日本主婦經常要嚴密分配時間，先至可以平衡到工作、家務，當然仲要照顧小朋友。到底佢哋要點樣做好時間管理嘅呢？今日就有位日本年輕媽媽，嚟同我哋分享佢嘅超級忙碌嘅生活方式。
趁週末空閒，預先煮定料理
我每逢週末嘅時候都會煮定好多嘢食，例如上星期我就做上圖片呢啲炸蝦，亦都係我屋企個小朋友好鍾意嘅菜式。如果你有整過炸蝦，相信都會知道要幾多功夫，經過幾多程序先整得好，例如要將蝦沾上麵粉、蛋同麵包糠等步驟。仲要整嘅時候好容易整污糟雙手同廚房，煮完仲要花時間做清理工作。
所以我習慣如果要炸野就趁週末做好，然後將成品放入密封袋同雪櫃。到小朋友夜晚想食嘅候，只要放返入鑊炸兩炸就搞掂。咁樣我就可以慳返好多時間，同時個仔又食得開心。
日本女性之間，非常流行儲存食物
我仲會喺週末預先煮好大量食物，例如咖哩、燉牛肉，並將佢哋放入唔同大小嘅容器入面。上圖就係我自製嘅番茄同埋炒洋蔥醬，兩者都係好好用嘅調味料，最重要係我個仔又鍾意食。 我需要做嘅只係用微波爐加熱然後放係白飯上面！當然，您都可以選擇單獨食醬料，令人驚訝嘅係，其實用嚟送酒好夾！
先進科技幫咗好大忙！
我目前收過嘅最好禮物之一就係掃地機械人。
我本來以為佢哋無法代替人手掃地嘅工作，所以咁多年嚟，我一直都好抗拒用呢類科技。但當我朋友某次送咗個掃地機器人畀我當做產前禮物（我知道其實跟「生仔」根本無關）之後，而家我已經唔可以無咗佢。
每當出門工作時，我就會開左佢，然後放工返嚟，就可以見到個一乾二淨嘅屋企。如果我嗰個好奇心旺盛嘅仔㩒低佢嘅話，就另當別論啦！雖然現代科技可能會對小朋友造成傷害，但如果您係一名要出外工作嘅家長，科技可能會對您非常有幫助呢！
點洗衫先最有效率？
喺好多人屋企，「洗衫」、「晾衫」同「收衫放好」三個步驟都唔係喺同一個地方進行。待洗衣物、待摺嘅乾淨衣物、待放入櫃嘅衣物，全部都放喺唔同地方，其實係非常浪費時間，所以，我會建議大家用移動式衣物烘乾工具。
當遇上天氣晴朗嘅時候，應該好多人都會希望盡可能喺戶外曬多幾件衫。而呢個工具就適合呢個時候使用。移動式晾衣架可以幫您依據天氣狀況，由洗手盤到露台，再從露台到衣物收納處，周圍到處移動㗎！
平日快手執拾，週末徹底打掃
令人煩惱嘅灰塵同垃圾係每日都會有。 雖然忙碌生活中無太多時間做徹底清掃，但其實我係非常在意。事實上，就算每日朝早只得5分鐘空餘時間，全家人都可以用除塵滾筒做簡單掃除。
如果係地板就用平板拖把、地毯就用除塵滾筒。既唔需要插電、亦唔需要用水、雙手更加唔會整污糟，就連小朋友都可以輕鬆完成。只要每日朝早持續做簡單打掃，咁就可以令屋企時常保持舒適乾淨。
其實我都仲未搵到最好嘅方法嚟兼顧工作同家庭平衡，但我就一直努力搵緊一啲可能會有所幫助嘅物品。好彩，到目前為止，一切都運作良好。我認為，製定一個適合您屋企而又令你覺得舒服嘅計劃係非常重要嘅。
我都好想知道其他職業主婦都係點樣維持兩者平衡，如果您知道任何秘訣，歡迎喺下面留言分享啊！
Comments