Pixar同迪士尼合作嘅經典動畫《反斗奇兵》，自1995年推出後深受大人小孩喜愛，溫馨嘅故事同有趣可愛嘅角色，更係好多fans嘅童年回憶！傳聞已久嘅東京迪士尼度假區「反斗奇兵飯店」開幕時間終於確定好喇！官方近日亦公布咗酒店嘅設計同開幕時間，我諗各位鍾意迪士尼同反斗奇兵嘅朋友都迫不及待想即刻衝去住啦！而家就等FUN! JAPAN小編一齊嚟睇吓酒店內部可愛嘅設計先啦～
「東京迪士尼度假區反斗奇兵飯店」確定2022年4月5日盛大開幕
即將喺2022年4月5日盛大開幕嘅「反斗奇兵飯店」，係繼「東京迪士尼樂園大飯店」、「迪士尼大使飯店」、「東京迪士尼海洋觀海景大飯店」同「東京迪士尼樂祥飯店」之後，第5間落成嘅日本迪士尼酒店。「反斗奇兵飯店」共有595間客房，標準客房為575間，精緻客房為20間，每間客房都有相同嘅設計主題。位置鄰近東京迪士尼樂園、東京迪士尼海洋，亦是東京迪士尼度假區內首間定位「舒適型」嘅酒店。
酒店滿滿《反斗奇兵》世界觀！充滿好多趣緻設計
日本第5間迪士尼酒店，主題就好似酒店個名咁，係以《反斗奇兵》為主題，打造出處處充滿驚喜嘅玩具城酒店，讓人感受電影世界中嘅歡樂氣氛。從酒店外觀到大廳，都可以讓住客親身體驗到滿滿經典迪士尼・Pixar電影《反斗奇兵》嘅世界觀，充滿五顏六色嘅繽紛裝潢、玩具造型裝飾同充滿玩樂嘅巧妙設計，令人彷彿走進童趣世界中。
客房則係採用安仔（Andy）房間嘅配色，等每位住客都好似入住喺電影中Andy間房咁，嚟到酒店就即刻轉換心情進入反斗奇兵嘅世界！
住客的專屬設施「勞蘇花園咖啡店」
酒店2樓目前規劃成超可愛嘅「勞蘇花園咖啡店」！設計元素就係以《反斗奇兵3》中登場嘅人氣角色「勞蘇」為主，餐廳可容納約300人，喺早餐同晚餐時段提供任食自助餐。
「反斗奇兵飯店」其他設施
除咗前面介紹嘅客房同餐廳之外，仲有販售酒店獨家商品嘅禮品店、紀念幣販賣機、育嬰室、服務櫃台同有提供行李宅配服務。喺中庭有「玩具朋友廣場」，可以睇到4米高嘅胡迪等多位電影中人氣角色雕像；仲有喺「彈弓狗公園」可以睇到正門同廣場以彈弓狗元素融合，呢度仲有巴斯光年、翠絲雕像，一定係最熱門嘅打卡景點喇！而家可以開始存定錢，等到可以隨意去旅行嘅時候，就絕對要將呢個重現電影中繽紛又可愛世界嘅「反斗奇兵飯店」列入必住清單之中！
Comments