您對日本OL有咩印象？
諗起人氣日劇《庶務二課》中登場，多次化解公司危機，著住藍色迷你裙，好有個性嘅OL軍團？定係好似《派遣女王》裡面，將工作同私人生活分得相當清楚嘅職業女性？
正所謂「一樣米養百樣人」，因應唔同職場環境，員工個性特質等方面亦會有所不同。繼過去曾經連載過嘅【Work & Life in Japan】系列後，FUN! JAPAN為咗令大家更加了解日本人嘅工作日常，決定開始全新「FJ STAFF圖鑑」主題專欄。
作為值得紀念嘅首次「FJ STAFF圖鑑」，我哋邀請到岡部小姐作為首位登場人物。岡部小姐係於2022年4月加入FUN! JAPAN大家庭嘅新面貌，睇完岡部小姐訪談後，您或者都可以感受到與日劇中嘅日本OL不一樣嘅日常生活氣息…！？
<岡部’s Profile>
- 年齡：20多歲
- 出生地：東京（出生同成長都喺東京！）
- 興趣：K-Pop、跳舞、游水
【工作篇】揭開日本OL工作內容神秘面紗
日本每年4月都係「新年度」。既有告別嚴苛嘅就職活動，轉身成為社會人士嘅職場新鮮人，亦有人調職、轉工、搬屋等等。首先，一於請岡部小姐講講入職FJ之前嘅經歷～
ー進入FUN! JAPAN之前做過咩工作呢？
「從東京都內嘅大學畢業之後，我就入職JTB（*1），至今為止做咗6年法人（*2）營業嘅相關工作。」
「工作內容包括向專修學校與一般企業，規劃客製化旅遊行程以及製作預算等。在職時，我曾經跟客人同行去過夏威夷、越南、奧地利、法國，於當地以領隊身分陪同客人辦理酒店入住手續、安排巴士、行程管理等等，代辦客人有需求嘅部分。」
*1：日本大型旅行社之一。
*2：向企業進行行銷活動嘅職種。
－加入FUN! JAPAN嘅契機係？從JTB到入職FUN! JAPAN前後印象有無改變？
「我想喺JTB集團內挑戰唔同類型嘅工作，所以決定應徵JTB人事部嘅人材交流制度，成為加入FUN! JAPAN嘅契機。我原本就已經知道FUN JAPAN嘅存在，但就係進入FUN！JAPAN之後先至知道原來主力係做媒體嘅。」
「任職JTB嘅時候，返工地點喺霞關（*3），大家可以想像係樓高30層嘅商廈內，1層樓裡面大約有400人左右嘅大企業辦公室。」
「嚟到FUN!JAPAN，我就負責向企業與行政單位提供相關服務嘅營業擔當角色。而家主要職務係負責架設・建構跨境購物網站。入職FUN!JAPAN之前有聽聞過有多位不同國籍嘅員工，但係無諗過大家都擁有流暢日文程度，而且相當親切友好，令我感到相當驚訝。見到外國同事們對話嘅機會亦變多好多！」
*3：位於東京千代田區嘅商業街、寫字樓商廈大街。財務省與外務省等日本行政機構亦聚集於此區域。
【私生活篇①】日本OL收工後通常會做乜呢？
而家開始入正題－齊齊揭開日本OL嘅放工後嘅日常生活嘅神秘面紗！究竟返工時間過後，等緊岡部小姐嘅係沒完沒了嘅加班地獄，定係…？
「我非常鍾意郁動身體，喺JTB返工嘅時候，因為公司距離皇居好近，所以喺可以準時收工返屋企嘅日子，會去『皇居跑（*4）』，順便好好Refresh一下身心，放鬆一番。」
*4：「皇居跑步」嘅省略稱謂。意指沿著皇居外圍路線跑步。
「因為鐘意K-POP，所以亦會經常會喺YouTube睇音樂節目。大約1年前開始，我就固定同2個朋友，每星期都會一齊去1次K-POP舞蹈學校。TWICE、ITZY、BTS、IZONE…一首歌會用3星期時間練習，完整複製當中舞步。」
岡部小姐自豪地話「唔知係咪因為跳舞嘅關係，姿勢感覺有變好，身高仲增加咗1cm！」。 岡部小姐唔單止會好好享受週末與假日嘅時間，即使喺工作天，亦不忘伸展郁動身體。
【私生活篇②】日本OL假日係點過？
作為JTB公司員工，梗係鍾意去旅行（不分日本國內・海外）。岡部小姐就同各位分享咗幾個心儀旅遊目的地。
「如果日本國內旅遊嘅話，推薦去石川縣能登半島，沿著日本海邊揸車兜風，仲可以順便浸埋溫泉呢！我每年都會去石川縣旅行，壽司、螃蟹、山海靚景應有盡有，特別係小松機場附近，有一間叫『勝っちゃん』嘅餃子店亦去過好幾次！」
「因為最近流行釣魚，所以今年嘅黃金周就去咗沖繩堤壩釣魚。」
「亦有去群馬縣一日遊，去滑雪場玩滑雪板（上）；又或去千葉縣房總半島（下）釣魚。」
「公司福利提供得水族館入場、旅舘住宿與租車等折扣優惠，所以每次去旅行都會用到呢個優惠服務！」岡部小姐再次自豪地說，真係令人相當羡慕喔！
「但係，我平常都無乜透過旅遊書收集旅遊情報。即使平時出街食飯嘅時候，基本上都係用Instagram嘅hashtag去搵相關資訊，多數以『#地點×種類』方式去作搜索，例如『#品川午餐』、『#品川泰式碎肉飯』之類。除咗睇相之外，仲會參考食評網『食べログ（Tabelog）』嘅食評文章！」
各位FUN！JAPAN讀者們，下個日本之旅不妨模仿一下岡部小姐嘅做法？
某一休息日時間表（岡部Ver.）
09:00～ 起床|食早餐、洗衫、打掃
↓
11:00～ 移動
↓
11:30～ 同朋友一齊去舞蹈學校上堂
↓
13:00～ 同朋友一齊食Lunch
↓
15:00～ 移動
↓
16:00～ 購物
↓
18:00～ 準備晚飯
↓
19:00～ 食晚飯
↓
20:00～ 睇電視節目或睇電影
↓
21:00～ 沖涼
↓
22:00～ 準備第二日返工
↓
23:00～瀏覽社交平台|瞓覺
小編訪問完岡部小姐之後，感想係必須更加享受人生。 （反省中）
下一次又會係邊一位開心小夥伴登場呢？敬請期待。
Comments