位於愛知縣長久手市嘅愛・地球博記念公園（MORICORO PARK），係一個於愛知萬博（愛・地球博）會場舊址上建造嘅城市公園。園內面積相當廣闊，遊客除咗可以喺草坪廣場上享受大自然風光、大型摩天輪、自然體感遊樂設施等等，仲有大人細路都可以玩得盡興嘅兒童廣場、全年都可以去嘅溜冰場等體育設施，簡直係玩足成日都唔夠喉！
以下，編輯部將會帶您從愛知萬博舉辦當時曾一度成為討論熱話嘅日本首個磁懸浮列車・LINIMO（リニモ）車站，出發漫步去尋找精彩人氣景點！
MORICORO PARK係愛・地球博（2005年日本國際博覽會）舊址
「2005年日本國際博覽會」(又簡稱為愛知萬博、愛知世界博覽會)，係一個匯聚著時代最尖端科學技術嘅「萬國博覽會」，並吸引全球多國人士參加。而愛・地球博記念公園（MORICORO PARK）就係2005年舉辦嘅「愛知萬博」(日本暱稱為「愛・地球博」）舊址上所建造嘅城市公園。
「愛知萬博」分為長久手會場與瀨戶會場2處會場舉行，共有121個國家、4個國際機構參加，展覽期間更吸引2,200萬人到場。MORICORO PARK作為繼承「愛・地球博」理念與成果嘅公園，於2006年7月喺長久手會場舊址上以新面貌開幕登場。
「愛知萬博」舉辦期間，作為「移動式展區」嘅日本首個磁懸浮列車・LINIMO更加係備受矚目。直至今日，LINIMO仍然正常運行，亦係前往公園嘅交通手段之一。
磁懸浮列車・LINIMO以懸浮於軌道上嘅方式運行，列車與軌道之間無接觸地行駛，因此運行時聲音非常寧靜，乘搭時絕對會感受到一種前所未有嘅未來感。前方駕駛席車窗使用大面積玻璃打造，令您可以一邊搭車一邊欣賞窗外美景，相當寫意！由於係連接著公園與名古屋市嘅市區路線，所以去完公園再順路去埋名古屋旅遊亦非常方便喔。
MORICORO PARK推薦玩法
MORICORO PARK相當廣闊，佔地面積約為194公頃，想欣賞豐富自然生態美又得，想盡情呼吸新鮮空氣、享受休閒樂趣亦得！不過MORICORO PARK咁大唔知點玩好？小編即刻話您知要點玩先夠盡興！
1. 園內欣賞時令動人花奔
MORICORO PARK內每個區域都有精彩景點與活動等您去發掘。當中，小編最推薦大家嘅就係賞花！園內係日本國內著名賞櫻地之一，染井吉野櫻、早開河津櫻與彼岸櫻等等從3月中旬到4月中旬綻放，園內到處都可以搵到多款唔同種類櫻花嘅蹤影。
同場仲有春天嘅粉蝶花、日本鳶尾（又名蝴蝶花）、野罌粟；夏天嘅繡球花、睡蓮；秋天嘅波斯菊；又或冬天嘅山茶花等盛開。開花季節期間，一於去花田、大草坪廣場、林床花園等地附近悠閒漫步，盡享受四季不同嘅花奔美景啦！
園內設有單車路線，更設有單車站提供租借單車服務，等大家可以輕鬆享受單車遊樂趣。單車路線全長5.1 km，屬於單車行駛專用路線。下個旅程不妨踩著單車乘著風，沿著單車路線，欣賞連綿小丘嘅絕景喔！
2. 去試坐東海地區最大型嘅摩天輪啦！
講到MORICORO PARK，不得不提堪稱公園地標嘅大型摩天輪。位於公園西站口附近嘅大型摩天輪有成88m高，係東海地區最大型嘅摩天輪，坐喺裡面即可以將遼闊公園與市區景色盡收眼簾。就算係坐著輪椅嘅朋友，都可以登上摩天輪，屬園內一大人氣睇景靚位。
摩天輪附近亦有唔少適合小朋友嘅活動設施，例如有「Dolphin Paradise（ドルフィンパラダイス）」（小朋友急流滑水梯）等電動遊樂設施（需另外收費）、以森林、水、風等為主題並活用自然地形所打造嘅室外遊樂設施，仲有可以享受室內活動以及體驗項目嘅愛知縣兒童綜合中心等等，小朋友玩得開心嘅同時，大人亦可以放心。
3. 於愛・地球博記念館與日本庭園感受當地文化
第3個想介紹嘅係愛・地球博記念館，其前身為博覽會期間迎賓館・接待大廳，後來經改建而成現時嘅記念館。除咗萬博會官方主題曲以及電視播放中使用嘅歌曲會於館內播放，參觀人士仲可以欣賞到來自包含國外展覽館所捐贈嘅送贈品在內嘅超過300件展品。
記念館過去於博覽會期間只供VIP貴賓使用、一般人不得進入，但好消息係而家已經開放畀大眾入場！裡面仲可以見到當時嘅VIP貴賓簽名，去愛・地球博記念館朝聖，絕對會成為您嘅超寶貴體驗，試問一場去到MORICORO PARK又點可以唔到此一遊？
行到攰，不妨轉場去公園體驗地道日本庭園風采，順便坐低休息一陣。染上紅、橙色等顏色嘅鮮豔紅葉，與洋溢著日本風情嘅橋樑互相輝映，絕對係必睇日本季節絕景！
另外，您亦可以喺庭園內嘅「立禮席」（座椅式禮法嘅茶席）享用抹茶及菓子（※立禮席內用茶時間為星期六、日及公眾假期），進一步體驗日本文化。
4.全年開放嘅溜冰場！去體驗溜冰吧~
愛知縣內相當盛行溜冰比賽，縣內設有多個著名嘅大型溜冰場，MORICORO PARK內亦唔例外，而且係一年四季都可以使用。即使係炎炎夏日，遊客都可以享受溜冰樂趣，而且亦有溜冰鞋出租、手套販賣等服務提供，就算兩手空空都可以安心去溜冰喔！
場內設有自由滑行空間與連結外側嘅環繞路線，就算係初學者都可以沿著牆壁慢慢練習。星期六、日、公眾假期都設有初學者短課程（接受即日報名），細心教導每位初學者，服務相當貼心。不妨去曾作為冰上表演嘅場地溜個冰，為自己留個愛知之旅嘅美好回憶。
景點資訊
- 名稱：愛・地球博記念公園（MORICORO PARK）
- 地址：愛知縣長久手市茨廻間乙 1533-1
- 交通方式：從東部丘陵線（LINIMO）於「愛·地球博記念公園站」落車後即可抵達；或乘搭名鐵巴士，於「愛·地球博記念公園站」落車後即可抵達
- 營業時間：【4月〜10月】08:00〜19:00,【11月〜3月】08:00〜18:30（園內設施休館日為08:00～17:30）
- 休館日：星期一（如果星期一係公眾假期嘅話，則順延至下一個平日作休館日。春假、暑假、寒假期間無休）
※2022年10月1日（星期六）起改為星期二休館 - ※年末年始（12月29日〜1月1日）休園
- 入園費：免費（園內各設施使用費用、預約方法請於官方網站確認）
- ※吉卜力公園預定於2022年11月1日開園
- URL：https://www.aichi-koen.com/moricoro/
Comments