係咪好唔同？日本嘅托兒服務

近十年來喺日本，尤其係東京，面臨嚴重嘅托兒服務不足問題。呢個議題喺日本極具爭議，但現階段都未有明確嘅解決方法。

對於一啲媽咪嚟講，並唔係咁容易可以搵到一個可以幫手睇細路嘅托兒機構，等自己生完仔後可以返工做野。喺日本有保育園同埋幼稚園呢兩種機構，以下就嚟睇睇呢兩種日本嘅托兒機構介紹。

保育園同幼稚園嘅不同之處

表面上睇落去呢兩個地方都一樣，係可以托兒，喺朝早嗰陣俾孩子同老師、朋友們一齊玩嘅地方。但事實上，喺政策同埋系統上，兩者有好大差異。

保育園係為咗父母都出外工作嘅家庭而規劃嘅托兒設施。可以透過市役所或者區役所申請公立保育園，但係要入到公立保育園係非常唔容易，因為太多人爭。

另一方面，幼稚園主要係提供小朋友同其他同年齡嘅細路一齊互動、受教育嘅地方。會有一啲唔同科目嘅課程，例如係日文、寫字、數學。亦會有一啲體能課程俾小朋友運動。最近越來越多嘅幼稚園亦將英文加入佢哋嘅課程之中。

保育園同埋幼稚園都有提供補助津貼可以申請，依照雙親收入、托兒幼童嘅年齡同埋市或者區嘅預算等，可以申請3千到3萬円不等嘅補助津貼。

由於保育園嘅設置係針對父母都工作嘅家庭，所以大多數保育園嘅營業時間係朝早8點至夜晚8點，等雙親可以返工前托兒，放工先嚟接返。當然，當中會俾孩子食飯以及午睡。

比起保育園，幼稚園嘅時間就比較短，通常係朝早9點起至下午2點，視各機構可能會有所不同。亦會有暑假及寒假等長假期，所以如果爸爸媽媽都要返工嘅話，可能就會辛苦啲。

雖然原則上規則係咁，但而家亦有唔少幼稚園提供額外收費、延長托兒時間嘅服務，以配合唔同家庭需要。

一般嚟講，職業婦女揀保育園，全職媽咪就會揀選幼稚園。但而家兩種機構都分別提供各式附加服務，亦俾父母有更多元嘅選擇。