時代嘅牛込御門内五番町, 一個內有井嘅豪宅度發生嘅。相傳係豐臣秀賴夫人天樹院嘅故居曾建於此。後來有一名叫做青山主膳嘅人同佢嘅夫人、一班婢女一同住喺度。而主膳曾經擔任撲滅放火, 盜竊同賭博等罪行嘅職位。不過其實佢都係得過且過, 佢本身都無心去做, 從來都無認真咁工作去避免罪案發生, 亦唔會真心關心人。事實上佢係一個殘酷又冷血嘅人。而且, 佢身邊個夫人, 都係一個無血性嘅人, 好鍾意去欺凌人。
喺某年年底, 主膳叫唒佢啲工人同婢女去一個豪宅同佢哋講:
「一到新年, 我哋間豪宅就打算招待御老中嘅貴賓, 所以呢度到時會開放豪宅同埋用呢10隻碟。呢套碟係德川家康大人所彤賜, 係我哋嘅珍寶嚟㗎。好榮幸可以俾我哋嘅貴賓欣賞。所以你哋一定要小心好好保護呢套碟呀! 唔係你條10條命都唔夠賠呀!」
年資最老嘅婢女阿梅問: 「主人, 如果我哋整唔見或者整爛咗, 咁會點㗎?!」
「咩話?...」
主膳走埋去用刀指住佢塊臉:「你個白痴!」
一𠝹
突然喺佢塊臉度劃咗一下。
阿梅顯得好痛苦, 而全部婢女都驚到大叫。
因為阿梅嘅嘴巴被打橫𠝹開咗, 血流如注。
「呀哈哈哈哈哈」女夫人好陰險咁笑。「你點解咁蠢呀?」
「你點解要咁做呀!」婢女們問。
「你個白痴! 御老中酒井先生習慣每年春天都會嚟呢間豪宅去睇啲碟係無完好無缺。如果有任何一隻碟有少少花, 我青山主膳𠝹個胃俾佢都唔夠得到佢原諒呀。你竟然咁輕率講出啲咁嘅說話?! 你試吓再講多次吖!」
「主人! 對女人嚟講塊臉好重要㗎! 你咁樣太重手喇!」
「係呀係呀!!」夫人話「如果你有一個咁嘅傷痕喺你塊臉上, 可能你都唔想做人啦。不如我哋幫佢走出苦難啦, 好無呀?」
「都係一個好主意嚟嘅。就等佢見識吓咩係地獄啦!」
一𠝹
阿梅大嗌一聲, 亦係佢人生最後一聲。
主膳用佢把刀斬落阿梅度, 阿海用仇恨嘅目光望住主膳, 然後死去。
「將呢個眼都突埋嘅女人掉落條河度! 嘿嘿」
啲婢女成身都震唒咁望住嗰具冷冰冰嘅屍體。
「呀哈哈哈哈哈」
呢件事之後, 阿菊同喊緊嘅阿稻講:
「阿稻…」
阿稻喊住咁話「佢係我家姐嚟㗎…」
「呢個豪宅好鬼異呀…個主人又咁恐怖…如果我哋犯咗一個錯, 我哋一定會好似我家姐咁被人殺死㗎…」
阿菊都唔知點算好, 唯有做聆聽者同阿稻喊埋一份啦。
有一日, 主膳有事搵阿菊, 阿菊好驚, 佢嘗試鎮靜自己唔好表現到咁驚。佢喺房外同主膳講:
「阿菊到咗喇, 請問有咩吩咐呀主人?」
「咦, 你嚟咗喇? 入嚟啦, 唔好企喺出面咁慘啦。」
「你想我做咩呀?」
「主人?」
「呢條係倉庫嘅鎖匙, 我要你幫我保管住佢。」主膳拋咗條匙俾阿菊。
「喺呢間屋, 包括我老婆, 都無人可以走入我心房! 幾悲哀呀! 但係阿菊你唔同呀! 係得你! 得你先咁純潔, 整個心靈都咁純真。個倉庫入面擺咗啲珍貴嘅碟, 你要幫我睇住, 無論如何都唔好俾任何人偷走呀。」”
「係…係嘅主人! 我會做好佢㗎!」
然後主膳輕輕地攬咗阿菊一下。
「唔…唔得咁㗎主人! 我哋唔可以… 阿夫人好快就返㗎喇。如果佢見到我哋咁嘅話…呀!」
主膳攬得阿菊更緊, 仲輕吻佢嘴唇一下添。呢個係阿菊人生第一次有心動嘅感覺, 佢當時個腦一片空白, 諗唔到嘢。主膳攬得更肉緊, 搞到阿菊開始衣衫不整....
就喺呢個時候夫人同阿稻一齊經過。聽到啲奇怪嘅聲所以大力打開道門。
「咦, 你哋睇嚟好開心喎。唔好意思阻住你哋喇。」
夫人淨係講完呢句之後乜都無講過就走咗。
「好對唔住呀老爺!!」
「唔使道歉喎」主膳講完就離開間房去追佢老婆。
阿菊都慌慌張張咁諗住快快手走人但係俾阿稻攔住咗。
「我估唔到你會做啲咁嘅事!」
「你誤會咗喇! 信我啦阿稻! 佢迫我㗎咋!」
「你點講我都唔會信! 我唔會原諒你㗎!」佢瞪大眼睛睥住阿菊, 怒火中燒。
過咗一段時間, 阿菊開始好困惑, 一方面又覺得好內疚, 另一方面又有種莫名其妙嘅感覺。
之後到咗新年個豪宅就開放迎來賓客。件事發生嘅第二日後, 阿菊同主膳嘅謠言就好似一把火咁迅速傳遍成間屋。阿菊從此受到其他婢女鄙視同討厭。工作變得困難, 仲時不時受到欺凌, 就好似做錯事就會賴落阿菊度, 或者收埋佢嘅工作用具搞到佢做唔到嘢。而阿菊傷心欲絕只能偷偷暗中喊。
鳴鳴...
「主人…我…呀…主膳…呀…」
但係夫人又暗中睇到一切。自此之後阿菊都受到夫人冷漠對待。仲唔止添呀…
故事未講完㗎! 結局下回分解!
Comments