九州有非常多能夠享受大自然嘅景點同體驗活動，今次同大家推薦北部4縣：福岡、大分、佐賀同長崎嘅隱藏人氣景點，無論首次定再次去九州都可以發掘更多九州魅力！
【福岡】可愛滿分！戀木神社&粟島神社
姻緣勝地嘅戀木神社處處都有心型圖案，就連掛住嘅御神籤都摺成心型，簡直係打卡熱點！喺2021年12月25日起更新增一個影相位，有一個由石頭砌出浪漫巨大心型圖案嘅水池，利用獨家技術令池面變得清澈，更顯浪漫氣氛！本殿前嘅烏居有10個隱藏心型，唔知大家去到又會搵到幾多個呢？
- 景點名稱：戀木神社
- 地址：福岡縣筑後市水田62-1
- 交通： 從JR鹿兒島本線羽犬塚站揸車5分鐘或步行約20分鐘
另外，附近嘅粟島神社專為「一寸法師（日本民間故事中身高只有一寸即3cm嘅人物）」而製作嘅迷你鳥居都超級可愛！傳聞瓹過去仲可以保祐健康添！（特別係女性）
- 景點名稱：粟島神社
- 地址：福岡縣筑後市羽犬塚652-1
- 交通：從JR鹿兒島本線羽犬塚站步行約15分鐘
【福岡】「Glamping福岡 葡萄樹 ～海風與海浪～」特色主題Glamping好去處！
而家香港好興Camping、Glamping，其實日本都係！位於福岡縣福津市海邊嘅「Glamping福岡 葡萄樹 ～海風與海浪～（ぶどうの樹）」有大帳篷、主題Cottage小屋、附天台別墅等唔同類型住宿設施可供選擇，對住沙灘海景非常有度假氣氛。
另外仲有優雅餐廳，午餐點一個主菜，即可享用埋多種蔬菜任食自助餐！仲可以加錢嗌埋甜品同飲品套餐，好味又好睇！
- 景點名稱：Glamping福岡 葡萄樹 ～海風與海浪～ 福津海岸通店
- 地址：福岡縣福津市西福間4-10-10
- 交通：從JR福岡站乘搭往「JR東鄉站」巴士，於「西福間5丁目」落車步行約5分鐘
【福岡】日本傳統手工藝「大川組子」木工
學生時代或者都上過木工堂，咁大個咗不如試吓體驗製作日本「大川組子」嘅木工手工藝啦！唔需要用到釘，只用精密砌合方式嚟拼合木工，雖然唔容易一拼即合，不過合上嘅瞬間真係好爽！整齊嘅幾何模樣於燈光下會形成各種光影，好似藝術品咁靚！大家都可以喺大川觀光資訊中心「大川TERRAZZA」即場體驗，或者直接買製成品，書簽等都好有質感，用嚟做手信都唔錯！
- 景點名稱：大川TERRAZZA（大川テラッツァ）
- 地址：福岡縣大川市大字向島2525-2
- 交通：從西鐵柳川站乘搭往「佐賀站」巴士，於「大川橋巴士站」落車步行約10分鐘
【大分】耶馬溪慢活踩單車 感受山明水秀
將已停駛嘅鐵道路軌改造而成嘅單車徑，沿途風光明媚，有岩壁河流、山林景色、日本最長嘅石造拱橋「耶馬溪橋」同人手挖掘嘅隧道「青之洞門」等。四季展現不同風貌，例如有櫻花、新綠、秋楓等大自然美景盡收眼簾！途中亦有得以保留至今嘅舊鐵道車站「平田宿場」，好有懷舊氣氛！玩完一日就喺耶馬溪溫泉設施浸返個靚溫泉消除疲累啦～
- 景點名稱：耶馬溪CYCLING TERMINAL
- 地址：大分縣中津市耶馬溪町大字柿坂353
- 交通：從JR日豐本線中津站/ JR久大本線日田站乘搭往「耶馬溪（旬菜館）・豐後森・守實行」大交北部巴士，於「柿坂」落車步行約5分鐘
【大分】日本懷舊老街注入可愛元素 人氣打卡新景點——豆田町
位於大分縣日田市嘅豆田町又名「九州小京都」，保留著江戶時代風貌，街道兩旁有唔少售賣醬油、和菓子，日本酒等日本老鋪，不過近年有各種又可愛又有時尚嘅咖啡店、精品店等新店進駐，令老街既保留懷舊氣氛，亦顯現可愛一面。每一個角落都影到文青風呃like相！
- 景點名稱：豆田町（天領日田資料館）
- 地址：大分縣日田市豆田町11-7
- 交通：從JR久大本線日田站步行約15分鐘
【佐賀】剌激好玩！「FOREST ADVENTURE吉野之里」日本森林歷奇體驗
除咗主題樂園嘅機動遊戲，大自然森林中嘅歷奇設施都可以帶畀你驚喜又刺激嘅體驗！秋天時一邊「踩鋼線」一邊欣賞楓葉，不亦樂乎！當中「ZIPTRIP TOUR」山頭飛索滑翔最刺激！從地上30米高滑翔，放眼佐賀平野遠至雲仙山岳，春天時更可以飽覽遍佈山頭嘅櫻花，喺香港歷奇設施絕對體驗唔到！另外亦有專為小朋友而設嘅路線，旁邊亦有「家長路線」，一家大細去玩都適合。
- 景點名稱：FOREST ADVENTURE吉野之里
- 地址：佐賀縣神埼郡吉野之里町三津2753-375 Adventure Valley SAGA內
- 交通：從長崎自動車道東肴振I.C揸車約8分鐘
【佐賀】肥前濱宿・酒藏通 同時體驗江戶及昭和氣氛嘅懷舊老街
老街上有茅葺（茅草屋頂）商人住宅、武家屋敷（日式古代武家住宅）、西洋館等江戸、昭和兩個時代嘅建築同時並存，非常有趣！當中有唔少酒藏，可以免費試飲同參觀酒藏工場，搵到啱心水嘅仲可以直接購買。
JR肥前濱車站旁邊嘅酒吧提供3款鹿島酒試飲組合，都只係1,000yen！對日本酒有興趣嘅朋友不妨一試！
- 景點名稱：肥前濱宿・酒藏通
- 地址：佐賀縣鹿島市濱町乙2696
- 交通：從JR肥前濱站步行約6分鐘
【佐賀】日本三大稻荷神社之一 祐德稻荷神社
同京都嘅清水寺一樣，祐德稻荷神社本殿以巨柱支撐建於山上，極具莊嚴氣勢。本殿必須事先預先能夠進入，遊客進內後可以近距離向神明祈求家運昌隆、生意興隆、交通安全等。內部嘅塗漆壁畫、天花板彩繪大龍，同有田燒製成嘅神像都宏偉華麗，值得花時間好好欣賞。
如果某身體部位有毛病，據聞可以先摸吉祥馬石像，然後再摸自己身上相同部份就可祈求痊癒健康。另外，同場仲有一個隱藏版「御神籤」可以抽到中文籤文，唔識日文都無有怕啦！不過平時無擺出嚟，有興趣嘅朋友要同工作人員講想抽「玉おみくじ」喇～
- 景點名稱：祐德稻荷神社
- 地址：佐賀縣鹿島市古枝
- 交通：從JR長崎本線肥前鹿島站「鹿島巴士中心」站乘搭往「祐德稻荷神社」祐德巴士，於「祐德神社前」站落車
【長崎】壹岐小島深度遊享受大自然
從福岡博多港碼頭出發搭快船，約1個鐘就可以抵達離島壹岐島。島上可以享受好多大自然風光，例如喺以無敵大海景作為背景嘅景點「左京鼻」，就可以欣賞到約1公里長延綿不絕嘅天然懸崖峭壁絕景，氣勢磅礡，仲有紅色鳥居作點綴𠻹。另外，喺「Harahoge地藏（はらほげ地蔵）」遇上潮退就會見到6座心口穿窿嘅地藏菩薩，身穿紅色肚兜同紅帽，好可愛！而最令小編驚訝嘅，就係「猿岩」！香港都有象鼻岩等形似動物嘅天然岩石，但需要些少想像力……但猿岩根本一睇就知佢係猩猩，似到十足十！
- 景點名稱：壹岐島
- 地址：長崎縣壹岐市蘆邊町箱崎中山觸2575-22 蘆邊港渡輪碼頭1樓（蘆邊港觀光資訊中心）
- 交通：從博多港乘搭高速船到蘆邊港
【長崎】壹岐海豚公園 & 度假村－同海豚暢泳嘅機會嚟喇！
有別於一般水族館，訓練人員唔會用食物誘惑嚟做訓練，反而係提倡與動物溝通、透過建立互信關係向海豚發出指令，名為「Relationship Based Training」。所以無論你嘗試餵飼料或摸摸親近海豚時，都可以帶畀你海豚最真實嘅一面！你甚至可以落水同海豚暢泳，聽講海豚玩得開心時仲會自動比你捉住佢隻背鰭「帶」住你遊水添！
另外仲有SUP、划皮艇等水上活動，同露營區、BBQ等設施提供，可以開開心心玩足一整日！
- 景點名稱：壹岐海豚公園 & 度假村
- 地址：長崎市壹岐勝本町東觸2668-3
- 交通：從蘆邊港揸車，經縣道23號線，行駛約29分鐘（約10km）
【大分&長崎】住得舒適 食得出色！日式旅館推薦
「小京都之湯 三隈酒店（小京都の湯みくまホテル）」係一間位於大分縣日田溫泉嘅日式溫泉旅館，露天展望溫泉位於10同11樓，屬全九州第一高露天溫泉。女性可以免費租借浴衣，著出去行街別有一番風味！晚餐日式懷石料理食物亦非常豐富！客房有和式、和洋室，而且夠大間，由房間望出去就欣賞到三隈川河景，非常寫意～
- 景點名稱：小京都之湯 三隈酒店（小京都の湯みくまホテル）
- 地址：大分縣日田市隈1-3-19
- 交通：從JR日田站乘搭日田巴士，於「日田溫泉街」落車即達
喺位於長崎縣壹岐小島上嘅「壹岐美景酒店」亦可以邊浸浴邊欣賞大海景。酒店後面就係魚市場，每日有新鮮漁穫作為晚餐材料，職員仲會喺你面前即場將海鮮拎到爐邊烹調，烤好嘅海鮮又有份量又有咬口，超正！不過小編最鍾意都係鯛魚剌身，第一次食到咁爽又彈口，真係要新鮮嘅刺身先有呢種味道！
- 景點名稱：壹岐美景酒店（ビューホテル壱岐）
- 地址：長崎縣壹岐市鄉之浦町鄉之浦401
- 交通：從鄉之浦港步行約5分鐘
想知道更多九州好玩之處，即Click以下九州官方旅遊資訊網站瀏覽各地食、玩、買等等詳盡介紹啦！
※嚟緊2022年2月喺北角匯一期（Harbour North Phase 1）仲會現場舉行九州旅遊宣傳活動，鍾意九州嘅朋友，切勿錯過！※
※每一個景點、設施都設有消毒搓手液，而且無論職員同客人都有戴上口罩。部份設施亦需要量度體溫才能進入，防疫意識及措施十分充足！可以安心去玩～
（小編只有採訪拍攝同進食時先除低口罩～）
Comments