【食譜影片】日本必備新年年菜之一！伊達巻食譜♪

講到日本1月嘅傳統習俗，就一定係「正月」，亦即係日本嘅新年。除咗會令人諗起新年參拜、利是、元旦、元旦日出等相關字眼之外，日本新年年菜「御節料理」更加係「正月」不可或缺嘅重要一環。

今次小編要為大家介紹嘅係「御節料理」中嘅經典菜式之一，連小朋友都好鍾意嘅「伊達卷」食譜。另外，今次會以低脂、蛋白質豐富嘅魚板「半片」（又稱為鱈寶）去製作，有別於一般使用白身魚製作嘅方式，令製作過程變得更簡單，輕輕鬆鬆就可以整到口感鬆軟嘅「伊達卷」，不妨跟住食譜試試落手整啦！

喺介紹食譜之前，首先了解一下點解日本人要喺「正月」食「伊達卷」，以及當中所含嘅營養價值喔。

伊達卷係？

「伊達卷」係日本新年年菜「御節料理」嘅經典菜式之一，係一款將雞蛋、白身魚肉碎、砂糖、味醂、醬油等攪拌混合後再煎烤，然後捲成旋渦狀嘅料理。

「御節料理」裡面每一樣食物，都含有各式各樣嘅吉祥、祈願祝賀等意思，「伊達卷」因為與卷軸（昔日嘅書籍）相似，所以寄寓著「智慧增長」嘅祝福之意，夠晒好意頭。

「半片」嘅營養成分

今次使用「半片」代替白身魚肉碎製作「伊達卷」。

「半片」係以魚肉碎為原材料所製成嘅魚板，係一款富含鈣、蛋白質，而且低脂、低卡路里嘅健康食品。

食譜影片請參考（附有CC字幕）👇👇👇

「伊達卷」材料

• 半片…1塊(100g)
• 雞蛋…2隻
• 砂糖…30g
• 味醂…1湯匙
• 鹽…少許
• 沙律油…少許 

「伊達卷」製作方法

1. 將「半片」放入食物袋中，一邊搓揉一邊捏碎至柔軟光滑。
   
2. 於容器中放入「半片」、砂糖、味醂、鹽，攪拌均勻。
3. 放入雞蛋，攪拌均勻。
4. 於玉子燒鍋中，倒入沙律油，以中火加熱。
5. 然後將玉子燒鍋放於濕抹布上放置1-2秒，倒入攪拌好嘅雞蛋糊。
6. 冚上鋁箔紙，用細火慢煎3分鐘。
7. 雞蛋凝固後，翻面再煎2分鐘。
8. 於壽司捲簾上放上煎好嘅雞蛋，從前方開始捲起，捲嘅時候要用少少力捲至緊實程度。
9. 左右兩端用橡筋固定，然後待其冷卻。
10. 冷卻後，切成容易入口嘅大小，即大功告成。